آہ، لعنت بات ترا 18
نبشتہ کار: اعظم صالح
دی بلوچستان پوسٹ
چہ کسانی ءَ نمبرانی تہ ءَ منی پسند ءِ نمبر 18 بوتگ، نزاناں 18 من ءَ چیا دوست بوتگ بلے ھر جاگہ کہ من ءَ نمبر ءِ در چنگ ءِ موہ رس اتگ گڑا من 18 گچین کتگ۔
منی جمیل آئی ڈی کہ من دوھزار ءُ چاردہ ءَ جوڑ کتگ آئی ءِ گڈی نمبر 18 انت منی انسٹگرام ءَ ھوں منی نام پشت نمبر 18 انت وتی لیبی شَرٹ ءِ سر ءَ اوں من 18 نبشتہ کتگ۔ منی آروس ھوں 18 سال ءِ امر ءَ بوتگ بلئے مرچی دل ءَ پہ 18 ءِ واستا اے آہ ءُ لعنت چیا پیداک انت 18 ءَ منی چئے پل اتگ مرچی اے 18 ءِ رمس ءَ اے کسہ ءَ شمئے دیم ءَ کار آں۔
انچوش کہ زندگ بوھگ ءِ واستا پہ زندگیں انسان ءَ آئی ءِ زندمان یک چکاسے ءَ کم نہ انت ھمے وڑ ءَ وھدیکہ چکاس ھال ءَ مردم وتی چکاس تاک ءِ ودار ءَ گوں بے سبری ءَ نشتگ ءُ ودار کنگ ءَ انت کہ باریں منی چکاس ءِ جست چونین بنت ما آیانی پسو چوں دات کت کن آں، ھمے پیم زندمان ھم یک انچیں ودارے چیا کہ زندمان ءِ توک ءَ دوستیں مردم ھرکس ءَ ھست، آیانی سدگ ءُ جتا بوھگ چہ یک گرانیں چکاسے ءَ کم نہ انت باز مردم اے وڑیں ٹوھیں گم سگ اِت نہ کنت ءُ یا کہ دل پَٹ بیت ءُ مریت یا کہ سر ءَ ماں گنوکی ءَ در کار ایت یا کہ سرجمیں زند ءَ چو منی پیم پہ ارس ریچگ وتی دوست ءِ جتائی ءَ گوازینت۔ دنیا ءِ توک ءَ نیست چوشیں مردم کہ آئی ءَ وتی مردم ءِ جتائی ءِ ترس مہ بیت، یکے ءَ سنگتے، یکے ءَ برات ءُ گھارے، یکے ءَ مات ءُ پت ءُ رشتہ داری ءِ ءُ یکے ءَ پہ دوست داری ءِ دروشم ءَ من اے گپ ءَ ھمے واستا گشگ ءَ آں چیا کہ یک سالے ءَ پیش من ءَ ھم انچیں مردمے بوتگ آئی ءِ واستا من ھم مدام پریشان بوتگ آں مدام من ھمے ترس ءَ گش ئے یک زریں گورمے ءَ اوژناگ ءَ بوتگ آں کہ یا ھدا منی سنگت منی دوست منی پلیں برات ءَ بہ پھریز، آئی ءَ چہ مرگ ءَ چہ مئے جتا بوگ ءَ مارا گستا بوھگ ءَ بہ پھریز من پہ آئی ءَ انچک پریشان ھمے واستا بوتگ آں کہ آ یک انچیں کشکے ءِ مساپر بوتگ۔ انچش کہ دنیا ءِ توک ءَ اے یک تچکیں گپے کہ ترا گوں کجام چیزاں مھر بیت ترا الم رس ایت۔ کسانی ءَ وھدے من ءُ منی سنگت ھور دکان ءَ لیبوک زورگ ءَ شتگیں گڑا من برے یک لیبوکے گچین کتگ بلے آئی ءَ گچین مدام تُپنگُک بوتگ۔ نزاناں آئی ءَ گوں تُپنگ ءَ چونیں مھر بوتگ اے گپ کدی آئی ءَ منی کرا زاھر نہ کتگ۔
پد ءَ تُپنگ ءِ مردم گوں تپنگ ءَ ھمراہ داری کنوکیں مردم تاں دیرا زندگ نہ بیت۔ چیا کہ تپنگی مردم ءِ دژمن ھم تپنگی بنت ءُ وھدے دو تُپنگ آس گوار ایت گڑا ھون الم رچ ایت ءُ پد ءَ دوئیں نیمگاں ارسانی ھار بج انت۔
منی چمانی ارسانی ھار ھما وھد ءَ بج اِت کہ 18 رمس ءَ سھب ءِ سر ءَ یک گرانی ءَ گش ئے من ءَ گورموش اتگ ات مئے میتگ ءَ گش ئے زردی ءَ ما پوش اتگ اَت من چو زانت کہ اے گرانی پشت ءَ بلاھیں دردے مان بلے من چو نزانت کہ اے زردی منی لاڈکیں برات ءُ دوست ءِ ھونانی شبینگ ءَ دیگ ءَ انت کہ مئے لوگ ءِ پیژگاہ ءَ تالان انت من چو نزانت کہ پمن زندگی ءِ یک گرانیں چکاسےِ پیداگ انت من چو نزانت کہ منی زندگی ءِ دوستریں مردماں یکے من ءَ چہ سدگ ءُ وتی مدامی جاہ ءَ روگ ءَ انت۔
آئی ءِ مرگ پہ من ھمے واستا کیامتی ءَ چہ کم نہ ات کہ من ءَ گوں آئی ءَ بازیں رشتہ ءُ نزیکی بوتگ من آ یکیں گس ءَ ھور وتی چم پچ کتگ انت ھور یکیں گوانزگ ءَ چیک وارتگ یکیں گلاس ءَ ورگ ءُ یکیں کتاب ءَ درس ونتگ بلے نزاناں چیا آئی ءَ پہ مرگ ءَ انچو اشتاپ کت ءُ کسانی ءِ لیب شموشت اَنت ءُ ھمے روچ ءِ مرگ ءِ گوازی ءَ در کپت ۔ نزاں چیا بلے منی آئی ءِ ونتگیں یکیں کتاب ءَ من ءَ دگہ ءُ آئی ءَ دگہ درس دات ءُ دوازدہ ءِ چکاس ءَ پد ءَ سن 2012 منی سنگتی یل دات ءُ پہ وت نوکیں سنگت شوھاز اِت، ءُ کم کم ءَ سالانی سال گس چہ دور بوگ اے چیز ءَ پدر کنگ ءَ ات کہ آئی ءِ سنگت چونیں مردم انت ءُ پد ءَ چار سال ءَ پد ھما وھدا من آئی ءِ اے نوکیں کشک پھم اِت کہ من ءَ یک روچے مئے لوگ ءِ پیژگاہ اوشتارینگ ءُ جست کنگ بوت کہ” خالد کہاں ہے” ھما روچ ءَ رند گڑا من سدک بوتاں کہ نو تو یک انچیں کشکے پہ وت گچین کتگ کہ مارا چہ پھک دور شتگے ءُ نو ما زانگ ءَ اتاں کہ تو وتی کسانی لیبوک پہ مدامی وتی دست ءَ زرتگ اَنت۔ نو باریں منی تئی یکیں نپاد ءَ پد ءَ وپسگ بیت یا نا چیا کہ تئی سرجاہ نو سنگ ات انت من ءَ سنگانی سر ءَ واب نئیت۔ اے روچ ءَ رند تئی مرگ ءِ ترس ھمروچ من ءَ بیم دیگ ءَ ات گشگ ءَ ات کہ تو پہ مدامی مارا یلا کن ئے بلئے من چو نزانت کہ آ شومیں روچ منی دل دوستیں نمبر 18 رمس بیت۔
مرچی 18 اپریل 2022 ءِ شپ ءَ من اے نبشتانک ءَ نبشتہ کنگ ءَ آں ترا چہ دل سوک ءَ 18 اپریل 2021 ءِ تئی شھیدی ءِ اولی سال روچ مراد بات گشاں ءُ گڈسر ءَ پد ءَ گشاں آہ، 18 ترا لعنت بات کہ تو اش من ءَ منی دوست پل اِت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔