نبشتانک: راج ءِ سرمتابیں بچ
نبشتہ کار : شیردل بلوچ
دی بلوچستان پوسٹ
لھتیں کارست اَنت ھچبر شموشگ نہ بنت، زندمان ءِ پڑ ءَ مُدام گیرآرگ بنت، مھر ءُ نزدیکی ءِ سبب بیت، ھرچ مردم ءَ را پہ نزدیک بوگ ءَ لاچار کرتگ اَت تئی پہ نیادے تلوس اتگ ءُ واھگ داشتگ کدی تئی گوں ھمنیاد بہ بیت،اگاں ھمنیاد بوتگ گڑا دل ءِ سیر ءَ کند اتگ، تو جُتائیں سپت ءِ ھدُابند بوتگ ئے، چہ تئی جُتا بوگ ءَ دراھیں سنگتاناں بے کساس تور اِتگ، دیوان پروشتگ اَنت دپ ءِ بچکند پُل اتگ اَنت ءُ نیادانی براہ دژمن ءَ وتی ارجان کُت اَنت، ھمک کس ءَ را تو گیر کائے، کوہ وَ چوناھا نہ وشیں جاھے تئی وڑیں ساپ دلیں ھمراہ ءِ گستا بوگ ءَ گیش نہ وش ءُ اَبیتک بیت، راج پھازیں کارست کسی ساڑایگ ءِ مھتاج نہ اَنت، ریتکگیں ھون وت آیانی مانزمان اَنت، تاں آجوئی ءِ روچاں ایردستیں راج ءِ رھشونی ءَ کن اَنت، چہ ھمے گستائیں کارستاں یکے شھید “سابرجان پنام یاگی بلوچ اِنت، واجہ ءِ آریپیں پِت ءِ نام شپی مھمد بلوچ جاہ آھو نرمگی ءَ ودّی بیت وتی بنکی وانگ ءَ وتی میتگ ءِ وانگجاہ ءَ بندات کنت دیمتر ءَ وانگ ءِ واستا کوھڑو ءِ مزن وانگجاہ ءَ روت دھمی تبک ءِ دربرگ ءَ پد ءَ لاپ ءِ آس ءِ توسگ ءَ تَگ ءُ تاچ ءَ بندات کنت، ایردستیں راجانی پرزند زندمان ءِ دومی متاھاں پشت کپتگ اَنت ۔ “بلوچی ءَ بتلے گوش اَنت “دست سُر اَنت دپ سُر اِیت” بزانکہ کسے کار ءُ روزگار کنت سیر لاپ بیت، اگاں نہ کنت، گڑا شُدیگ بیت ما بلوچ وتی زند ءِ روچاں پہ بزّگی تیلانک دیگ ءَ ایں، بچکیں زھگ انچو سرپدی بوت گوں پِت ءِ کاراں ھمکوپگ بوگ ءِ جھد ءَ کن اَنت گس ءِ تہ ءَ کار کنوک گیش بنت، گس وشھال بہ بیت ءُ دگہ کسے ءِ چمدار نہ بنت مات ءُ گُھار ءُ کستریں برات پہ شاتکامی زند ءِ روچاں گوازین اَنت، دگہ جاھے مئے بِزرگاں اے وڑ گوشتگ” بَچکیں زھگ ءِ مات ءُ پت تاں وھد وار ءُ بزگ اَنت چُک اِش کسان اَنت، چہ اے گپّ ھمے پدّر بیت گلامیں راجاں مُدام وتی لاپ ءِ گم اِنت، دگہ وانگ ءُ زانگ، لوگ ءُ جاہ، سانگ ءُ سور وَ کسمت ءِ گپّے، دراہ گلامی ءِ بکشاتگیں سوگات اَنت۔ بلے !! واری ءَ مارا انچو پیچ اِتگ ما زندمان ءِ اڑان دَر نہ بہ اِیں، ایردستی مئے کسمت ءِ سر ءَ وپتگیں اژدھایے ، ایوک ءَ آجوئی ءِ جُھد مئے وش بدبھتی ءُ دیمروی ءِ زامن بوت کنت۔
شھید سابرجان دیمتر ءَ وانت نہ کنت پہ کار ءُ زورگار ءِ واستا گوں وتی کس ءُ ھند ءِ گاڑی والا روت کلینڈر بیت لھتیں وھد گوں گاڑیاں گوں بیت کراچی ءُ مکران ءِ بازیں ھنداں تر ءُ تاب کنت اے ھمے وھد بیت راجی زرمبشت ءِ توار ءَ جھان ءَ سر ءَ زُرتگ اَت،یک نیمگ ءَ کبزہ گیر وتی مھکمی ءِ واستا بلوچ ءِ بازیں ھنداں لشکر کشی کنگ ءَ اَت ءُ دومی نیمگ ءَ بلوچ آجوئی ءِ مُلکاریں رھشون بلوچ سرڈگار ءِ رکینگ ءَ وتی سرڈگار ءِ بازیں پھناتاں مُچی مراگش کنگ ءَ اَت اَنت کوھلو ،کاھان ءَ بگر تاں مکران ءَ یک ھساب ءَ ایوک ءَ آجوئی ءِ توار ھر کُنڈ ءَ ھمک مردم ءِ گوشاں کپگ ءَ اَت، مزن ءُ کسان ءِ دپاں راجی رھشونانی نام اَت اَنت، رھشونے دپ ءَ پہ رَدی ھم اے گپّ دَر نیتکگ من راجی سروکے آں،مرچی وَ سروکاں جھان ءَ سر ءَ زُرتگ مَستری ءِ سر ءَ گوک میڑ بوگ ءَ اِنت، بازیں تاوان ءَ راجی جھد ءَ رس اِتگ اَنت، اگاں کسے تپاک کنت یا اناں، جھدکار بدل اِتگ اَنت، مات ءُ گھارانی ارسیگیں چَمّاں گندگ ءَ اَنت، کربان بوگ ءِ جزبگ تہ ءَ گیش ودّی بوتگ ۔
گوستگیں یاتے ! جنگولیں راجی آجوئی ءِ گل “بی ایل اے ” بی ایل ایپ ءُ بی آر اے ،سرمچارانی تیرانی توار ءَ جھان سر ءَ زُرتگ اَت، گڑا ھمک بلوچ ءِ دل ءَ سرمچاری ءِ واھگ ودّی کرتگ اَت ” شھید سابرجان پنام یاگی بلوچ ھمے وھد ءَ بی ایل ایپ ءِ کاروان ءَ ھوار بوگ ءَ سوبمند بیت ڈیھ ءُ راج ءِ پھازگ ءَ سلاہ بند بیت۔
انور ساھب ھان گوش اِیت ۔
“بالاچ سلاہ بندیں بالاچ نمیران اِنت “
“بالاچ مُدام کوھاں ھوکانی شکار ءَ کنت “
“سابرجان پنام یاگی بلوچ انچیں وش تب ءُ مسکرائی سنگتے اَت آئی ھرچ پیمیں مسکرایی بہ کرتیں ھما وڑیں اد ءَ ئِے کنگ ءَ گوں بَلد اَت وتی دیوان ءِ نشتگیں سنگت اش پہ کندگ لاچار کرتگ اَنت، گِندگ ءَ وَ باز سنگین ءُ بے تواریں سنگتے اَت، اگاں دیوانے ءَ ساڑی بوتگ، انچو پہ دیم ھبر ئِے نہ کرتگ، وتی دل ءِ ھبر ئِے دپ ءَ نیاؤرتگ اَنت آئی تنگ ءُ وشی تب ءَ را ھمک سنگت ءَ نہ ماراتگ ءُ اُوپارگ ءِ کوھنیں باتنی ءِ واھنند بوتگ ۔
ھبدہ کر ءَ دوھزار ءُ بیست ءُ یک لگوریں دژمناں سوب کُت” سابرجان پنام یاگی بلوچ ” جپاکشیں ” نوربکش پنام بالاچ بلوچ ءِ جَنائینتگ اَنت، راج ءِ دو سرمتابیں بَچ Bach پَچPach گپتگ! “سابر جان پنام یاگی ءُ نوربکش جان پنام بالاچ وتی دائمی جاھاں رپتگ ءُ مُدام نمیران اَنت ۔
گُڈسر ءَ وتی راج ءِ شھیدیں بچ شھید “سابر جان ءُ شھید نوربکش بلوچ ءَ اولی سالروچ ءِ درگت ءَ گوں ھزاراں آجوئی ءِ تمردیں شھیداناں سھرچکیں دروت ندر کناں ۔ بلوچ آجو بات ءُ آجوئی زندگ بات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔