آزمانک:جُھد ءِ مُز اَلم رس ایت
آزمانکار: کادر ھسرت
دی بلوچستان پوسٹ
ابدین یک شریں ءُ گربیں پتے ءِ چک اَت، ابدین ءِ پت کَور ءَ شت دار چِت ءُ بھا کت ءُ ابدین ئِے وانگ ءَ روان دات- ابدین ھردینکہ وانگجاہ ءَ شت وانگجاہ ءِ بچکاں ابدین ءَ را کلاگ بست۔ چی ءَ کہ! ابدین ءِ گُد در اتگ اِت اَنت ءُ مود ئِے مزن اِت اَنت- ابدین ءِ گور ءَ امینچو زر نیستگ اَت کہ پہ وت ءَ گد بہ گپتین ئِے۔ وھدے کہ موکل (چھٹی) بوتیں گُڑ لوگ ءَ شت گریت ءُ گْوشت ات ئِے “ابا من نہ وان آں پت ءَ جست گپت “منی چُک تو چی ءَ نہ وان ئے؟” ابدین ءَ پسو دات “ابا من ھردینکہ وانگجاہ ءَ رو آں گُڑا وانگجاہ ءَ بچّک من ءَ کلاگ بند اَنت کہ تئی گُد لیگار ءُ دراتگ اَنت تئی مود مزن اَنت من ءَ چوشں دوست نہ بیت من ھم کا آں تئی گون ءَ کَور ءَ من ءُ تو یکجاہ دار چن این ءُ بھا کن ایں”
بلے ابدین ءِ پت ءَ آئی ءِ ھبر گوش نہ داشت اَنت، گپ ئِےاینگو آنگو کت۔ ابدین چہ اے گپ ءَ بے ھال بوت دومی روچ کہ بوت ابدین وانگجاہ ءَ شت۔ بچک ابدین ءَ کلاگ بندگ ءَ لگ اِت اَنت ابدین ءَ زھر کت وانگجاہ ءَ چہ وانگجاہ آتک کَور ءَ یک کھیرے ءِ ساھگ ءَ نشت۔ ابدین ءِ پت ءَ چہ کور ءَ دار چتگ ءُ ھمے کَشک ءَ پیداک اَت۔ وھدے کہ چم ئِے ابدین ءَ کپتگ اجکہ ءُ ھیران بوت کہ اے منی چُک ابدین اِنت اے گرم ءِ جَل ءَ کَور ءَ چے لوٹ ایت؟ ابدین ءِ پت ءَ وتی گام تیز کت اَنت ءُ آبدین ءِ کِر ءَ آتک ءُ جُست گپت “منی چُک ترا چون اِنت تو اے گرم ءِ جل ءَ اے کھیر ءِ ساھگ ءَ نشتگ ئے؟ من ترا وانگجاہ ءَ دیم داتگ اَت بَلے تو اد ءَ ملور ملور ئے” ابدین ءَ گوں ارسیگیں چمّاں درائیبت “جی ھو ابا تو من ءَ وانگجاہ ءَ دیم داتگ اَت بَلے من شت آں ھما روچی ئیں وڑ ءَ مرچی پد ءَ وانگجاہ ءِ مردماں من ءَ کلاگ بست کہ تئی گُد درتگ اَنت تو گریبے ئے ابا زاناں گریب بوگ گناھ اِنت-
پت ءَ تسلہ دیان ءَ گْوشت “منی چُک بلوچی ءِ گپے جن اَنت کہ کچک وک ایت کاروان وتی راہ ءَ روت ایشی ءِ بزانت ایش اِنت کہ یک مردمے اگاں جھد کنگ ءَ اِنت پہ وتی آیوکیں باندات ءِ رکینگ ءَ آئی ءَ لازم مردم ایر جن اَنت وڑ وڑیں ھبر گْوش اَنت ئِے بَلے آ مردم ءَ کہ چادر ماں کوپگ ءَ کتگ پہ وتی منزل ءِ شوھازگ ءَ درآتکگ آ سِلیں مردمانی بے مکسدیں گپاں ڈالچار کنت ءُ دیم ءَ جنزان کنت، تو ھم ھما مردمانی لڑ ءَ شمار ئے تو ھم سِلیں مردمانی گپاں یلہ بہ کن بس وتی منزل ءِ درگیجگ ءِ واب ءَ بہ گند، اے وَ تچکیں گپے منی چُک کہ تو شریں نامے ئے واھند بوگ لوٹ ئے گڑا ترا وڑ وڑیں مردم شگان ءُ بھتام جن اَنت بَلے ترا آیانی سَلیں گپ گوشدارگی نہ اَنت ترا وانگی اِنت بہ وان یک راجدوست ءُ زبان دوستیں مردمے جوڑ بہ بو ءُ پد ءَ ھما مردماں کہ ترا ایر جتگ ھما مردماں پیش بہ دار کہ یک تنگ دستیں پتے ءِ چُک ھم دیمروئی کت کنت-
ابدین ءَ کہ پت ءِ گپ اِشکت اَنت سک گل بوت پِت ئِے ھمباز اِت دیم پہ لوگ ءَ رھادگ بوت اَنت
ھمے وڑ ءَ روان بوت ابدین ایندگی روچ ءَ وانگجاہ ءَ شت ابدین ءَ کلاگ بندگ ءَ لگ اِت اَنت بَلے اے رندی ابدین ءَ بچکندگے جت ایشانی گپ ئِے ڈالچارکت اَنت۔
یک روچے ابدین ءِ پت نادْراہ بوت گُڑا ابدین ءَ را لوٹائینت ئِے ءُ وتی کش ءَ نادینت ئِے۔ پد ءَ گپ ءَ لگ اِت “منی چُک من وتی زند ءِ روچ گْوازینتگ اَنت من نہ زان آں داں چُنت روچ ءَ من زندگ باں بَلے منی یک گپے گوش بہ دار ھرچ وڑیں گم ءُ رنج بیا اَنت ترا وتی وانگ یلہ کنگی نہ اِنت اگاں من مُرت آں تو کَور ءَ رو ئے دار چِن ئے یا کہ بڈ ءِ مزدوری کن ئے بَلے ترا وتی اے جُھد برجم دارگی اِنت بید ءِ وانگ ءَ تو یک کورے ءِ وڑ ءَ بہ ئے انچوشکہ پہ کور ءَ سرجمیں دگنیا تھار اِنت۔ ھمے وڑ ءَ ابید ءِ وانگ ءَ انچوش بہ لیک تو ھم ھمے کور ءِ داب ءَ ئے” دو ماہ ءَ پد ابدین ءِ پت ءَ دگنیا بدل کت ابدین ءَ وتی جھد برجم داشت گم ءُ رنجانی دیمپان بوت برے کَور ءَ دار چِت ئِے ءُ برے لِچکاری کت ئِے وتی وانگجاہ ءِ زر پورا کت اَنت ئِے وتی جُھد برجم داشت ئِے۔ لھتیں سال ءَ پد ابدین ءِ جُھد یک انچیں رنگے آؤرت کہ آ یک شریں نامے ئے واھند بوت ھما مردماں کہ وانگجاہ ءَ ابدین ءَ را ایر جتگ اَت ھما مردم وازمندگ بوت اَنت ئِے۔ ابدین ءَ یک شریں ءُ مالداریں مردمے ءِ گور ءَ وتی باج برت آیاں ابدین ءِ شری ءُ سیری دیست سانگ ءَ رازی بوت اَنت۔ ابدین ءَ سور کت یک شریں زندے گْوازینگ بندات کت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔