نبشتانک: کولواہ سھر بازار ءِ وانگجاہ
نبشتہ کار امجد بیکس
دی بلوچستان پوسٹ
سھربازار بلوچستان آواران ءِ میتگے انت ءُ کولواہ بُندپتری درگت ءَ آواران ءِ کْوھنیں نام اِنت انیگیں وھد ءَ آواران بلوچستان ءِ ھما ڈسٹرک اِنت کہ اود ءَ ھچ بُنکی اسراتی نیست اَنت ۔ انچوش کہ انسان ءِ بُنکی اسراتیاں چہ یکے آپ ءُ نگن اِنت ، دومی وانگ ءُ زانگ اِنت ءُ سیمی دُرھجاہ ءُ ھسپتال اِنت بلے کولواہ سھربازار چہ ایش بُنکی اسراتیاں زبھر اِنت ۔
من ءَ یاد اِنت وھدیکہ 24 ستمبر 2013 ءَ بیگاہ ءِ کساس سَے ءُ چار ءِ ساھت ءَ کولواہ ءَ ھوار مکران ءَ مزنیں زمین چنڈے بوت ۔ اے ساھت ءَ من ڈیلٹا سنٹرتربت ءَ وتی ھم تبکاں گوں ھوار کوٹی ءَ وانگ ءَ اَت اَنت وھدیکہ گُلزمین ءَ مزنیں جٹکایے دات ما نودربر چہ کوٹی ءَ زوت دراتک اِیں ءُ ڈن ءَ درکپت اِیں ھیر اود ءَ وَ جان ءِ مزنیں تاوان نہ بوت بلے رند ءَ من چہ ھبر ءُ ھالاں ، چہ مردمانی گَپ ءُ تراناں اِشکُت کہ سرجمیں کولواہ ءَ اے زمین چنڈ ءَ مزنیں نُکس ءُ تاوانے داتگ پد ءَ ھمے زمین چنڈ دو ءُ سَے روچ ءِ سر ءَ جٹکا دیاں داں کساس سالے ءَ جٹکا دات ئِے ۔
کولواہ سھر بازار ءِ مردم سکیں وار ءُ مِسکینیں مردم اَنت ، دو وھد ءِ نگن اش کدی بیت ءُ کدی نہ بیت بلے آیانی لوٹ ءُ واھگ ھمیش اَنت کہ آیانی زھگ بہ وان اَنت ءُ دنیا ءَ پوہ ءُ سرپد بہ بنت ۔
سھر بازار میتگ ءَ سرکار ءَ دوھزار (2000) ءِ وھد ءَ یک کسانیں وانگجاھے ٹاھینتگ اَت بلے بدبھتی ءَ چہ ھمے وانگجاہ 24 ستمبر 2013 ءَ زمین جُمب ءَ وتی ھرجان جَت ۔ گونڈوانی وانگ ھم اوشت ءِ آماچ بوت ۔ بلے چہ وانگجاھے ڈرگ ءُ کپگ ءَ پیش سوجکار کدی اَتک اَنت ، زھگ اش وانینت اَنت ءُ کدی نہ اَتک اَنت ۔ البت چہ ھمے مزنیں زمین چنڈ ءُ بلاھیں آپت ءَ رند وانگجاہ ڈراِت ءُ کپت ۔
سھر بازار ءِ گونڈوکیں چُکان ءَ وانگ ءِ سک ھُب ءُ واھگ اَست آ لوٹ اَنت کہ ما بہ وان ایں بلے آیاں ٹیچر ءُ وانگجاہ نیست اِنت بلے نوں لھتیں روچ بیت کہ سھر بازار ءِ لھتیں نوجواناں وتی کُمک ءَ وت گونڈوانی وانینگ بُنگیج کُرتگ ۔ بلے بژنی ھبرے کہ نئے گونڈواں ءَ اُستاد ءُ سوجکارے ھست، نئے پہ وانگ ءَ کتاب ءُ کلمے ، نئے پہ نندگ ءُ وانگ ءَ وانگجاھے ، نئے پہ سر ءِ چیر دیگ ءَ کوٹی ءُ ساھگے اَست ۔ داں کہ گونڈلیں نودربر یک کوٹی یے ءَ بہ نند اَنت ءُ بہ وان اَنت ۔ وتی واباں سرجم بہ کناں اَنت ۔
ما چہ سرکار ءُ بلوچستان ءِ وزیر تعلیم ءَ ھمے اوست ءُ اومیت کن ایں کہ آ زوت وتی دلگوش ءَ اے نیمگ ءَ گْور کن اَنت ءُ سھربازار ءِ وانگ ءُ وانگجاہ ءِ جیڑہ ءَ گیش ءُ گیوار کن اَنت ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔