کلات: معدنیات سائٹ ءُ موباھل ٹاور سلاہ بنداں پروشتگ

بلوچستان ءِ دمگ کلات ءَ ناشناسیں سلاہ بندیں مردماں معدنیات ءِ کشوکیں سائٹ ءِ مشینری ءُ موباھل ٹاور پروشتگ اَنت – دومی سبی ءَ اُرش ءَ پاکستانی پوج ءِ فرنٹیئر کور ءِ دو کارندہ زدگ بیتگ اَنت-

کلات ءِ دمگ مکی ءَ پڈ ماران ءِ ھند ءَ فلورائیٹ ءِ کشوکیں لیز سر ءَ اُرش کنگ بیتگ ءُ سائٹ ءَ جاڑیگیں گاڑی ءُ مشینری سوچگ بیتگ اَنت ھمے وڑ ھمے دمگ ءَ ھستیں یوفون ٹاور سلاہ بندیں مردماں تیر جتگ ءُ تاوانبار کرتگ-

دمگی مردمانی رد ءَ وئیل ءَ پد سلاہ بندیں مردم تکگ اَنت بلے داں انگت ءَ واکدارانی نیمگ ءَ اے درگت ءَ ھچ گپ پیش کنگ نہ بیتگ اَنت-

دومی نیمگ ءَ سبی ءِ ھند سانگان ءَ گوستگیں روچ ءَ سلاہ بندیں مردمانی اُرش ءَ پاکستانی پوج ءِ دو کارندھانی زدگ بیگ ءِ ھال راست بیتگ ءُ بلے واکداراں دگہ گیشیں گپ نہ جتگ –

زانگ بہ بیت سانگان ءِ دمگ ءَ پنچ روچ ءَ پیسر یک بمب تراکے ءِ آسر ےَ پاکستانی پوج ءِ ھپت کارندہ بیران بیتگ اِت اَنت کہ اُرش ءِ زمہ واری بلوچ لبریشن آرمی ءَ منّ اِتگ اَت-

بلوچستان ءَ گوستگین بیست ءُ چار ادارانی تہ ءَ اے پنچمی وئیل اِنت گوستگیں روچ ءَ پنجگور ءِ شھر ءَ دزبمب اُرشے ءَ یک پوجی کارندھے زدگ بیتگ اَت کہ آئی ءِ زمہ واری بلوچستان لبریشن فرنٹ ءَ منّ اِتگ اَت ھمے وڑ بلوچ ریپبلکن گارڈز ءِ نیمگ ءَ بمب تراکے ءَ نسیر آباد ءَ روڈ ءَ کار کنوکیں گاڑی ءِ نشانگ کنگ بیتگ –