اِیوْکی ءُ منزل
نبشتہ کار :جلال اھمد
دی بلوچستان پوسٹ
درکسانی ءَ چہ آ دِگہ مُوڑے مردمے اَت ، ناں کسّے ءِ گُون ءَ گپ ءِ کتگ اَت ءُ ناں کہ جُستے ، وھدے کہ یکے ءَ جُستے کتگ اَت گُڑا بس لُنٹ ءِ سُر اتگ اَت اَنت ئِے۔انچوش سما بُوتگ اَت کہ گپے کنگ ءَ اِنت ، روچ پہ روچ آ مزن بُوان بُوت بلے انگت ھما وڑ اَت۔ اِیشی ءِ ھمے یکیں کارپد ءَ چے گِس ءِ مردم ھم پریشان اَت انت۔ ناں آئی ءَ را مردم دوستی ھست اَت ءُ ناں دِگہ گپ ءُ تران کنگ اَت آ مُدام اِیوْک ءُ یک تھنا نشتگ اَت ءُ لئیب ءِ کتگ اَت کسّے ءِ کار ءَ کارے نیست اَت۔
ھر مُدام آ انچوش بے توار اَت کہ انچو لگ اِتگ اَت آ پریشان اِنت ، گمیگ اِنت ، بے چاڑ اِنت ءُ آئی ءَ را گپے ھست کہ پدّر ءِ کنگ ءَ نہ اِنت چیر دَیگ ءَ ئیں۔ میتگ ءِ مردماں آئی ءِ ھاموشی دِیستگ اَت گُڑا آئی ءَ را لھتین ءَ گنوک گْوشتگ اَت ، بلے آ گنوکے نہ اَت آ ھُوش ءُ سار اَت سر ءَ ھم برابر اَت۔
مَدّان مَدّان ءَ وھد کِنزان بُوت آ ھم رُست ءُ مزن بُوت بلے آ انگت ھما وڑ ءَ اَت آئی ءِ مستریں برات شھر ءَ کار ءَ اَت بس اَئید ءِ وھد ءَ گِس ءَ واتر بُوتگ اَت ، بلے آئی ءَ را وتی برات ءِ گُون ءَ گپ کنگ ھم لَج بُوتگ اَت آ برات ءِ دیم ءَ ھچ بر نہ کپتگ اَت ، ھر مُدام آ ابیتک اَت گْوش ئے زان آں جیڑھانی آماچ اَت۔
چو کہ نوں باز وھد گْوستگ اَت آئی ءِ اُمر ھم مزن اَت نوں آ دْراھیں دُنیا ءِ شَر ءُ گَندگ ءَ سرپد اَت بلے بس آ درکسانی ءَ بِہ گِر تاں مزنی ءَ آ ھچ جاہ ءَ نہ شُتگ اَت سُھب ءَ وانگجاہ ءُ بیگاہ ءَ گِس ءَ ، آ گِس ءِ ھچ کار ءُ چُلوپگ ءَ گون نہ اَت بس وتی جِند ءَ گوں مُشکول اَت ءُ اَنچو لَگ اِتگ اَت کہ آ اے دنیا ءِ بنی آدمے نہ اِنت آ دِگہ دنیائی ءَ چے اتکگ۔
چی ءَ ؟ کہ آئی ءِ سرجمیں رِپک ایندِگراں چے جُتاہ اَت اَنت گُڑا یک روچ آئی ءَ را مات ءَ توار کت ءُ وتی کَش ءَ نِندار اِینت کہ نوں وَ تو مزنے ترا چی اِنت تو مُدام وت ءَ گوں چیر ءُ سر ئے ، گُڑا اے روچ ءَ بس آئی ءَ وتی مات ءَ گوں گپ ءُ تران شرّیں وڑے ءَ کت ءُ آئی ءَ وتی مات ءَ را ھمے گْوشت کہ “مات” اے زندگی ءَ منی جُھد ھمیش بُوتگ کہ من مُدام وت ءَ گوں وت پیسلہ بِہ کن آں دانکہ وتی منزل ءَ سر بِہ باں ءُ اگاں من وتی جُھد ءَ دِگہ یکے ھَوار بِہ کن آں بُوت کنت کہ آ من ءَ منزل ءِ سر بُوگ ءَ مئیل اِیت ءُ آ منی پیسلہ ءَ رد بِہ کنت۔
آئی ءَ گُڈی گپ گوں مات ءَ ھمیش اَت کہ اگاں وھدے یکے ءَ را منزل ءَ سر بُوگی اِنت گُڑا آئی ءَ را اِیوْک ءِ یک تھنا جیڑگی اِنت ءُ جُھد کنگی اِنت ءُ وتی پیسلہ ءَ وتی جِند ءَ گوں وت کنگی اِنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔