گورکوپ ءَ سُھرک ءِ نادراھی ءِ تالان بوھگ ءَ بازیں زھگے نادراھی آماچ

بلوچستان ءِ دمگ کیچ گورکوپ سری کلگ ءَ سُھرک ءِ نادراھی تالان بوھگ ءَ یکیں کھول ءِ بازیں زھگے نادراھی ءِ آماچ بوتگ – نادراھی ءِ آماچ بوتگیں زھگانی کھول ءَ سرکار ءُ واکداراں کمک ءُ زھگانی الاج کنگے لوٹ کتگ –

دمگی اھوالکارانی رِد ءَ پیش ءَ اے مردماں کوھی دمگاں دلوت چارینتگ انت بلے دو سال ساری پھازگی لشکر ءَ آودا چہ پاد کُتگ ءُ سری کلگ ءَ دیم داتگ انت –

ھالانی رِد ءَ اے کھول سُھرک ءِ نادراھی آماچ انت نادراھی نوں سک باز تالان بوھگ انت – اے نادراھی ءَ آماچ بوتگیں بازیں مردمے تربت سول ھسپتال ءَ شُتگ انت بلے گریبی ءِ سوب ءَ اے مردم وتی الاج کُت کنگ ءَ نہ انت –

دمگی مردمانی گوشگ انت کہ دمگی واکدار بائدیں سُھرک ءِ نادراھی ءَ چہ رککگے ھاتر ءَ ریسکیو دیم بہ دنت ءُ آھانی کمک ءَ بہ کنت اگاں ناں اے نادراھی دگہ دمگاں ھم شنگ ءُ تالان بیت انت –

زانگ بہ بیت گورکوپ ءَ ھوار کیچ دگہ بازیں دمگاں جاندراھی ءِ سھولت نہ بوھگے سوب ءَ مردم تربت آرگ بنت بلے پدا ھم بازیں مردمے تربت ءَ ھم اتک کرت نہ کنت ءُ مرگ ءِ دیمپان بیت –

زانگ بہ بیت گوست ءَ بلوچستان ءِ بازیں دمگاں سھرک ءِ نادراھی تالان بوھگے ھال مدامی آھگ ءَ انت کہ آھانی تہ ءَ گیشتریں کچ زھگانی انت –

زانتکارانی گوشگ انت کہ اے نادراھی ڈکال ءُ ھور نہ بوھگے سوب ءَ دنزءُ آڈھوراں چہ پیداک بیت اِنت کہ نزور ناتوانیں زھگ زوت اے نادراھی آماچ بنت –

ھردے کہ زھگ اے نادراھی آماچ بوت انت گڈا ترندیں اینٹی بائیوٹیک درمان زھگاں دیگ بیت گڈا اے نادارھی ھلاس بیت ءُ درمانانی کورس سرجم کنگ المی انت –

چاگردی مردمانی گوشگ انت کہ بلوچستان ءَ جاندراھی درگت ءَ ھچ وڈیِ سھولت نیست – ھر ملکانی تہ ءَ سھرک ءِ نادراھی ارزانی ءَ بیت اِنت بلے بلوچستان ءِ تہ ءَ اے وڈیں نادراھی زھگانی مرگ ءِ سوب جوڈ بوھگ انت –