گلزار دوست پنجگورءَ سر بیتگ – ھدایت الرھمن ءِ ھمراھداری کنگ ءِ جار

27 فروری ءَ بلوچستان ءِ دمگ کیچ ءِ بنجاھی شھر تُربت ءَ چہ پادانی شال ءِ نیمگ ءَ لانگ مارچ کنان ءَ گلزار دوست پنجگور دمگ ءِ ھداں سر بیتگ۔

بلوچستان ءَ پاکستانی لشکریانی دستءَ زورانسری بیگواھیانی دارگ، بیگواھیں مردمانی یل کنائینگ ءُ دگہ لوٹانی منارینگ ءِ ھاترءَ تُربت سول سوسائٹی ءِ رھشون گلزار دوست پنجگور ءِ ھنکین گوارگو ءَ سر بیتگ۔

اے نیام ءَ ھندی مردماں آئی وش آتک کُتگ ءُ آئی جھد ساڑاتگ۔

اھوالانی ردءَ گلزار دوست ءَ مروچی وتی سپر پرومی کراس ءَ چہ بندات کُتگ کہ آودہ گوستگیں پرگینگی وزیر غلام جان بلوچ ءُ دگراں آئی گوم ءَ یکجاھی درشان اِتگ ءُ لانگ مارچ ءَ بھر زرتگ۔

دومی نیمگ ءَ ھق دو تھریک ءِ سروک مولانا ھدایت الرحمن بلوچ ءَ پنجگور ءِ نزیک ءَ تُربت سول سوسائٹی ءِ کنوینئر گلزار دوست ءَ گوں یکجاھی درشان اِتگ ءُ آئی جھد ساڑاتگ ءُ آئی ءَ اوست داتگ۔

اے نیام ءَ ھدایت الرھمن ءَ گُشتگ کہ گلزار دوست ءِ درستیں لوٹ راستی ءِ سرءَ اَنت ءُ ھق دو تھریک آئی سرجمءَ ھمراہ داری کنت۔

زانگ بہ بیت کہ بیگواھیں مردمانی پھازتگیں دروشمءَ یل کنگ، زورانسری بیگواھیانی دارگ، لینڈ ایکوزیشن ایکٹ 1894 ءِ ردءَ بلوچانی ڈگارانی سرءَ بنجاھی ادارگانی قوضہ ءُ منشیات ءِ دارگ ءَ ھوار دگہ بُنکی لوٹانی ھاترءَ گلزار دوست تُربت ءَ چہ مزن شھر شال ءِ نیمگ ءَ پادانی لانگ مارچ کنگ ءَ اِنت۔