شال ءَ بیگواھیں مردمانی ھاتر ءَ زھرشانی برجاہ

زاکر مجید ءِ درگت ءَ مار ءَ سرپدی دیگ بہ بیت – مات ءِ لوٹ

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ شال پریس کلب ءِ دیم ءَ زھرشانی بنجل برجاہ، زھرشانی بنجل ءَ مروچی چار ھزار ءُ شش سد ءُ پنچ روچ سرجم بوتگ –
بلوچستان نیشنل پاٹی ءِ بنجاھی رھشوناں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشانتگ گوشتگ کہ بلوچستان ءِ تہ ءَ تاکت ءِ زور ءَ جاورھال گیشتر ھراب کنگ بوھگ ءَ انت –

آھانی گوشگ ات کہ بلوچ نودربرانی سر ءَ لٹ شاپ ءُ آھاں ترسینگ ءُ بیھار دیگے امل پہ ریاست ءَ جوان نہ انت –

ھمے وھد ءَ گل ءِ کمک سرکماش ماما قدیر بلوچ ءِ گوشگ ات کہ بیگواھیں مردمانی یل کنگے ھاتر ءَ مئے پُرایمنیں جھد برجاہ انت – ریاست مردمانی یل کنگے بدل ءَ چدوگیشتر ورنا زورانسری آوار جنگ ءُ بیگواہ کنگ ءَ اِنت –

آئی ءَ گوشتگ کہ درسیں سیاسی پاٹی ءُ ھر تک ءُ پھناتاں سیادی داروکیں مردمانی زمہ واری انت کہ ریاست ءِ اے زلم زوراکیانی بگیری ءَ توار چست بہ کن انت –

یانزدہ سالاں زورانسری آوار جنگ ءُ بیگواہ بوتگیں بلوچ نودربر گل ءِ رھشون زاکر مجید ءِ مات ءَ مروچی زھرشانی ءَ بھر زرتگ ءُ گوشتگ کہ آ وتی چک ءِ زورانسری آوارجنی سوب ءَ ماژگی ازاب ءُ ازیتانی دیمپان انت آئی ءَ لوٹ کتگ گوشتگ کہ زاکر مجید ءِ درگت ءَ آئی ءَ سرپدی دیگ بہ بیت –