گڈانی: بلوچ زِر ءِ پھازگے ھاتر ءَ دمگی زالبولاں زھرشانی کتگ

بلوچستان ءِ دمگ لسبیلہ ءِ تیاب دپی ھند گڈانی ءَ زالبولاں زھر شانی کتگ –

زھرشانی ءِ رھشونی کنوکیں ناموریں زالبول چاگردی رھشون لال بی بی ءِ گوشگ انت کہ بلوچستان کوسٹل ڈپولپمنٹ (بی سی ڈی اے) نیمگ ءَ چہ دریا وردانی گوم ءَ زلم کنگ ءُ آھانی ھک جنی ءُ زِر ءِ سر ء کبزہ ءِ بگیری ءَ اے زھرشانی برجاہ انت –

لال بی بی ءِ رھشونی ءَ گڈانی پارک ءِ نزیک ءَ بازیں روچ ءِ بیت کہ زھرشانی برجاہ انت کہ اودا دمگی زالبول مزنیں کچ ءَ ھوار انت –

ھمے وھد ءَ لال بی بی گوشتگ کہ گڈانی بی سی ڈی اے ءِ گنڈی گردی ءُ کبزہ گیری مئے سمج ءَ ڈن انت –

آئی ءَ گوشتگ کہ یک بے نپیں جیٹی ءِ سوب ءَ سرجمیں زر ءِ سر ءَ کبزہ کنگ دریا ورداں چہ اودا درکنگ پدری گپ ئے ما اشی ءَ ایرجنیں –

لال بی بی ءِ گوشتگ گڈانی جیٹی ءِ جوڈ بوھگ ءَ چہ ھما پیسری جیٹی وت پہ دریا ورداں شرتر بوتگ – اے جیٹی ءِ جوڈ کنگ یک وڈے چاردیوالی ءِ جوڈ کنگ انت کہ چریشی ءَ دریا ورد سک باز دلسیاہ انت – نوں نوبت اے جاہ ءَ اتکگ ءُ سربوتگ کہ دریا ورد پابند کنگ بوھگ ءَ انت ھمے گوشگ بوھگ انت کہ شما وتی لانچاں جیٹی ءِ کش ءُ کراں ھڈ مہ کنیت ءُ گوات ءِ سوب ءَ ھم جیٹی ءِ نزیک ءَ میاریت بلکنہ ءَ چہ جیٹی ءَ دور بہ بریتے ـ دریا وردانی گوم ءَ اے بلاھیں زوراکی یے –

آئی ءَ گوشتگ کہ بی سی ڈی اے دریا ورداں چہ وتی جندے زر ءَ در کنگ لوٹیت کہ ما ھچبر اشی ءِ موکل ءَ نہ دئیں –