نبشتانک: ٹی ٹی پی ءِ جھادی لوٹ
نبشتہ کار: شاری بلوچ
دی بلوچستان پوسٹ
رمس 13 اپریل 2022 ءَ چہ ٹرائیبل نیو ءِ اردو ءُ پشتو تندجاہ(website) ھوار نیکراھی جنگول ٹی ٹی پی(تحریک طالبان پاکستان) ءِ اُمر میڈیا ءِ تندجاہ ءَ پہ بلوچ راج ءِ نام ءَ یک تامُربندی کلوھے چاب بوت۔ ھمے تامُربندی کلوہ ءِ تہ ءَ نیکراھی ٹی ٹی پی ءِ جنگولی گل ماں بلوچی زُبان ءَ بلوچ راج ءَ پہ پاکستانی سرکار ءُ آئی ءِ پوج ءِ ھلاپ ءَ جھاد ءِ لوٹکی(داوت) دیگ ءَ اَنت کہ بلوچ راج ھم پشتون ءِ وڑ ءَ پاکستانی پوج ءُ ریاست ءِ زُلم ءُ زوراکیانی آماچ اَنت گُڑا باید انت کُشت ءُ کوش ءِ آماچیں بلوچ ھم پہ دُژمن ءِ پْروش دیگ ءَ گوں ٹی ٹی پی ءَ ھوار بنت۔
گُڑا چہ ٹی ٹی پی ءِ اے کلوہ ءِ چارگ ءُ دلگوش کنگ ءَ پد راج ءِ زانتکار ءُ سرپدیں مُردم ھیران بنت ءُ لھتیں سوال ھم چِست بیت انچوشکہ1- زاناں نیکراھی گل ٹی ٹی پی ءُ بلوچ راجدوست ءُ سرمچارانی پگر ءُ سسّا یک اَنت؟ 2- زاناں ٹی ٹی پی چہ آزادی لوٹوکیں بلوچ راجدوست ءُ سرمچاری گلاں ھاٹیگ دار ایت؟
3- سیمی جُست کہ بلوچ رھشُون ٹی ٹی پی داوت ءِ چے پسّو بہ دے اَنت۔
اے سے ئیں جُستانی تیار کنگ ءَ پیسر مارا نیکراھی جنگولی گل ٹی ٹی پی ءِ بابت ءَ کمیں زانگ لوٹ ایت کہ اِے ٹی ٹی پی چونیں سِلاھبندی گلے ءُ زاناں جنگی مول ءُ مُراد ئِے چے اَنت؟ گِند ئے 9/11 ویل ءَ پد اوگان تالبان ءِ ھلاپ ءَ امریکہ، نیٹو ءُ پاکستان ءِ جنگ ءِ آسر ءَ ٹی ٹی پی 2007 ءَ اڈ دیگ بیتگ۔ ایشی ءِ جنگی مول ءُ مراد، اوگانستان ءِ تہ ءَ اوگان تالبان ءِ وڑ ءَ، ماں پاکستان ءَ ھم اسلامی کانود ءُ رھبندانی(شرھی کانون) رواج دیگ ئیگ اِنت کہ نیکراھی رھبنداں پاکستان ءِ تہ ءَ ھر راجے ءِ آئی ءِ ھک برابری ءِ بُنیات ءَ بہ رس ایت۔چوناھا ٹی ٹی پی وت یکمُشتیں گلے نہ انت بلکیں ایشی ءِ تہ ءَ جماھت الھرار، ھِزبِ الھرار، الکائدہ، لشکرِ جنگوی ءُ ھاپز گُل بھار ءِ وڑیں بازیں گل ھوار اَنت۔ اگاں گِند ئے اے گل پاکستان ءِ پْروش وَ نہ لوٹ ایت بلکیں لوٹ ایت کہ پاکستانی یک راستیں اسلامی مُلکے بیت انچوشکہ اے وھد ءَ پاکستان ءِ آمیدگِس انگریزانی وڑ ءَ اَنت، بینک،زر ءُ کار ءُ باری ترامگیجاں(مالیاتی اداراھاں) سود ءِ رھبند اَنت، زِنا ءُ دِگہ بازیں چیزے ماں پاکستان ءَ البار اِنت۔ ٹی ٹی پی لوٹ ایت پاکستان ءِ تہ ءَ راجمستری(جمہوریت) ءُ آزات ھیالی مہ بیت، چوناھا پاکستان ءَ دْروگیں راجمستری انت۔ ھستیں وھد ءِ بُزدلیں کار ءُ باری پوج ھلاس کنگ ءُ نوکیں پوجے تیار کنگ بہ بیت ءُ پد ءَ ھمے گل پہ کشمیر ءِ آجوئی ءِ ھندوستان ءِ ھلاپ ھم جھادی اُرش بہ کنت۔ ٹی ٹی پی پاکستان ءِ ھلاپ نہ انت بلکیں پاکستان ءِ دْروگیں راجمستری، نااِنساپی، سرکاری رھبند، پاکستان ءِ مُلکار ءُ پوج ءِ ھلاپ اِنت۔ اگاں ما نیکراھی جنگول ٹی ٹی پی ءِ سسّا ءَ ھورت وان ایں گُڑا ما سرپد بَہ ایں کہ ٹی ٹی پی پہ پاکستان ءَ نیکیں واھگ دار ایت بلے پنجابی وت ٹی ٹی پی ءَ ھوار نہ انت یا گْوش ئے سک کم ھوار اَنت ئِے۔
البت بلوچ راجی آجوئی لوٹوکیں گھیگری گل چہ ٹی ٹی پی ءَ چَپ(اُلٹ) اَنت۔ بلوچ گوں پنجابی ءُ پاکستان ءَ ھچ وڑیں سْیادی یے نہ دار ایت پمیشکا بلوچ راج چہ 27 مارچ 1948 ءَ وتی راج آجوئی ءُ وتی ڈیھ ءِ وتواجھی ءَ جُھد ءَ اِنت۔ بلوچ یک آزاد ھیال ءُ راجمستری ءِ منّوگِریں چاگِردے دار ایت، بلوچ دود ءُ رواج ءِ رِد ءَ بلوچیت وت یک سرجمیں رھبندے ءُ نیکراھی بنی آدم ءُ ھُدا ءِ نیکراھی سْیادی یے پمیشکا گوں راجکاری ءَ نیکراھی ھچ وڑیں سْیادی نیست پمیشکا اولی جُست ءِ پسّو ھمےمیش اِنت کہ نیکراھی گل ٹی ٹی پی ءُ بلوچ راجدوست ءُ سرمچارانی پگر ءُ سسّا جُتا اَنت۔
ٹی ٹی پی ءِ جنگول گیشتری ءَ پشتون مُلا اَنت۔راجدوستییں پشتون ھم ٹی ٹی پی ءِ ھلاپ اَنت یا گُل ھان اَنت۔ ٹی ٹی پی اے وھد ءَ تھنا وزیرستان ءُ باجوڑ ایجنسی ءِ دمگ ءَ زورآور اِنت۔ دومی 2019 ءَ کُنڑ ولایت ءَ ٹی ٹی پی ءِ جان ندری (suicide attackers) بُنجاہ ءِ سر ءَ امریکی ناھُدائیں بالیگراب(Drone) ءُ اُرش کُت ءُ 200 جان ندری ورنائیں جنگول کُشتگ اَنت پمیشکا مرچاں ٹی ٹی پی ءِ کِر ءَ ھمے آسراتی نیست۔
البت بلوچ راجی سرمچار یک دو دمگ ءَ وَ اِنّا بلکیں سرجمیں بلوچستان ءَ جنگ ءَ اَنت ءُ سرجمیں بلوچ راج توری دُنیا ءِ ھر کُنڈے ءَ بہ بنت وتی راجی سرمچارانی سر ءَ پھر ءُ ناز کن اَنت۔ بلوچ راجی آشوب بلوچستان ءِ ھر میتگ ءُ ھنکین ءَ سر بوتگ۔ دُنیا ءِ دیم ءَ بلوچ راج ءِ سِلاھبندیں جُھد یک آزات ھیال ءُ وتوجھی ءِ جُنزے زانگ بیت بلے ٹی ٹی پی یک دھشت گردی پجّارے دار ایت۔ بلوچ سرمچارانی مجید برگیڈ ءَ جان ندری ورناھانی کمی نیست۔ بلاھیں گپ ایش اِنت کہ مرچیگیں اوگانستان گوں اوگان تالبان ءِ سرکار ءَ چہ 1990s ءِ اوگانستان ءَ جُتا اِنت۔ مرچی ماں اوگانستان ءَ چہ پاکستان ءِ ایردستیں بلوچستان ءَ لڈّ ءُ بوج بوتگیں بلوچاں اوگان تالبان تکانسر نہ کنگ ءَ انت۔ بِندات ءَ داھیش ءِ شک ءَ کابُل، ھلمند ءُ نمروز ءَ اوگان تالبان ءَ لھتیں بلوچ دزگِیر کُتگ اِت اَنت بلے پد ءَ بانُک نائلہ کادری ءُ واجہ بشیر زیب ءِ جُھداں بلوچ یلہ کنگت بوت اَنت ءُ نی اوگان تالبان ھم بلوچاں تکانسر نہ کن اَنت۔
بزاں بلوچ سرمچار چہ ٹی ٹی پی ءَ زورآمد ءُ ھاٹیگی اَنت پرچاکہ بلوچ راج ءِ تہ ءَ ھمے سرپدی ھست کہ اے سرمچار راجی آجوئی ءِ بامرد اَنت پمیشکا سرمچارانی یک شرپے ھست۔ باید اِنت ٹی ٹی پی ءَ پسّو دیگ بہ بیت کہ اگاں شُما پہ پاکستان ءِ تہ ءَ اسلامی رھبنداں آرگ ءُ اڈ دیگ لوٹ اِت گُڑا وتی جنگولی گل ءَ پنجابیاں گیشتر ھوار بہ کن اِت ءُ پد ءَ وتی جھاد ءَ پنجاب ءِ مزنیں شھر لاھور، سیالکوٹ، پیسل آباد، مُلتان، گجرانوالہ، راولپنڈی ءُ اسلام آباد ءَ سر بہ کن اِت کہ چہ شُمئے جنگ ءَ یکشل ءَ تھنا پشتون مرگ ءُ پشتون شھر ءُ میتگ تباہ بوگ ءَ اَنت۔ اگاں پنجابی ھوار نہ بوگ ءَ اَنت یا شُمئے جھادی جنگ پنجاب ءَ سر بوگ ءَ نہ اِنت گُڑا باید انت وتی سوڑگ ءَ بدل بہ کن اِت ءُ پہ وتی سرڈگار پشتونستان ءِ آجوئی ءَ پاکستانی سرکار ءُ پوج ءِ ھلاپ ءَ جنگ بہ کن اِت۔ چوناھا ما دْراہ (پشتون، تاجک، اُزبک، بلوچ) دْراہ اوگان ایں۔ کابل ءِ دمگدار بلوچ، ولایت ھلمند ءُ ھرات ءِ گورنر ھم بلوچ، بلوچ ولایت نمروز ءِ گورنر پشتون ءُ دگہ بازیں درور بزان اے دْراہ بلوچ ءُ پشتون ءِ سْیاد ءُ نزیکی ءِ نشانی اَنت۔ بلوچ راج ءِ آجوئی ءِ جنگ چہ شما گیشتر جْوان انت ءُ ما چہ 1948 ءَ یکشل ءَ پنجابی پوج ءِ زُلم ءُ زوراکیانی آماچ ایں۔ مئے سر ءَ بیتگیں زلم ءُ زوراکی ءَ پاکستان ءُ پنجابی ءِ ھلاپ ءَ نپرت ودی کُت ءُ نپرت مارا تھنا آجوئی ءِ نیمگ ءَ بارت۔
شالا بلوچ راج پہ وتی راجی آجوئی ءَ یکمُشت ءُ تباک بہ بات اَنت بلوچستان ءُ اوگانستان زِندگ بات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔