زاھد بلوچ ءِ یل کنائینگ ءِ ھاتر ءَ شال ءَ زھرشانی کنگ بیت اِنت – زرجان بلوچ

بلوچ اسٹوڈنٹس آرگنائزیشن آزاد ءِ گوستگیں چیئرمین زاھد بلوچ ءِ لوگ بانک زرجان بلوچ ءَ یک درشانے ءَ گُشتگ زاھد بلوچ ءِ زورانسری آوار جنی ءَ ھشت سال ءِ دراجیں وھدے ءِ گوزگ ءَ پد شال ءَ زھرشانی ءِ جار جنان ءَ گوشتگ زاھد بلوچ ءِ بیگواھی ءَ پد کھول یل درناکیں زندمانے ءَ دُچار اِنت – کھول اے گپ ءَ بھمیانکاں آ زندگ اِنت یا ناں پرچا اے ھشت سالانی میان ءَ ما آمیدگساں بہ گر داں ریاستی دراھیں ادارھانی در ٹُک اِتگ اَنت بلے کسے ءَ مئے درد گوش نہ داشتگ ءُ مارا اے ھم گوشگ نہ بیتگ زاھد بلوچ کجا اِنت کجام جاورانی تہ ءَ اِنت-

آئی ءَ گُشتگ زاھد بلوچ یک نودربر رھشون ءُ سیاسی باسکے – آئی ءَ وتی سرجمیں زند سیاسی جد ءُ جھد ءَ گوازینتگ اے رنگ ءَ یک سیاسی مردمے ءَ گرگ ءُ گار کنگ کھول ءَ زھنی دردانی دیمپانی ءِ آماچ اش کتگ –

زرجان بلوچ ءَ سرکار ءُ آمیدگسی واکاں گوں دزبندی کتگ کہ ما اے ریاست ءِ شھری اِنت ھمیشی ءِ تہ ءَ وتی زندگی ءَ گوازینگ ءَ ایں مارا بستار ءِ شھری ءَ اے ھک نیست اِنت جست بہ گریں زاھد سلامت اِنت یا ناں اگاں زاھد ءِ سر ءَ دگہ کیسے چیزے ھست گڑا آمیدگس ءَ پیش کنگ بہ بیت ءُ سزا دیگ بہ بیت ھما کہ پاکستان ءِ کانودانی رھبند اَنت بلے اے رنگ ءَ زاھد ءَ بیگواہ کنگ ءُ نا ایوک ءَ آئی ءَ بلکیں سرجمیں کھول ءَ سزا دیگ بیگ ءَ اِنت چوشکہ اے وت پاکستانی آئین ءُ میان اُستمانی ھکانی رھبندانی لگتمالی اِنت – وھدیکہ زاھد بلوچ ءِ یل کنائینگ ءِ ھاتر ءَ ما درستیں راہ ءُ در کارمرد کتگ اَنت اسلام آباد ءَ شتگ ایں ھاکم ءُ آمیدگساں گوں دزبندی کتگ داں انگت ءَ مارا کانونی ھک نہ رس اِتگ اے وڑیں ھچ راہ پش نہ کپتگ کہ ما زاھد ءِ واستا کارمرد نہ کتگ بلے ھرجاہ ءَ مارا نا امیتیانی دیمپانی بیتگ –

زرجان بلوچ ءَ گُشتگ زاھد بلوچ ءِ بیگواھی ءَ ھشت سال سرجم اِنت ھژدہ مارچ ءَ آدینگ ءِ روچ ءَ بیگاہ ءِ ساھت چار ءَ شال ءَ یک زھرشانی روانکے کشگ بیت اِنت ءُ ما زاھد بلوچ ءِ بیگواھی ءِ سر ءَ ھچ رنگ ءَ بے توار بوت نہ کن ایں زاھد بلوچ بلوچ دیم ءَ آرگ بہ بیت ءُ مارا انساپ دیگ بہ بیت سرکار ءُ ریاستی ادارھاں گوں دزبندی اِنت زاھد بلوچ ءَ یل بہ کن اَنت ءُ مارا اے دردناکیں وھد ءَ بہ رکین اَنت-