نبشتانک: گلزمین ءِ سالونکیں بچ
نبشتہ کار: شیردل بلوچ
دی بلوچستان پوسٹ
اَزیمیں اِنسان ھما گوشگ بنت، آیاں وتی واھشت کُشتگ ءُ زاتی پایدگ یک کِر کرتگ ءُ وتی راج ءُ زمین ءِ پھازگ ءَ را وتی کومی زمہ داری لیک اِتگ ءُ راج ءِ آکبت ءِ واست ءَ جیڑ اِتگ ءُ جُنزگ ءَ اَنت، انچیں کارستانی ھدابُند راجدپتر ءِ تہ ءَ وتی نام ءِ جاہ دیگ ءَ سوبین بوتگ اَنت تاں جھان ھست آیانی سسا مان اِیت، مُدام گیر آرگ بنت ءُ راجی تمرد اَنت۔
بلوچ آجوئی ءِ جُنز ءِ سوبمندی، دژمناں دیستگ ، گوں چالاکی ءَ پروپیگنڈا کتگ، زورگِریں ڈیھ ءِ زوراکی ءُ اِیردستیں راج نزوریاں شون دیگ بِنا کرتگ نااُمیتی ودّی کنگ ءِ جھد کرتگ، اے پیمیں ھبر دیم ءَ آؤرتگ اَنت، گوشتگ اے وھد ءَ راجی آجوئی ءِ جُنز سوبمند نہ بیت، بلکیں بلوچ راج ءَ را گیش تاوان رس اِیت، پرچا کہ زورگِریں ڈیھ تاگت ور اِنت ما بلوچ راج نزور اِیں ،ھمے درگت ءَ جاھے ءَ نیشنل پارٹی رھشونے ءَ گوشت۔ “اگاں اے جُھد ما دوھزار سی ءُ پنچ( 2035 ) ءَ بندات بہ کُتیں شَرّتر اَت بلوچ راج ءِ آجوئی ءِ اُمیت گیش ھست اَت ” ما گاڑی یے ءَ سوار اِت اِیں جاہ آھو (جھاؤ ) کوھڑو ءَ بی این ایم ءِ بُنجاھی دیوانے ءَ روگ ءَ اِت اِیں ھمے دوھزار سی ءُ پنچ (2035) ءِ گوشتگیں گپّ سادک جمالدینی ،شھید ھاجی رزاک ءُ شھید سمد تگرانی ءِ دیم ءَ اِیر کت !! شھید ھاجی رزاک جان ءَ نواب ھیربکش مری ءِ اے کول دیم ءَ آورت “اگاں بلوچ راج ھاموش بوت گڑا بلوچ ءِ کومی شناس گار بیت۔” شھید سمد تگرانی ءَ بد بُرت گُشت ئِے “بُگش شما وتی مناپکی ءَ بہ کن اِت شمئے کارستاں راج شَرّ سرپد اِنت، شما نہ زان اِت ما چونیں اَڑیندگ ودّی بہ کن اِین ءُ وتواجھی ءِ جھد ایرموش بہ بیت “-
ھاسکر بلوچ ءِ چاگرد ءِ تہ ءَ چُشیں گپّ ھرجاہ بوتگ اَت گوشت ءَ اگاں آجوئی گِرگ ءِ امیت بوتیں گڑا میر ءُ سردارانی زھگاں مئے وڑیں گیریبانی زھگاناں موہ نہ داتگ اَت ءُ دگہ جاھے ءَ اے وڑ گوشتگ گوں ایشاں تیوگیں راج ھمراہ نہ اِنت۔ نمیرانیں رھشون چیرمین گلام مھمد ، شھید ڈاکٹر منان جان ، شھید رزاک گل ءُ دگر رھشونانی بابت ءَ گوشت اِت، چیریں ادارھاں پکار اَنت۔ بلے !! وھد ءِ ھمراھی دراھیں بے سریں گپّ دروگ بوت اَنت، رھشونانی تچکیں کارستان ءُ رِتکگیں ھوناں جھان ءِ دیم ءَ راج ءِ دژمناں آشکار کرت اَنت۔
شھید ڈاکٹرمنان جان گوش اِیت “دگنیا ءِ آبادی سک مزن گندگ بیت، دگنیا ءِ تہ ءَ آشوبی ئیں رھشون آیانی ھساب ءِ باز ءَ کم اَنت، کجام ڈیھانی راج وتی وتواجھی ءِ جنگ مڑ اِتگ اَنت بلکیں تیوگیں راج ءَ جنگاں بھر نہ زُرتگ ھمایاں راج ءِ لوٹ ءُ گُزر ءِ سر ءَ جُنز اِتگ ءُ مڑ اِتگ اَنت، گڑا ھما راجاں وتی رھشون لیک اِتگ اَنت، تمردیں کارست تاں جھان ھست مان اَنت “-
بلوچ راج ءِ آجوئی ءِ جُنز ھما جاہ ءَ رس اِتگ دگنیا ءِ تہ ءَ گندگ بوگ ءَ اِنت، اے ھبر ٹوھیں راستی یے کربان بوؤوکیں پرزندانی راج تاں آسر گلام دارگ نہ بیت، چہ ھمے ندر بوؤوکیں پرزنداں یکے شھید یوسپ نزر بلوچ زانگ بیت، واجہ” نزر مھمد بلوچ ءِ لوگ ءَ بیست ءُ ھشت سوچکان نوزدہ سد ءُ ھشتاد ءُ ھشت ” (22/5/1988) ءَ ماں کولواہ ءِ دمگ چمبر ءَ ودّی بوتگ ، آئی ءَ را یک جَنکیں چُکے ھم ھست نام ئِے” اَمبر یوسپ اِنت۔
آئی ءَ وتی بنداتی وانگ تاں پنچ تبکّ ءَ چمبر ءِ وانگجاہ ءَ دربرتگ ءُ دیمتر ءَ وانگ ءِ واست ءَ مزن وانگجاہ (ھائی اسکول) پسنی ءَ شُتگ ءُ ھمد ءَ دھمی تبکّ ئِے دَربرتگ ، ایپ اے ( F – A) بزاں دوزدھمی تبکّ ءِ چکاس ئِے شھدربرجاہ پسنی ءَ داتگ ءُ سوبمند بوتگ ءُ ھمے میانجی ءَ بلوچ نودربر گل ” بی ایس او ۔آزاد ( B S O Azad ) ءِ باسکے گِچین بیت، گوں ایمانداری ءَ گل ءِ کاراں دست گلائیش بیت، ھر وھد ءَ گل ءِ کار ءَ ساڑی بوتگ، چونیں کارے آئی بھر ءَ کپتگ گڑا سر ئِے تاب نہ داتگ شَرّیں رنگے ءَ پیلو ئِے کتگ، زوتکانی وتی ھند ءِ سروکیں رھشونانی رِد ءَ گندگ بوتگ ءُ آئی بالاد ءِ چیدگ دژمن ءِ چَمّانی کُنٹگ بیت۔
تیاب دپ ءِ مزاھمتکاراں زورگِریں ڈیھ ءَ را سربَتگ کرتگ اَت، گڑا استان ءِ زورگِریں پوچ ءَ وتی زورکیانی تہ ءَ گیشی آؤرتگ، ھمُک روچ آجوئی ءِ گل ءِ باسک چِست ءُ بیگواہ کُت اَنت، زندانیگ ءُ ازیت دیگ ءَ ھوار بازیں ھنداں بیگواھیں پُسگانی ژانگولیں ءُ پجار نہ بوتگیں کُنٹ دَور دیگ بوت اَنت، آجوئی ءِ جھد ءِ بازیں رھشون ءُ باسکے وتی چیریں کارمندانی دست ءَ شھید کنائینت اَنت وتی ارجان ئِے جت اَنت۔
ھمے پیم ءَ شھید”یوسپ نزر ءُ شھید” سدیک ائیدو ءِ سر ءَ بے سریں بُھتام جت ءُ پد ءَ کیسے ءِ زد ءَ ئِے آؤرت اَنت ءُ ماں گوادر ءِ آمیدگس ءَ پیش بوگ ءِ پرمان داتگ اَنت، بیست ءُ یک تاکشان ءَ دو ھزار دہ (21/12/2010 ) ءَ پسنی ءِ” پولیس ءَ وتی گاڑی ءِ سر ءَ اَتکگ ءُ پیش کنگ ءَ بُرتگ اَنت چہ پیشی ءَ واتر بوگ ءَ پد اِستان ءِ چیریں کارمنداں چہ کارواٹ پسنی ءَ چست کُتگ ءُ بیگواہ اِش کرتگ اَنت، کھریں زندان ءِ بندیگ جاھاں لھتے ماہ بندیگ کرتگ ءُ اَزیت داتگ اَنت ءُ بیست ءُ ھشت کرا دو ھزار یازدہ (28/4/2011 ) ءَ ھر دوئیں بلوچ پُسگانی تیرسُپتگیں کُنٹاں دَور دنت، وھدے کہ دمگ ءِ پھَزدار کُنٹاں ماں لوگاں رسین اِیت، شھید” یوسپ نزر ءِ کُنٹ ءَ کھول ءِ مردم دَزگر اَنت، گڑا آئی ءِ مات ءُ گُھاراں نہ گِریو اَنت، ماتیں گلزمین ءِ سالونکیں بچ یوسپ جان ءَ پہ ھلو ھالو زَرّشان کن اَنت ءُ کُنٹ اِش دْروت ءُ دراھبات کن اَنت گوش اَنت، ما شھید ءِ کارستاں پھر ءُ شان کن اِین ءُ ما بژینگ نہ ایں، راج ءِ دیم ءَ مئے سر بُرز ءُ بلند ئِے کرتگ ءُ وت ءَ نمیران کتگ۔
من شھید یوسپ نزر ءُ شھید سدیک ائیدو ءُ ھوار کرا ءِ ءُ سرڈگار دراھیں شھیداں یک پہ یک سرچکیں دروت ندر کناں ۔
آجوئی ءِ جُھد زندگ بات
ءُ بلوچ راج زندگ بات
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔