بلوچستان ءَ لشمینا ءِ نادراھی تالان بوھان انت

بلوچستان ءَ لشمینا ءِ نادراھی ءَ سک باز تالان بوھگ ءَ انت وھدیکہ جاندراھی ادارھاں ڈبلیو ایچ او ءَ چہ کمکے لوٹ کُتگ –

بلوچستان جنرل ہیلتھ ءِ ڈائریکٹر ڈاکٹر نور محمد قاضی ءِ گوشگ انت کہ بلوچستان ءَ لسشمینا ءِ نادراھی تالان بوھان انت ءُ اے وھدی شانزدہ دمگاں اے نادراھی تالان بوتگ ءُ لشمینا ءِ شانزدہ ھزار ءُ پنچ سد نادراہ رجسٹر بوتگ انت –

ڈی جی ہیلتھ ءِ گوشگ انت کہ لشمینا ءِ الاج ءِ ھاتر ءَ انجکشن لوٹیت کہ بلوچستان ءَ ھوار سرجمیں ملک ءِ تہ ءَ نیست اِنت – یک نادراھے ءِ سرجمی الاج ءِ ھاتر ءَ بیست انجکشن لوٹ کپیت – جانسلامتی ءَ ڈبلیو ایچ او ءَ چہ لوٹ کتگ کہ انجکشن ءِ کمک کنگ بہ بیت ءُ اشی ءِ ھمراھی ءَ جانسلامتی ءِ بنشون ءَ انجکشن ءِ زورگے ھاتر ءَ سوبائی سرکار ءَ فنڈ دیگے ھاتر ءَ سمری دیم داتگ –

اے نادراھی مکسک ءِ ورگ ءَ چہ پیداک بیت اِنت ھما جاہ ءَ کہ مکسک وارت ٹپ بیت اِنت – زانوگرانی گوشگ انت اشی ءِ الاج گران انت ءُ ویکسین ھم شوھاز نہ بوتگ ءُ اے بیماری ناسی رنگیں مکسک ءِ ورگ ءَ تالان بیت – اے مکسک گندگ ءَ ھنچیں مکسکانی وڈا انت بلے مردمانی جان ءَ اشی ءِ زھر تالان بنت – مکسک ءِ ورگ ءَ ھما دمان ءَ آئی ءِ آسر دیم ءَ نیا انت بلکیں مکسک ءِ ورگ ءُ پدا دانگے درآھگ ءَ دو چار ماہ لگیت اِنت –

وھدیکہ یک برے دانگ زاھر بیت گڈا دانگ مزن بوھان بیت چریشی ءِ سوب ءَ پوست ھُشک بوھان بیت ءُ اشی ءِ سر ءَ ھچ وڈیں ملم لوشن یا کریم کار نہ کنت –