بلوچستان ءَ پوجی پانگس ءُ بنجلاں چہ لس مھلوک دلسیاہ

بلوچستان ءِ گیشتر ھند ءُ دمگاں پھازگی لشکر ءِ سنگر ءُ بنجل ءُ پانگساں لس مھلوک سک باز دلسیاہ کُتگ –

بازیں وھد ءَ سیاسی گلاں ایف سی ءُ پھازگی لشکر ءِ دمگانی تہ ءَ ساڑی بوگ ءِ بگیری ءَ زھرشانی ھم کُتگ –

بلوچستان ءِ تیاب دپی دمگ گوادر ءَ ھمے زوتاں چِست بوتگیں زرمبشت ءِ بنکی لوٹانی تہ ءَ ھم ھمے لوٹ ھوار بوتگ کہ بازار ءُ کوچگانی پھازگی لشکر ءِ پانگس ھلاس کنگ بہ بنت –

بلوچستان ءَ آجوئی لوٹوکیں سلاہ بندیں گلانی پاکستانی پوج ءِ سر ءَ اُرشاں پد پسوی تیرگواری یا گولہ باری ءَ بازیں مردمے زدگ ءُ بیران بوتگ انت کہ وھد وھد ءِ سر ءَ آھانی ھال دیم ءَ اتکگ انت –

ھمے سال ءِ دو فروری ءَ بلوچستان ءِ دمگ پنجگور ءِ بازار ءَ برجاھیں ایف سی ءِ بنجاھی بنجلے سر ءَ بلوچ لبریشن آرمی ءِ مجید برگیڈ ءِ سنگتانی کبزہ ءِ میان ءَ پھازگی لشکر ءَ آپریشن ءِ میان ءَ بازیں گولہ ءِ آس داتگ کہ لس مھلوک ءِ گسانی سر ءَ کپتگ انت –

ھمے میان ءَ چتکان ءِ جھمنند وفا بلوچ ءِ گِس ءِ سر ءَ ھم یک گولھے کپتگ کہ چریشی ءَ آئی ءِ جنکوے ءِ سک باز زدگ بوتگ ات کہ تنی وھدی آئی ءِ الاج بوگ ءَ اِنت –

دی بلوچستان اھوال پتر ءَ سربوتگیں ھالانی رِد ءَ کیچ ءِ کوھی دمگ زامران ناگ ءَ برجاھیں ایف سی بنجل ءَ چہ مردم سک باز دلسیاھی ءِ آماچ انت –

دمگی مردم ءَ دی بلوچستان پوسٹ ءِ اھوالکار ءِ گوم ءَ تران کنان ءَ گوشتگ کہ کوہ ءِ سر ءَ پوجی پانگس ءِ سوب ءَ شپ ءَ زالبول ڈن ءَ وپت نہ کناں ءُ کدی کدی رژناھیں لینٹ ھم چالو کن انت مھلوک ءِ گِساں لینٹ جن انت –

ھمے وڑ ءَ بلیدہ ءِ دمگ الندور گلی مردماں ھم شکایت کُتگ آھانی گوشگ انت اے جیڑھانی سر ءَ بلوچستان اسمبلی ءِ تہ ءَ نشتگیں راجدوستیں پاٹیاں ابید اسمبلی ءَ چہ ڈن نشتگینانی کرد ءَ چہ مھلوک ستک نہ انت –

گوادر ءَ دریاوردانی زرمبشت ءُ نندانک ءِ میان ءَ شھر ءُ بازاراں گیرکانودی پانگسانی ھلاس کنگ ءِ لوٹ سوبائی سرکار ءَ منّ اِتگ بلے آئی ءِ سر ءَ گامگیج زورگ نہ بوتگ بس یک دو لیوز ءِ پانگس چِست کنگ بوتگ انت-

پنجگور ءَ گوستگیں روچاں سول ھسپتال ءَ رؤکیں دگ سیکورٹی ءِ سوب ءَ بند کنگ بوتگ چریشی ءَ دمگی مردم ءُ نادراھ سک باز پریشان بوتگ انت –

اے درگت ءَ بلوچستان نیشنل پاٹی پنجگور ءِ جارکش ءَ وتی درشان ءَ گوشتگ کہ ایف سی بنجاھی بنجل باپاری ءِ بنجاہ ءَ انت ءُ اودا مردم ھم نندوک انت ڈسٹرکٹ ہیڈکوارٹر نادراھجاہ ھم بازار تہ ءَ اِنت – بازار ءَ رؤگے ءِ مستریں دگ چہ ایف سی ءِ بنجلے دیم ءَ چہ گوزیت ھمک روچ اے دگ ءِ بند کنگ چہ ءَ بازار ءَ ٹریفک جام بیت اِنت چریشی ءَ بازار ءَ رؤکیں مردم ءُ نادراھ سک باز دلسیاہ انت دنیا ءِ تہ ءَ ھچ جاہ پوجی بنجل مھلوک ءِ نندجاہ ءُ باپاری دمگاں نہ انت –

بی این پی ءِ جارکش ءَ بلوچستان ءِ سر وزیر، آئی جی ایف سی ءُ آرمی چیف ءِ اسٹاف چہ لوٹ کتگ پنجگور ءِ ایف سی بنجل شھر ءَ چہ ڈن برگ بہ بیت ءُ لس مھلوک چہ اے ازاب ءَ رکینگ بہ بیت تاں ھما وھد ءَ بنجل بازار ءَ چہ ڈن برگ نہ بیت ھما وھد ءَ تاں اے دگ ھم بند کنگ مہ بیت –

کیچ ءَ سیمسری دمگ مند ءَ برجاھیں ایف سی ءِ بنجاھی بنجل ءَ چہ ھم مھلوک دلسیاہ انت کہ ا ھم دمگے تہ ءَ انت –

سورو ءِ دمگی مردماں ھم چہ سرکار ءَ لوٹ کتگ کہ ایف سی شھر ءَ چہ ڈن برگ بہ بیت –

بلے تنی وھدی لس مھلوک ءُ سیاسی پاٹیانی ءِ شکایت ءُ زھرشانیانی چہ پوج ءِ نیمگ ءَ ھچ وڈیں گپ دیم ءَ نہ اتکگ –