نوکنڈی ءِ وئیل زوراک ءِ زوراکیانی گرانتریں مسال اِنت – ماما قدیر بلوچ

بلوچستان ءَ زورانسری آوار جنی ءِ ھلاپ ءَ توار چست کنوکیں گل وائس فار بلوچ مسنگ پرسنز ءِ رھشون مانا قدیر بلوچ ءَ چاگی ءِ دمگ نوکنڈی ءَ سیمسر ءَ ھواریں باپار کاریں ڈرائیورانی سر ءَ تیرگواری ءُ لَٹ ءُ کُٹ بلوچستان ءَ زوراک ءِ زوراکیانی کارمرد کنگ ءِ گرانتریں مسالے گُشتگ –

ماما قدیر بلوچ ءِ گوشگ اَت پاکستانی پوج ءَ ڈرائیور ءِ کوش ءُ پد ءَ پُر ایمنیں زھرشانی سر ءَ تیرگواری ءُ ڈرائیوراں ریگستان ءَ تھنا یل دیگ ءُ لَٹ ءُ کُٹ کنگ اے سکیں ءُ گرانیں درد اَنت – آئی ءَ گُشتگ ھمک آیوکیں روچاں زورانسری آوار جنی، نشانگی کوش، مھلوک ءِ کمشرپ کنگ ءُ کوشانی وئیلانی تہ ءَ گیشی اتکگ ءُ ترندی ءَ گیش کپان اَنت-

آئی ءَ گُشتگ نوکنڈی ءِ وئیل ءِ ھلاپ ءَ بلوچ یکجھتی کمیٹی ءِ نیمگ ءَ چہ باندا ساھت دو ءَ شال پریس کلب ءِ دیم ءَ زھرشانی کنگ بیت اِنت دراھیں تکاں بندوکیں مردماں دزبندی اِنت اے نا انساپیانی ھلاپ ءَ توار چِست بہ کن اَنت –

ھمے وڑ ءَ دومی نیمگ ءَ شال ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی بنجل ءُ چار ھزار ءُ شش سد ءُ چِل ءُ شش روچ سرجم بیتگ – چہ شال ءُ نصیب اللہ بلوچ، نظر بلوچ ءُ داد مھمد بلوچ بنجل ءَ اتکگ ءُ ھمدردی اش درشان کتگ-

ھمے وڑ تاج مھمد سرپرہ ءِ زورانسری آوار جنی ءَ بیست ءُ دو ماہ سرجم بیگ ءَ چاگردی رسانکجاھاں کمپئین ءِ ھلائینگے جار اش جتگ، تاج مھمد سرپرہ ءِ لوگ بانک ءِ جار ءِ رد ءَ ھژدہ اپریل ءَ تاج مھمد سرپرہ ءِ بیگواھی ءِ ھلاپ ءَ #ReleaseTajMumhammadSarparah ھیش ٹیگ کارمرد کنگ بیت اِنت-