گوادر ءَ کوسٹ گارڈ کارندھاں دمگی پوریاگر لَٹ کُٹ کتگ ءُ ڈیزل برتگ اَنت

بلوچستان ءِ تیاب دپی شھر گوادر ءِ سیمسری دمگ کنٹانی ءَ مروچی پاکستان کوسٹ گارڈ ءِ کارندھاں ڈیزل کار ءَ گوں بندوکیں دمگی پوریاگر لٹ ءُ کُٹ کتگ اَنت-

دمگی اِھوالکار ءِ رِد ءَ دمگی مردم زمینی ءُ زری راھاں کارمرز کن اَنت ایران ءَ چہ وتی زندگی زرورتیں چیزاں کار اَنت- بلے پاکستانی ایف سی ءُ کوسٹ گارڈ دگہ واکدارانی نیمگ ءَ یکپیم ءَ آیاں گر اَنت ءُ بر اَنت-

دمگی مردماں گْوشتگ کہ سیمسر ءَ نندوکیں مردمانی کار ءُ بار کرناں چہ تھنا سیمسری کار ءُ بار اِنت ،کہ اود ءَ مردم پوریاگری کن اَنت وتی زند ءَ تیلانک دے اَنت-

آئی ءَ گْوشتگ کہ سرجمیں جھان ءَ سیمسری دمگاں نندوکیں مردماں کار ءُ بار جوانیں وڑے ءَ رس اِیت- بلے مئے سیمسر ءَ نندوکیں مردم پہ نان چُنڈے ءَ تلوس اَنت-

دمگی مردماں کوسٹ گارڈ کنٹانی سیمسر ءَ کار ءُ بار پابندی جتگ ءُ راج چہ روزگار ءَ زبھر کتگ – کنٹانی سیمسر ءِ بند بوگ ءَ چہ راج ازیت ءِ دیمپان اِنت- راج سر ءَ زُلم بند کنگ بہ بیت – مئے لوٹ اِنت کہ کنٹانی ءَ ٰڈیزل ءَ ھوار دگہ زندگی ءِ زرورتاں سرجم کنگ ءِ موکل دیگ بہ بیت-

ھک دے تھریک ءِ سروک مولانا ھدایت الرحمان بلوچ ءَ کنٹانی ھور ءَ کوسٹ گارڈ کارندھانی نیمگ ءَ چہ پوریاگرانی سر ءَ لَٹ ءُ کُٹ اے رویشگ ایر جتگ ءُ گْوشتگ کہ کوسٹ گارڈ کارندہ وتی رویشگ ءَ شر بہ کن اَنت-

دومی نیمگ ءَ باندا گوادر ءَ وئیل بگیری ءَ زھرشانی ئیں روانکے کشگ بیت-