نوکیں سرکار ءِ آھگے اولی روچ ءَ بیست ءُ دو مردم آوار جنگ بوتگ انت – ماما قدیر بلوچ

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ شش سد ءُ چِل ءُ چار روچ سرجم بوتگ انت – بلوچستان ءِ دمگ دالبندین ءَ سیاسی ءُ چاگردی باسک محمد ایوب بلوچ، درمحمد بلوچ ءُ دگہ مردماں بنجل ءَ اتکگ ءُ بیگواھیں مردمانی گوم یَ دلپدردی درشانتگ –

ھمے وھد ءَ گل ءِ کمک سرکماش ماما قدیر بلوچ ءَ اتکگیں مردمانی میان ءَ وتی ھیال درشانتگ ءُ گوشتگ کہ بلوچستان ءِ دمگ کیچ گومازی ءَ گوستگیں شپ ءَ پاکستانی پوج ءَ بیڑ برتگ ءُ زوراکی کنان ءَ ھپت مردم زورانسری آوار جتگ ءُ بیگواہ کتگ انت – زورانسری آوار جنگ بوتگیں مردمانی پجار محبوب ء شیران، شعیب ء محمد شاہ ، واجد ء واحد، واجد ء اکبر ، فرید ء یونس، مبارک ء دلمراد ءِ ناماں چہ بوتگ انت –

آئی گوشتگ کہ دمگی مردمانی رِد ءَ اے مردم پیسر ءَ ھم پاکستانی پوج ءَ آوار جتگ ءُ پد ءَ یل داتگ انت –

ماما قدیر بلوچ ءِ گوشتگ کہ دو روچ ساری پاکستانی پوج ءَ پانزدہ مردم گومازی ءَ چہ زورانسری آوار جتگ ءُ بیگواہ کتگ انت کہ آھانی تہ ءَ نوہان ء اختر، سیٹ عمر ،ندیم ء عمر ،داؤد ء سلیمان پجار بوتگ ایندگرانی تنی وھدی نام ءَ دیم ءَ نہ اتکگ انت –

آئی ءَ گوشتگ کہ بیست ءُ دو مردم ھما روچ ءَ آوار جنگ بوتگ کہ نوکیں سرکار سوگند ءِ ورگ ءَ بوتگ – ھمے مردم کہ اپوزیشن ءَ بوتگ انت بیگواھیں مردمانی ھاتر ءَ گپ جنگ ءَ دم ءِ نہ بُرتگ –

ماما قدیر بلوچ ءَ گوشتگ سوگند ءِ ورگ ءَ پد نوکیں مزن وزیر ءَ وتی تران ءِ تہ ءَ بیگواھیں مردمانی ھاتر ءَ یک لپز ءِ ھم نگوشتگ کہ چریشی ءَ بیگواھیں مردمانی کھول ڈالچار بوتگ انت – آھانی ھمے امیت بوتگ کہ نوکیں سرکار کئیت گڈا درساں پیش بیگواھیں مردمانی درگت ءَ گپ جنت کہ بلوچانی آوار جنی لشکر کشی ءُ جونانی چگل دئیگ بند کنگ بیت اِنت ءُ بیگواھیں مردم یل کنگ بنت – بلے بیگواھیں مردمانی کھول ءَ یکرندے پدا دلگوش گوں اقوام متھدہ ءُ انسانی ھکانی ادارھانی نیمگ ءَ کتگ –