بلوچستان ءِ دمگ کچھی ءِ ھند ڈھاڈر ءَ چہ یک دھکانے گوں براتاں ھوار بیگواہ کنگ بیتگ۔
ٹی بی پی پتر ءَ سر بیتگیں ھالانی ردءَ گوستگیں روچاں سونا خان برھمانی جھمنند ڈھاڈر گوں آئی ءِ براتاں زورانسری بیگواہ کنگ بیتگ اَنت کہ داں انگت آیانی درگت ءَ ھچ پئیمیں اھوال دیما نئیتکگ۔
اھوالانی رد ءَ بیگواہ بیتگیں مردم ھندی سردار مٹا خان ءَ وتی اوتاگ ءَ لوٹائنتگ اَنت کہ اِشی ءَ پد آیانی درگت ءَ ھچ پئیمیں اھوال دیما نئیتکگ اَنت، گمان ودی بیگ ءَ اِنت کہ مٹا خان ءَ دھکان کاری ءُ زمینداری ءِ تک ءَ سیادی داروکیں سونا خان ءُ آئی برات پاکستانی لشکریانی دستءَ داتگ اَنت کہ چریشی ءَ پد آ بیگواہ اَنت۔
ھندی اھولانی گُشگ اِنت کہ چدو پیسر ھم چہ ھمے ھنکین ءَ مردمانی بیگواہ بیگ ءِ وئیل دیما اتکگ اَنت بلے اے درگت ءَ گیشتر اھوال انگت سر نہ بیتگ اَنت۔
دمگی واکدارانی نیمگ ءَ اے وئیل درگت ءَ انگت ھچ پئیمیں لیکہ دیما نئیتکگ۔