تمپ: گومازی فٹبال ٹورنمنٹ ءِ فائنل گوازی حمّل ظفر گومازی ءَ وتی نام ءَ کُتگ

حمل ظفر آل ڈسٹرکٹ ناک آؤٹ فٹبال ٹورنمنٹ ءِ فائنل گوازی ساچان سلالہ تربت ءُ حمل ظفر ایف سی ءِ میان ءَ مروچی گومازی وانگجاہ ءِ فٹبال پٹ ءَ کنگ بوتگ کہ حمّل ظفر ءَ پیلانٹی شوٹ ءَ گوازی کٹ اِتگ باج بُرتگ –

گوازی ءَ ھردو ٹیمانی لیبیاں جوانیں گوازی پیش داشتگ ءُ ھردو ٹیم دیمیگ بوتگ انت – گوازی ءِ گڈسر ءَ پیلانٹی شوٹ ءَ حمّل ظفر ءَ ساچان سلالہ ءِ دیم ءَ باج بُرتگ ءُ ونر کپ دست گپتگ –

اے ٹورنمنٹ یک مارچ ءَ بندات کنگ بوتگ کہ مروچی آئی ءِ فائنل گوازی کنگ بوتگ – ونر ٹیم ءَ اولی گوازی نونھال کونشکلات ءُ دومی راونڈ ءَ سینگار ملانٹ سیمی فائنل گوازی ون اسٹار گومازی ءِ دیم ءَ چہ بُرتگ ءُ وت ءَ فائنل ءَ سرکتگ –

حمل ظفر فٹبال کلب ءُ ٹورنمنٹ ءِ سرکماش ظفر اکبر ءَ ھردو ٹیمانی لیبی دلبڈی داتگ ءُ اتکگیں مھمان ءُ ٹورنمنٹ ءَ بھرزورکیں لیبیانی منت گپتگ-

ٹورنمنٹ مروچیگیں گچینی مھمان نصیر گچکی، ماسٹر غنی بلوچ، ڈاکٹر حیدر بلوچ، اسحاق خاموش، ڈاکٹر ستار، خورشید بلوچ بوتگ انت کہ آھاں ٹورنمنٹ ءِ ستا کُتگ رنر ونر ٹیم دلبڈی داتگ انت ءُ داد بھر کُتگ انت – ونر ٹیم ءِ کپٹن منصور ءَ چہ ماسٹر گنی ءِ دست ءَ ونر کپ دستگپتگ –

ٹورنمنٹ ءِ ھلاسی ءَ پد شئر شائری ءِ مراگش ءِ اڈ دیگ بوتگ کہ مراگش ءَ شائراں وتی شئر درشانتگ انت –

زانگ بہ بیت اے ٹورنمنٹ حمّل ظفر فٹبال کلب ءِ چیردستی ءَ کسانسالیں ورنا ھدامُرزی حمل ظفر ءِ نام ءَ ایر کنگ بوتگ اشی ءِ تہ ءَ آل ڈسٹرکٹ ءِ بیست ءُ چار ٹیماں برمش دازن، ون اسٹار گومازی، سنج تمپ، مچکدگ گومازی، سنگت گواک ، سینگار ملانٹ، شھید طاہر دوست، شھید اکرم کسانو، تاج کونشکلات تربت، شھید نادل جان تمپ، وفا کونشکلات، غالب کلاتک، بلبل مکران ہوزئی، ینگ اسٹار تمپ ، شکاری گوبرد، الشاھین گومازی، نونہال کونشکلات، حمل ظفر گومازی، بلوچ کلب دازن، ینگ اسٹار بلوچ آباد، ساچان بلو، شھید اسمائیل تمپ، بلوچ کلات مند، ساچان سلالہ بھر زرتگ کہ اشانی تہ ءَ ساچان سلالہ تربت ، حمل ظفر گومازی ءَ جوانی ءَ گوازی کنان ءَ وت ءَ فائنل ءَ سر کُتگ ءُ مروچی فائنل گوازی ءَ حمل ظفر فٹ بال کلب گومازی ءَ پیلانٹی شوٹ ءَ باج بُرتگ ءُ ونر کپ دست گپتگ-