بلوچستان لبریشن فرنٹ ءِ جارکش میجر گھرام بلوچ ءَ گُشتگ کہ بلوچستان ءَ بلوچ سرمچارانی دستءَ پروش ورگ ءَ پد ءُ تُرس ءِ تہءَ قوضہ گیریں ڈیھہ پاکستان جتاھیں پندل ءُ ھنر سازگ ءَ اِنت۔ لھتیں ماھاں چہ وتگڑیں کاؤنٹر ٹیررازم ڈیپارٹمنٹ (سی ٹی ڈی) ءِ نیمگ ءَ زورانسری بیگواھیں بلوچ بندیگانی دروگیں میڑانی تہءَ کُشگ ءِ تہءَ گیشی آیگ ھمے یکشلی ءِ بھر اِنت۔ لھتیں وھد بیت کہ پولیس ءِ بازیں مردماں گیشتر پگار ءِ لالچ دیگ ءُ آیاں سی ٹی ڈی ءِ تہءَ برگ ءِ جھد کنگ بئیگ ءِ اِنت۔ اِشانی تہءَ بازیں بلوچاں سی ٹی ڈی ءِ سیاھیں کردگار ءِ گندگ ءِ سوب ءَ اے پیشکش رد کُتگ۔ بازیں مردم بے کاری، گرانی ءُ لالچ ءُ دروگ ءُ ریپینگ ءِ سوب ءَ اِشی ءَ ھوار کپتگ اَنت۔ بلوچستان ءَ گریبی ءُ بُنکی آسراتیانی نہ بئیگ ءِ سوب مئے راجی گلامی ءُ زیردستیں دمگ اِنت۔ ھمیشی ءَ اسپر کنان ءَ پاکستان بلوچاں وتی لشکریانی تہءَ ھوار بیگ لاچار کنگ ءَ اِنت۔ اے یک لاچاری ءِ مہ بیت پرچہ کہ چہ پاکستان ءَ آجوئی ءَ پد بلوچستان ءِ مھلوکاں ریاستی مستری ءَ جانسلامتی، کار ءُ روزگار ءُ جان ءُ مڈیانی پھازگ ءِ ضمانت رسیت۔
جارکش ءَ گُشتگ کہ نی بلوچستان ءَ وتگڑیں سرکار ءَ پوج ءُ آئی چیر دست ءَ کارکنوکیں پوجی گلاں پھازگ ءِ ھاترءَ ءُ آیانی پروشانی چیر دیگ ءِ ھاترءَ سی ٹی ڈی ءَ گیشتر آسراتی دیگ ءَ اِنت۔ ھمے ھاترءَ بازیں اگدہ ءُ دگہ آسراتیانی جار جنگ بیتگ دانکہ بلوچستان ءَ برجاھیں استانی ناشرکاریاں دگہ یک دروشمے دیگ بہ بیت ءُ اشی تہءَ ھندی پولیس بزاں سی ٹی ڈی ءِ نشان جنگ ءُ برجاہ دارگ بہ بیت ءُ پوج شرپدار نامینگ بہ بیت۔ پمیشکہ بلوچ راج بائد اِنت اے پندل ءَ بزانت ءُ اِشی بھر مہ بیت۔ اے پندل ءِ دروشم ءَ بلوچاں بلوچانی دیما اوشتارینگ بیت دانکہ جھان ءَ پیش دارگ بہ بیت کہ بلوچ راج پاکستانی لشکرانی تہءَ ھوار اَنت ءُ آجوئی ءِ ھلاپ ءَ جنگ کنگ ءَ اَنت۔ اے پئیم ءَ قوضہ گیر یک تیراں گوں دو نشانگ ءِ مُز چِست کنگ ءِ جھد کنگ ءَ اِنت پرچہ کہ گُڑءَ اے گھگیری ءِ تہءَ دوھیں نیمگ ءَ بلوچ پُسگ کُشگ بنت۔
میجر گھرام بلوچ ءَ گُشتگ کہ سی ٹی ڈی ءِ ھاترءَ دوھزار ءِ کساس جتاھیں اگدھانی جار جنگ بیتگ کہ پوج ءُ پیرا ملٹری ءِ جاہ ءَ زیرگ ءِ جھد کن اَنت ءُ اِشی ءَ لش لشکر ءِ پوست ئے تہءَ پوج ءِ زمہ واری دیگ بنت۔ چُش کہ لس لشکریانی کردگار ءُ روش ھم جتا نہ اِنت۔ نی بیڑ ءُ دروگیں میڑانی تہءَ کُشگ ءِ کار سرجم ءَ سی ٹی ڈی چیردستی ءَ آرگ بیتگ۔ اے لشکرانی تہءَ روگ ءِ ھاترءَ بلوچ ورناھاں حب ناک کنگ ءِ ھاترءَ بازیں راہ پچ کنگ بئیگ ءَ اَنت پرچہ کہ بلوچ راج ءَ قوضہ گیریں پوج ءُ آئی ھمکاریں گلانی تہءَ بھر زیرگ ءَ چہ مکن کُتگ۔ ھمے سوب اِنت کہ پوج ءُ آئی چیردستیں گلاں بے سوبی ءِ دیمپانی کنگ کپگ ءَ اِنت۔ اے بے سوبی ءَ چیر دیگ ءُ بلوچ نسل کشی ءِ تہءَ تیزی آرگ ءِ ھاترءَ سی ٹی ڈی ءَ ڈُبہ ءُ آسراتی دیگ بیگ ءَ اَنت۔
بی ایل ایف جارکش ءَ گُشتگ کہ ریاست ءِ نیمگ ءَ ودی کُتگیں بے کاری ءِ سوب ءَ وانندگیں مردم لاچار بنت کہ آ کجام وڑءَ وتی ونتگیں تک ءِ تہءَ دیمروی بہ کن اَنت کہ آئی ھاترءَ آھاں بازیں سالاں ونتگ۔ اِشی ءِ ھاترءَ ھم سی ٹی ڈی ءَ یک پردگ یے ءِ پئیم ءَ پیش کنگ بیت۔ اِشی تہءَ ھوار بیگ ءِ سوب آ وتی وانگ ءُ زند ءَ تک ءَ تاوان بھر کنگ ءَ اَنت۔ آ چُشیں گام ءَ تہءَ بھر زیرگ ءَ پھریز بہ کن اَنت۔