شال ءَ بیگواھیں مردمانی ھاتر ءَ زھرشانی برجاہ

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چارھزار ءُ شش سد ءُ بیست ءُ ھشت روچ سرجم بوتگ انت ءُ زھرشانی بنجل ءَ بیگواھیں مردمانی کھول ءُ گل ءِ سرکماش نصراللہ بلوچ ءُ کمک سرکماش ماما قدیر بلوچ ساڑی بوتگ انت – مروچی بی ایس ایف شال ھنکین ءِ سرکماش ظفرواحد، سی سی باسک گل حسن بلوچ ءُ انفارمیشن سیکریٹری معراج لال ءَ بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشانتگ –

ھمے وھد ءَ ماما قدیر بلوچ ءَ گوشتگ کہ بازیں مردمے ھمے گوشگ انت کہ زورانسری آوار جنگ بوتگیں مردم بوت کنت شھید کنگ ءُ چگل دیگ بوتگ انت اے درگت ءَ گوستگیں سرکار ءِ درشان مئے گمان ءَ باور کنائینگ انت کہ بلوچستان ءَ بازیں بیگواھیں مردمے آزار جاھاں کشگ بوتگ انت –

آئی ءَ گوشتگ اے ھم ما اشکتگ کہ بازینے کل کنگ بوتگ کہ اے درگتءَ بلوچ راج ءَ زھرشانی ھم کتگ سرجمیں دنیائے انسانی ھکانی ادارہ ایمنی ءُ ھک ءُ جمہوریت منوک بلوچ چکچینی ءِ نیمگ ءَ دلگوش کنائینتگ انت ءُ میاں استمان نیمگ ءَ اے زوراکی ءُ کتکاری ایرجنگ بوتگ انت ءُ اشی ءِ دارگے لوٹ ھم کتگ بلے پاکستان ءِ رسانکدر ءُ مزھبی پاٹی ءُ رھشوناں ھچ نگوشتگ ءُ وت ءَ دور داشتگ –

آئی ءَ گوشتگ لھتے یکجاھیں کبر ھم شوھاز کنگ بوتگ شال تیرہ میل، کراچی مواچ ءَ گمنامیں کبرستان ءَ دست کپتگیں جوناں چہ بیگواھیں مردمانی کھول چدوگیشتر بے کرار ءُ اندوھانی دیمپان بوتگ انت –

آئی ءَ گوشتگ کہ سرجمیں بلوچ راج پدرد انت ءُ زھرشانی کنگ ءَ اِنت بلے پاکستانی سرکار ءَ ھوار نام وتگڑیں سول سوسائٹی بلوچ راج ءِ چکچینی ءَ شر لیک انت پرچاکہ ناکہ بلوچانی زورانسری آوار جنی ءُ زانگولیں جونانی دست کپگ بند بوتگ ناکہ اے دردناکیں وئیلاں ھواریں ریاستی کارندہ ءُ اھانی زرزیرانی بگیری ءَ گامگیج زورگ بوتگ –