نبشتانک: راج ءِ سے بدیں تبک
نبشتہ کار: پاتما بلوچ
دی بلوچستان پوسٹ
اولی تبک: دژمن ءِ ھما رَد داتگیں مھلوک ءُ لھتیں ناسرپدیں مردم اَنت کہ آیاں وتی راجی دود ءُ راجدپتر ءِ بابت ءَ ھچ سما نیست اِنت، اے تبک ءِ مھلوک ءَ راجی آجوئی ءِ سسّا نہ رستگ بلکیں مُدام زورگر ءِ پوتاری ونتگ ءُ دلگوش کُتگ پمیشکا چوشیں راج ءِ تہ ءَ اِے تبک مُدام زورگر ءِ توسیپ ءُ دْروگیں ستا کن اَنت۔ اے تبک ءِ مھلوک “دپچٹ” گْوشگ بیت کہ مُدام بے مُزّ ءَ پہ دژمن ءِ پلہّ مُرزی ءَ راج ءِ تہ ءَ بے سیتیں پوتاری کنان ءَ راجی جُنزاں تاوان ءُ بے سوب کن اَنت۔ ایشانی مستریں درور بلوچ راج ءِ ھما بے سمائیں مھلوک اَنت۔ 23 مارچ ءُ 14 اگست ءَ بے سیت ءُ پائدگی ءَ پاکستان ءِ بیرک دست ءَ کن اَنت ءُ دگانی سر ءَ شاتکامی کن اَنت۔
اِے تبک چہ سرکاری روتاک، ھالتاک، گِندگُش ءُ سرکاری وانگجاھ، سرکار ءِ دمگی وارلاڈز (بزاں دمگی کوڑائیں میر ءُ نواب کہ آیاں زورگیریں سرکار بھا زُور ایت ءُ آیاں زَر دنت ھمے وڑیں) دُژمن ءِ آسراتیانی آسر ءَ ودی بنت۔ بِہ گِند ئے اے تبک پہ راجی جُنزاں بلاھیں نادْراھی یے ءُ پہ اِے تبک ءِ راست کنگ ءَ آشوبی جُھدکار بلاھیں جُھدے کنگ لوٹ ایت کہ باید اِنت راج ءِ تہ ءَ گلامی ءِ مارشت ودی بہ بنت ءُ راج ءِ تہ ءَ ھمے سرپدی بہ بیت کہ تو وت یک سرجمیں راجے ئے، تئی وتی جُتائیں راجی دوُد ءُ شاھگانیں راجی زُبان، دود ءُ ربیدگ اَنت، ترا وت یک سرڈگارے ھست، نی تو گلامیں راج پہ وتی راجی آجوئی ءُ وتواجھی ءَ پاد بیا۔
دومی تبک: اِے ھما تبک ءِ مردم اَنت کہ پہ راجی جُنز ءِ ھلاپ ءَ سرکار ایشاں زَر دنت، چوناھیگا اِے تبک چہ بُندر ءَ ھرابیں مُردم اَنت انچوشکہ سِلکاریں دمگی رھشُون(کرپٹ لوکل لیڈرز) شَپُکی، دُزّ ءُ ڈُنگ ءِ وڑیں مردم اَنت کہ آیاں مُدام زورگیریں سرکار راجی جُنزانی ھلاپ ءَ کُمکّ کن اَنت۔ اے تبک ءِ مردماں “کاسگ چٹّ” گْوش اَنت کہ پہ دُژمن ءِ پائدگ ءَ ھمے کاسگ چٹّ راجدوستیں مردماں تُرس ءُ بیھار ءِ آماچ کن اَنت، پہ لب ءُ لالچ ءَ چہ سرکار ءِ دست ءَ ورناھیں جُھدکارانی آوار جنگ ءُ بیگواہ کنگ ءَ دژمن ءِ بلاھیں کُمکّ بنت ءُ دُژمن پہ وتی پائدگ ءِ ھاتر ءَ آیاں دگہ بازیں جاھاں ھم کارمرز کن اَنت انچوشکہ پہ سرکار ءِ ھکّ ءَ روانکے کَشگ، راجی جُنز ءِ ھلاپ پوتاری کنگ، اگاں مُچی یے ءِ تہ ءَ کسے زورگیر ءِ ھلاپ ءَ ھبرے بہ کنت گُڑا تچک ءَ ھمے ھبر ءَ دُژمن ءِ بُنجاہ سر کنگ ءِ کارمرزی اَنت۔ بزاں شھر ءُ میتگاں شپ داں روچ پہ دُژمن ءِ کاسگ چٹّی ءَ کار کن اَنت۔ سرکاری وزیر ءُ دمگدار دْراہ اے کاسگ چٹّی ءِ تبک ءَ شُمار بنت۔ وھدیکہ گُلامیں راج آزات بنت گُڑا نوکیں آجو بیتگیں راجمان ءُ راجمستری سرکار اے تبک ءِ راجی گُناھکاراں تْرُندیں سزا ءُ ڈنڈ دیگ بند اَنت۔
سئمی تبک: اے ھما تبک ءِ مردم اَنت کہ پہ زورگیر ءِ کُمک ءَ دُژمن ءِ سِلاہ زُور اَنت ءُ راجی آجوئی لوٹوکیں گھگیرانی ھلاپ ءَ جنگ کن اَنت۔ چوناھیگا دُژمن ءِ لشکر گُلامیں راج ءِ زُبان ءَ وَ سرپد نہ اِنت، زورگیریں دُژمن زیردستیں راج ءِ سرڈگار ءِ کوہ، لد، جنگل، کُوچگ، شھر ءُ میتگاں ھم ناشناس اِنت پمیشکا دُژمن اے تبک ءِ مردماں پہ وتی جنگی اُرش ھوار کنت، راجی آجوئی ءِ سِلاھبندیں گلانی بُنجاھاں سرکنگ ءَ کارمرز کنت ءُ اِے دابیں مردم راج ءِ لس مھلوک ءِ کُشگ ءَ ھم کارمرز بنت۔ اِے دابیں گلانی سروک دمگی میر، نواب، ڈُنگ ءُ نیکراھی مردم ھم بنت۔ اے تبک ءِ مردم “راجدْروہ” گْوشگ بنت۔
اگاں ما شھنشاہ ءُ زورگیرانی ھلاپ ءَ دنیا ءِ ھر راجی جُنزاں بہ وان این ءُ چمشانکے بہ دے ایں گُڑا مارا بازیں راجدْروہ ءِ نام پہ وانگ ءَ رس ایت ءُ ما سرپد بِہ ایں کہ ماں راجی آجوئی ءِ جُزاں راجدْروھی چنکس بلاھیں ناْراھی یے انچوشکہ اگاں ما برتانیہ شھنشاہ ءِ ھلاپ ءَ آزات ھندوستان ءِ راجدوستیں رھشُونانی راجی جُنز ءَ ھورت بہ وان ایں گُڑا ما سرپد بہ ایں کہ شھنشاھیں برتانیہ ءَ کانگریس ءِ ھلاپ ءَ، سرسید اھمد ھان، مھمد اَلی جناہ ءُ لیاکت اَلی ھان وڑیں راجدْروہ دیم ءَ آورتگ اَنت کہ چہ ھمے بدواھیں مردمانی کِرداں ھندوستان دو سَے بھر ءَ پْروشت چریشی ءَ ھندوستان ءِ جھمندیں مسلمان نزور تراتگ اَنت انچوشکہ اِے بابت ءَ کانگریس ءِ رھشُون ھندوستان راج ءِ راجی نمیران واجہ مولانا ابولکام آزات ءَ 1946 ءَ ماں لاھور ءِ روتاک “چٹان” ءَ گوں واجہ شورش کاشمیری ءَ یک گُلگدارے ءَ پیشگْوی یے ھم کُتگ اَت۔
اگاں ما 1955 تا 1975 ءَ امریکہ ءِ ویتنام جنگ ءَ وان ایں اود ءَ مارا راجدْروہ واجہ نگودینا ڈئیم، ایشی ءِ برات نگودینا نُو، نگیون وان تائیُون ءُ کاؤ وان وین ءِ وڑیں وتگڑیں رھشُون پہ وانگ ءَ رس اَنت کہ آیاں پہ امریکہ ءِ کُمکّ ءَ بے شُمار ویتنامی راجی سِلاہ بندیں جُھدکار ءُ ویتنام ءِ لس مھلوک کُشتگ اَنت بلے وھدیکہ امریکہ ءَ ماں اِے جنگ ءَ پْروش وارتگ گُڑا اے وڑیں دْراھیں راجدْروہ ءُ کاسگ چٹّ کسے راج ءِ لس مھلوک ءِ دست ءَ کُشگ بیتگ ءُ لھتیں پد ءَ دزگیر ءُ سرکاری رھبندانی رِد ءَ کُشگ ءُ سزا دیگ بیتگ اَنت۔
ھمے داب ءَ اگاں ما 1971 ءَ پاکستان ءِ ھلاپ ءَ بنگالی راجی آجوئی ءِ جُنز ءَ وان ایں گُڑا ما بازیں چیزاں زان ایں کہ نیکراھیں مُلا ھم دلار، کاسگ چٹّ ءُ راجدْروہ بنت۔ وھدیکہ پاکستان ءَ مار اِت کہ پاکستان ءِ لشکر چہ بنگالی راجی آجوئی لوٹوکیں سِلاھبندیں گل “مُکتی بانی” ءِ دست ءَ پْروش ورگ ءَ انت گُڑا بنگالی راجی جُنز ءِ ھلاپ ءَ پاکستانی لشکر ءِ سروگاناں دمگی بنگالی وت ماں وت مِڑائینتگ ءُ کُشائینتگ اَنت بزاں “رزکار”، “البدر” ءُ “الشمش” وڑیں کاسگ چٹّ ءُ راجدْروھیں گل چہ جمائت اسلامی ءُ دگہ نیکراھیں مُلکاری گلاں (سیاسی پاٹیاں) جوڑینتگ اَنت ءُ ھمے گل ءِ باسک ءُ کارمنداں پہ پاکستان ءِ کُمکّ ءَ بنگالی راجی جُھدکار ءُ لس مھلوک کُشت ءُ آیانی گس ماندارینت اَنت۔
بلے وھدیکہ 18 دسمبر 1971 ءَ پاکستان ءِ لشکر ءَ ماں جنگ ءَ پْروش وارت ءُ ھندوستان ءِ لشکر ءِ دیم ءَ السی سرجھلی یے کُت گُڑا راجدوستیں بنگالی لس مھلوک ءَ ھمے سرکاری کاسگ چٹّ ءُ راجدْروھانی گس وت انگیر کتگ ءُ ھزارانی کچ ءَ راجدْروہ گوں مُِچی ئیں اُرشاں کُشت ءُ آیانی لوگ سُتکگ اَنت۔ بازینے ءَ تتک ءُ وت چیر داتگ بلے پد ءَ آجوئیں بنگالی سرکار پولیس ءَ دزگیر کُت ءُ سرکاری آمیدگِساں آیاں چہ آیانی کتگیں گُناہ ءُ رَدی ءِ برابر ءِ مرگ ءِ سزا داتگ اَنت آجوئی ءَ رند تاں سی سال ءَ آجوئی بنگلہ دیش ءَ پہ وتی راجی جُھدکاراں مُز ءُ انساپ ءِ ھاتر ءَ راجدْروھانی ھلاپ ءَ گْواہ ءُ دگہ سبوت یکجاہ کُتگ اَنت کہ اِے راجدْروہ پاھو دیگ بہ بنت ءُ بنگلہ دیش ءِ سرکار ءَ یک یکی ءِ سرجمیں راجی کاسگ چٹّ ءُ راجدْروھاں بلاھیں سزا ءُ ڈند داتگ۔
چوناھیگا پہ نوک آجوئیں بیتگیں ڈیھاں ھژدری اِنت کہ وتی راجی راجدْروھاں پھل مہ کن اَنت کہ چریشی ءَ راجدوستیں جُھدکار وت ءَ بے مُزّ پھم اَنت، راج دیمروی نہ کنت بلکیں پد ءَ راج ءِ تہ ءَ راجدْروھی البار بہ بیت۔
نی بیا اِت کمیں بہ جیڑ ایں کہ بلوچ راجی آجوئی ءِ جُنز ءِ تہ ءَ چون رنگین ءُ چُنت تبک ءِ راجدْروہ اَنت۔ بِہ گِند ئے بنگلہ دیش ءَ پہ وتی راجدوستیں جُھدکارانی بیرانی گِرگ ءُ راجدْروھانی پاھو دیگ ءَ سی سال لگ اِت کہ ھما وھد ءَ بُتگیر ءُ چاگِرد رسانکدر ءِ وڑیں آسراتی نیست اَنت بلے مرچی ماں بلوچ راجی جُنز ءَ کاسگ چٹّانی تامُربند، تواربند ءُ اَکس البار اَنت کہ چون گوں دژمن ءَ ھوار نشتگ ءُ بلوچ راج ءِ کُشگ ءَ ھوار اَنت گوں! زاناں مئے وتواجہ ءُ آجوئیں بلوچستان ءِ راجمستری ئیں سرکار ءُ آمیدگِساں چُنت سال لگ ایت کہ بلوچ راجی آجوئی جُنز ءِ راجدْروہ پاھو دیگ بہ بیت کہ بلوچ راجی شھید ءُ آیانی کھولاں انساپ ءُ مُز بہ رس ایت۔
بلوچستان آجو بات ءُ کاسگ چٹّ ءُ راجدْروہ مرگ بات انت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔