نبشتانک: بے واھُندیں کبر
نبشتہ کار: کمبر اِسمائیل
دی بلوچستان پوسٹ
کوھانی یک دراجیں کٙتارے کہ گْوش ئے یکے ءِ دست ماں دومی ءِ کوپگ ءِ سر ءَ ایر ءُ روان اِنت سر اِش مِک ءُ یٙک ءُ دومی ءِ مھکمی سٙنگت اَنت ، کہ یک سنگتے پہ دومی سنگت ءٙ را کوپگ دیگ ءٙ اَت ھمے کوھانی روچ دراتکی نیمگ ءٙ یک کوھنیں کبرِستانے کہ چٙپ ءُ چاگِرد ءٙ بے وسیں کٙبر کہ سٙرانی سِنگ اِش اُوں کٙپتگ اِت اَنت ھمے کٙبرانی میان ءٙ یٙک چاریکی ءِ کہ چو جنوزام ءٙ اِیوک ءُ درائیں مِیتگ ءِ کبرانی کماش ات بلے یٙک آجز ءُ نزوریں کماشے ئیگ اَت اے مِیتگ ءِ چاریں نیمگاں کہ چمان دور دے بس بے وس ءُ ایوکیں کٙبر کہ چہ ایوکی ءِ بیم ءٙ وتی گاماں پہ ھمے چاریکی ءِ گور ءَ دور دیان اَنت چاریکی ءِ دیم ءَ کہ روچ ٹِک دٙیگ ءٙ اَت ھمے پیتاپ ءٙ یک پیریں کٙماشے ءِ سٙر جھل اَت ءُ گوں پیش ءِ ساداں آ گُلائش اَت ءُ سر ءِ سر ءٙ یٙک کوھنیں مسکتی چادر ءِ کہ روچ ءٙ رنگ ءَ لگوشینتگ اَت ءُ دیم ءِ سٙر ءَ یک ٹالے ھم سیائیں مود نیست اَت ۔ وتی کٙش ءٙ تنگی پیش ایر کرتگ اَت ۔چمے پیشان اِتاں یٙک یٙک ءٙ ساد ءَ آڈ دیگ ءٙ اَت گوں چاریکی ءِ دیمے جمک ءٙ ھڑینگ ءٙ اَت وھدے کہ درائیں پیش ءِ ھتم بوت اَنت پاد اَتک ءُ وتی گور ءِ گُدانی درائیں ھاکے چنڈ اِت ءُ جٙمک ءِ سر ءِ درائیں ساد ءِ بُن ءٙ ایر کرت ءُ پد ءَ زرونک ءِ گوں زمین ءٙ جٙت ءُ پد ءَ گوں ھمے ساد ءٙ گلائیش بوت۔ہر یک سادے ءِ پیڑ دیان ءُ پاھو کارمرز کنگ ءٙ لگ اِت ۔وھدے کہ درائیں سادانی رنگے مٙٹ کُت ءُ پاھو کہ رنگ ءٙ کارمزے کُت اَنت ءُ اوشتات ءُ درائیں پاھوے مہ کوپگ ءٙ ھڑینت ءُ چم ءِ مہ چارین نیمگاں دور دات اٙنت ھمے دمان ءٙ چم ءِ مہ بُرزی کوھان کپت ءُ کہ ھر یکے پہ دومی ءٙ کوپگ ءُ درائیں اُمر ءَ یک دومی ءِ ھمسپر اِتاں دل ءٙ یے وار نہ دات ءُ پد ءَ چمے جھل کُت ءُ چاریکی ءِ چارین نیمگ ءِ کبراں چارگ ءٙ لگ اِت کہ ھر یکے چہ دومی ءٙ بیزار ءُ تٙچگ اَنت چمانی ارس ءِ درآیگ ءٙ لگ اِت ءُ وتی دزمال ءِ زُرت ءُ اَرس ءِ پھک کنگ ءٙ لگ اِت وتی نِزوریں گاماں پہ کٙبرانی نیمگ ءٙ دور دٙیگ ءٙ لگ اِت ءُ یٙک یٙک ءٙ درائیں کبرانی سر ءٙ پاھو ءِ ایر کٙنگ ءٙ لٙگ اِت ءُ یٙک پاھوے اَنگت مہ کوپگ ءٙ اِنت ئے ءُ لونجان اَت ءُ وتی سر ءِ دٙزمالے دور کُت ءُ پادانی دیم ءَ دور ءِ دات ءُ دپے پٙچ کُت ءُ گُٹ ءِ زور ءٙ کوکار دٙیگ ءٙ لگ اِت۔(شما درائیں کٙبرانی مردم لگور اِت چہ رٙستر ءِ بیم ءٙ وتی ھلک ءُ جاگہ یٙل داتگ اَنت شُما چی گُشت ملکموت تھنا ھمے میتگ ءِ واھند اِنت پد ءَ ھما میتگ کہ شُمئے ناپگ ہم ھمد ءَ کٙل اِنت۔من کئے کئے اے بار ءَ وتئی نِزوریں کوپگ ءٙ لڈ ایں ۔دریگتیں شُما وتی کٙبر ھم چِدا بُرتین اِت اَنت گوں ءُ زمین ءِ بار سُبک کُت ایں۔)پیریں مٙرد ءِ ارس ترمپ ترمپ ءٙ زمین ءِ دِلبد ءٙ کٙپگ ءٙ اِتاں کپتگیں دزمالے زُرت ءُ ارس ءِ پھک کنگ ءٙ لگ اِت سرے چِست کُت ءُ چٙک ءِ چٙر ئینت درائیں کٙبرانی سٙرے پاھواں چٙارگ ءٙ لگ اِت ءُ دیم پہ چاریکی ءٙ روگ ءٙ لگ اِت زرونک ءِ مہ زمین ءٙ جٙت اَنت ءُ سٙرے گوں چاریکی ءِ پٙسیل ءٙ تِک ءَ یے دات.۔گون همے جیڑگ ءٙ گلائیش بوت کہ چہ مٙن پٙد اے بے واھندیں کبرانی واھند کئے بیت ءُ کئے اے بار ءٙ وتئی کوپگ ءٙ کٙنت.بس همے ھیال ءِ تھ ءَ اُوژناگ ورگ ءٙ لگ ایت دیست ئے کہ درائیں کبرانی دٙپ پچ بوگ ءٙ انت ءُ درا مُردگ وتئی سٙرانی ھاک آں چنڈگ ءَ اَنت-
وتئی سٙرون ءِ ساداں چِست کٙنگ
اَنت ءُ گون وتی گردن ءٙ لوپ اِش دات اَنت پٙد ءَ مہ کبرانی توک ءَ یٙک یٙک ءٙ تچک بوت اَنت کٙماش ئے ڈکالیں دیم ءِ سر ءَ گوش ئے وشی ءِ دو تٙرمپ کپت ھمے پیم ءٙ چاریکی ءِ پسیل ءٙ درائیں اوشتات اَنت ءُ جمکے سر ءٙ انگت یٙک سادے لونجان اَت ساد ءِ سٙر ءِ گون جمک ءٙ بٙست ءُ سر ءِ گون وتی گٙردن ءٙ لوپے دات ءُ وت ءٙ ملکموتے چنکانی تها دورے دات بس ملکموت ودار ءٙ اَت کہ ساه ءِ چو تِپل ئیگ ءَ رد بِدنت ءُ گون وت بے بارت پیریں مٙرد ءٙ مرگ ءِ گُڈی وهد ءٙ بس همے دیست کہ ساد وَ انگت سلامت اَنت کبرانی سرون ءٙ ایر اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔