نبشتانک: بلوچ ءِ راجی جیڑہ
نبشتہ کار: اسلم آزاد
دی بلوچستان پوسٹ
بلوچ راج ءِ پرزنداں مرچی سیاسی سوچ ھست، وتی راجی گلامی ءِ مارشت اش اوں ھست بلے بد کسمتی ءَ بلوچ راج ءَ را یک منظمیں سیاسی گلّ، نظریاتی لیڈرشپ ءُ میان اُستمانی سند ءَ جلاوتن گورنمنٹ (گلَ) نیست کہ آ دورچاری ءِ گوماں دائم ءَ بلوچ راج ءِ رھنمائی ءُ رھبری بکنت۔ راجی آجوئی ءِ ھاترا ایوک ءَ جنگ لازم نہ انت۔ جنگ ءِ ھواری ءَ سیاسی چست ءُ ایر، انقلابی رھشونی، میان استمانی سند ءَ سفارتکاری ءُ راجی جنُزے المی بھر اَنت دانکہ بلوچ ءِ راجی جنز ءَ گوں شعوری پختگی ءُ سائنسی اسولاں گوں دیم پہ وتی منزل ءَ روان بکنت ءُ جنُز ہچ پروش ءُ اوشت ءِ آماچ مہ بیت انت۔
پاکستانی ریاست ءِ سیاسی، مئاشی ءُ اکلاکی جاورھال بے کساس نہ گیگ انت بلوچ راج ءِ انکلابی کیادت ءَ را اتھاد ءُ یکجاہ بوگی انت دانکہ آ پاکستان ءِ سامراجی دیوال ءَ بس یکمشت ءَ گوں جوانی ءَ دکھے بدنت۔ بلے بلوچ راج ءِ انکلابی کیادت وت ماں وت تپاک ءُ اتھاد نہ انت بلوچ راج ءِ یک سیاسی، انکلابی، میان استمانی گلے چہ دومی سیاسی، انکلابی، میان استمانی گل ءَ بگیر ءُ ایراد داریت۔ ایشانی ناتپاکی ءُ نہ وشی ءَ چے نیام ءَ پاکستانی سامراج ریاست بلوچ سرڈگار ءِ مال ءُ مڈیاں گیش ءَ چہ گیش لُٹ ءُ پول کنگ ءَ انت۔
پمشکا ہر وھد ءَ کہ بلوچ چاگرد ءَ سیاسی، مئاشی یا چاگردی جیڑے ءُ جنجالے بنت، پہ درور شھید ملک ناز ءِ کوش، شہید حیات بلوچ ءِ بے موت ءِ مَرگ، بالگتر ءَ گونڈین زھگ کہ ایف سی ءَ جت ءُ کُشت انت۔انوں چاگی ءَ پاکستان ءُ ایران ءِ سیمسر نوکنڈی ءَ پاکستانی لشکر ءَ بلوچ مزدور ءُ پوریگرانی سر ءَ اُرش کُتگ۔ آہانی گاڑی تاوان داتگ انت، ڈرائیور ءُ کلنڈرانی سر ءَ تچک ءَ تیر گوری کتگ، لھتے ورنا ھما جاھاں بیران بوتگ لھتے ورنا ماں ماشکیل ءِ ریکانی تہ ءَ تن ءُ گژن ءَ سرکار ءَ کشتگ انت۔ ہمے جیڑ ءِ ھلاپ ءَ لس مھلوک چو پیسریگیں وڑ ءَ دو سے روچ ءَ دگانی کوکار ءُ جاک کن اَنت ءُ پد ءَ دُرست وتی وتی لوگاں رواَنت ءُ تھّرنت ءُ کپنت کسہ ھمد ءَ چہ ھلاس بیت انت۔
بلوچ راج ءَ را چوشیں یک منظمیں سیاسی گلّے نیست انت کی آ اے ڈولیں سیاسی، مئاشی ءُ چاگردی جیڑاھاں انکلابی درشمے بدنت دانکہ بلوچ راج ءِ نوجوانانی سوچ ءُ فگر ءَ گیشتر تچک بہ بکن کہ اے بلوچاں ھردیں مرچی شما یکجاہ ءُ یکمشت مہ بیت گڑا پہ شما گلامی ءِ ازاب مدُام نازِل بنت انت۔ ھردیں شما پہ بستار ءِ انسان دگنیائے راجدپتر ءَ ھردیں زندگ ءُ آسودگیں نانے گرگ ءُ ورگ لوٹ ات گڑا شمئے جیڑاہانی بنُکی سوب راجی گلامی ءُ آئی ءِ توجیل راجی آجوئی انت ءُ آجوئی پہ ھلو ھالو نہ رس ایت بلکیں آئی ءِ ھاسل کنگ ءَ انسانی سرانی قرُبانی لوٹ ایت ھردیں مرچی ما جھد مہ کناں مئے آیوکیں پدریچ مارا الم ءَ بد ءُ رد کنت انت۔ ھمئے داب ءَ سیاسی گل راجی آجوئی ھاترا بلوچ ورنایاں گیش ءَ چہ گیش ذہن سازی، کردار سازی بکن انت، اے ڈولیں نہ گیگییں جاورھالاں وتی حق ءَ کارمرز (کیش) بکن انت، بلوچ راجی جنُز ءَ را گیش توانگر بکن انت (لیڈ اپ) بدیئنت ، پد ءَ بلوچ نوجوانانی گیچینکاری بکن اَنت، ھر مردم ھما کار ءَ کہ راجی جنُز ءَ پائدگ دنت جوان آں ھما پڑا دیم بدیاں آ پڑ سیاسی، نظریاتی، سفارتی، المی، املی آشوبی یا جنگی گلاں بزان بی ایل اے ءِ مجید برگیڈ ءَ را جوائن کنگ ھاترا ساڑی بکن انت۔
بلوچ راجی جنُز ءَ را یک منظم سیاسی گلَ، نظریاتی کیادت ءُ میان استمانی گلَے کمے ءِ سوب ءَ چے بلوچ راج ءِ سر ءَ روچ پہ روچ زالمیں ریاست گیشتر زلم ءُ جبر کنگ ءَ انت، اے بلوچ راج ءِ ناتپاکی سوب انت کہ پاکستان ءِ ڈولیں دروگیں ریاست ءِ بلوچ راج ءِ سر ءَ زورگری کنت، کمتری پالیسیاں روچ پہ روچ گیشتر تینزتر کنت، ھر بلوچ ءِ لوگ ءَ آس روک انت، ھر بلوچ یک نہ یک رنگے ءَ سامراج ریاست ءِ دست ءَ تاوان ورگ ءَ انت، انچو سالانی لٹ ورگ ءَ رند مرچی بلوچ راج ءِ ھوش اتکگ آ وتی دژمن ءَ زانت ءُ پجا کار ایت، بلے راج ءَ را یک منظمیں سیاسی گلے نسیت کہ راج رھبری ءَ بکنت انت، ھمے راج ءِ نوجوانانی جزباتاں انکلابی رنگ بدنت ءُ آہاں بلوچ راجی جنُز ءِ بھر بکن انت، دانکہ اے سانڈیں نوجوان وتی مرگ ءَ مرِگ ءِ بدل ءَ گھتر انت راجی آجوئی جنگ ءَ گون بہ بنت ءُ سامراج ریاست ءِ سیرین ءَ بہ پروش انت، تُن ءُ گژن ءِ مرگ ءَ بدل ءَ آشوبی جنُز ءَ گوں ھوار بہ بنت پاکستانی ادارگانی سر ءَ بے رھم ءِ اُرش بکن انت۔
پرد انپرادی رنگ ءَ ھرچی سوچ ءُ پکر بکنت آ ایوک ءُ تھنا ھچ کُرت نہ کنت۔ ھردیں یک مردمے راجی آجوئی ھاترا کار کنگ ءِ لوٹ ایت گڑا آئی ءِ واستا اے المی کہ آ ڈار کلی یا انِ ڈارکلی یک سیاسی، انقلابی یا بلوچ ءِ میان استمانی گلَے ءَ گون ھوار بہ بیت۔ راجی آجوئی ءِ ھاترا سیاسی ءُ انکلابی ءُ میان استمانی گلَ آں زانتکاریں نظریاتی بےکساس زلورت انت کہ یک مردمے ءِ وتی بھر ءَ ھمود ءَ دات کُت کنت، دومی گپ ھمے سیاسی ءُ انکلابی ءُ میان استمانی گلَ وتی مھلوک ءِ بزگی ءُ واری ءِ مارگ ءِ ھواری ءَ وتی زیردستیں ءُ مھرومیں راج ءَ را سامراجی ریاست ءِ ھر سامراجی مکّر ءُ پریب آں جوانی ءَ سرپدی بدے اَنت ءُ وتی راج ءَ گوں سابت کدمی ءَ رھبری ءَ بکنت دانکہ راجی آجوئی ءِ جنز وتی گڈسری منزل ءَ سر بیت انت۔
بلوچستانءَ ھاس کر بلوچ چاگرد ءِ تہ ءَ زالبولانی ھاتر ءَ انو انگت سرپیس سیاست کنگ ءِ واستا وھد ءُ گراؤنڈ ھست انت کہ آ سرپیس سیاست بکن انت انچو کہ آ زالبولانی جندے اندر ءَ راجی جذبہ، سیاسی زانت ءُ انکلابی ھمت ھست بہ بیت گڑا آ زالبول جوانیں رنگے ءَ سرپیس ءَ سیاسی کار کتُ کنان راجی آجوئی ءِ تھریک ءَ جوانی ءَ گوں دیم ءَ برگ ءِ ھاترا زالبولانی ھواری ھژدری انت، دانکہ جنین آدم سیاست ءُ آشوب ءَ ھوار نہ انت بزان تینگا انگت انکلابی جنُز سرجم نہ انت انچو کہ بلوچی ءَ مسال دے اَنت کہ “چاپ دو دستاں توار کنت “-
ھاں ھردیں سرپیس سیاست ءَ بلوچ زالبولاں ھردیں مزنیں سیاسی یا انکلابی جیڑے ءُ جنجال ءِ آماچ بنت انت گڑا آ وتی بنُجاھی سیاسی یا انکلابی گلَ آں چہ شور ءُ مشورہ ءَ بزُور انت، وتی سیاسی ءُ انکلابی کیادت ءَ چہ رہنمائی بگراں انت ءُ وتی جیڑہ ءُ جنجالاں گیش ءُ گیوار بکن انت ءُ وتی راجی جنُز ءَ گوں ھرُت چاری ءَ دیم ءَ بہ براں ءُ چاگرد ءِ اندرے سیاسی ءُ چاگردی ڈبہ آں وتی کوپگاں بزور انت۔
بلوچ ورنا ایوک ءَ کوہ ءَ ملیٹری فرنٹ ءَ جنگ داشت کن اَنت، بلے کوہ ءِ جنگ کنگ ءُ فوجی مورچہ ءِ سر ءَ اُرش کنگ ایوک ءَ راجی آجوئی ءِ مانزمان نہ انت، راجی آجوئی ھاترا یک سیاسی گلَے لوٹ ایت کہ اے ڈؤلیں نہ گیگیں جاورھالانی تہ ءَ کہ مرچی بلوچ راج شنگ ءُ شانگ انت آھاں دست ءَ بہ گپت، آھاں متھد، منظم ءُ متحرک بکنت ءُ انکلابی گلَے نیمگ ءَ روان بدے انت۔ انکلابی گلَ پد ءَ ایشانی انکلابی تعلیم ءُ تربیت بکن انت آھاں گوریلا ٹرئینگ بدے اَنت دانکہ آ جنگ ءِ میدانے ھاترا ساڑی بہ بنت انت۔ پد ھمئے نوجوان بلوچستان ءِ جتاجتائیں دمگ ءَ وتی آشوبی ءُ ادبی سرگرمیاں برجم دارنت انت، جنگی پڑا ابید بلوچ ءَ را میان استمانی جاگیری ءِ ھاترا اوں یک جلاوطن گورنمنٹ لوٹ ایت انت کہ آ بلوچ راج ءِ آجوئی ءِ ھاترا رنگ رنگیں دروشمے ءَ جُھد بہ کنت، گڑا بلوچ راجی جنُزے زوت ءَ چہ زوت دیمروئی ءِ کنت ءُ وتی آجوئی ءِ گڈی منزل ءَ سر بیت انت۔
اگاں نہ اے لس مھلوک ایوک ءُ تھنا دگہ ھچ کُت نہ کنت بس دو چار روچ ءَ شھرے دگانی سر ءَ کوکار ءُ جاک کنت، پد ءَ ھما ھاموشی بیت، پد ءَ ھما زلم ءُ زوراکی بنت، پد ءَ ریاست وتی لٹ ءُ پُل پالیسیاں دیم ءَ بارت انت، بلوچ ءِ ھال پد ءَ ھما بدیں ھال بیت انت۔ نو وھد اتکگ سر بوتگ کہ درستیں راجی گلَانی سروک وتی زاتی زد، کِنگ ءُ آنا ءَ یک نیمگے ءَ ایر بہ کن آں، بلوچ راج ءِ آجوئی ءِ ھاترا درستیں انکلابی کیادت متھد، منظم ءُ پرکار بہ بنت وتی بزگر ءُ بے وسیں مھلوک ءِ جوانی ءَ رھبری ءَ بہ بکن انت۔ دانکہ بلوچ راج چہ پاکستان ءِ گلامی ءِ لانت ءَ دائمی ءَ آجو بہ بیت ءُ وتی سرڈگارے وت واجہ بہ بیت انت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورکایشانی منّوک بہ بیت یا اگاں اے گل ءِ پالیسیانی درشانی اِنت۔