نبشتانک: بلوچی نبشتہ ءِ ھیل
نبشتہ کار: پاتما بلوچ
دی بلوچستان پوسٹ
بلوچی مئے وتی راجی زبان اِنت ءُ ما بلوچ ابرمی وتی ماتی ءُ راجی زبان ءَ گپ کُت کن ایں، بلوچی گپتاری ءَ ھم جْوان سرپد بَہ ایں بلے بازیں بلوچ نودربرے وتی جِند ءِ راجی زُبان ءِ وانگ ءُ نبیسّگ ءَ ھیل نہ اِنت اگاں ما وتی راجی زُبان ءِ وانگ ءَ ھیل نہ ایں گُڑا باید انت ما اشتاپ مہ کن ایں بلکیں کم کم ءَ بلوچی نبشتانک ءُ آزمانکاں وانان ءَ وتی راجی زُبان ءِ بلوچی وانگ ءَ ھیل بہ کن ایں کہ بے بلوچی وانگ ءُ زانگ ءَ ما وت ءَ راجدوست گْوشت نہ کن ایں چوناھا ماں روایرشُتی ءُ رودرآتکی ایردستیں بلوچستان ءِ وانگجاہ، کالج ءُ یونیورسٹیاں بلوچ نودربر ھِندی ءُ پارسی ءَ ماں اَربی سْیاھگ ءَ وانگ ءَ اَنت ءُ بلوچی زُبان ءِ نبشتہ رھبند ھم ماں اَربی سْیاھگ ءَ اِنت پمیشکا باید انت ھچ بلوچ ءَ بلوچی وانگ ءَ وَ ھچ وڑیں تکانسری یے مہ بیت بزاں ما وتی راجی زُبان ونت ھم کن ایں۔
البت پد ءَ ھم لھتیں نودربر ھست اَنت کہ آ بلوچی وانگ ءَ مُشکل ءِ آماچ بنت گُڑا ما آیاں گْوش ایں کہ بلوچی وانگ ءَ ھچبر اشتاپ مہ کن اِت ءُ ناں کہ دلپْروش بہ بَہ اِت کہ من کسانی ءَ بلوچی نہ ونتگ پمیشکا انی من دربُرت نہ کن آں، یا منی نبشتہ سھی نہ اِنت! بلکیں شُما ھمے سرپد بوگ ءِ جُھد بہ کن اِت کہ ما گلامیں راج ءِ ھچ وانِندگ ءَ بلوچی چہ وانگجاھاں ھیل نہ گپتگ ءُ ناں کہ اے گلامی ءِ تھاریں ساھگاں بلوچی بلوچ راج ءَ ما وانگجاھاں وانینگ بیت انت۔ گِند ئے ما دْراہ بلوچی ءَ وتی دزھُورکی ءَ وانان ءَ دربرگ ءَ ایں پمیشکا ھر کس سرپد بوگ لوٹ ایت کہ بلوچی وانگ ءُ نبشتہ ئِے دربرگ ءَ مارا چے کنگ لوٹ ایت وھدے کہ شُما اے چیزاں سرپد بَہ اِت ءُ آیانی سر ءَ کار ءَ بُنگیج بہ کن اِت گُڑا شُما زیت وتی راجی زبان ءِ نبشتہ چَہ وتی ھُب، واھگ ءُ جُھداں بَلد ءُ زبر بہ اِت۔ بزاں سد در سد بے اُستادی ءَ-
تھنا مارا وت ءَ راجی زُبان ءِ سرمچار منّ ایں، اول ما وت ءَ راجی زُبان ءِ مُھمکیں جُھدکار بہ مار ایں کہ من ءَ ھرچ ھال ءَ بلوچی وانگ ءُ دربرگی اِنت ستر منی جُھد ءِ منزل گران بہ بیت، من بلوچی نبشتہ دربر آن ءُ بلوچی نبشتہ کارے جوڑ بہ آں پد ءَ وتی راج ءُ سرڈگار ءِ دردانی کسہ نبشتہ کنان ءُ راج ءِ دیم ءَ کار آں۔ وھدے کہ راج ءِ چاگِرد ءَ اے وڑیں مارشت ودی بنت گُڑا ما ھر یک وتی راجی زُبان ءِ نبشتہ ءَ وت زبر بَہ ایں۔ بلے اے درگت ءَ مارا رِد ءِ سر ءَ وتی جھد برجاہ دارگی انت۔ چہ دْرستاں پیش مارا وتی راجی زبان ءِ نبشتہ بُنکی آسراتی بلوچی آبینکدار (کیبورڈ) وتی گوانکو ءَ ایرگیجگی انت انچوشکہ اَربی، روسی، جاپانی، سندھی، بنگالی، پارسی ءُ دگہ ھر راجے ماں گْوانکواں وتی زبان ءِ آبینکداراں کارمرز کن اَنت۔ دومی مارا سیدگنج بزانت بلد(ڈکشنری) ھم ایرگیج کن لوٹ ایت کہ نبشتانک ءُ آزمانک وڑیں چیزے وانگ ءَ گِرانیں گالانی بزانتاں بہ زان ایں۔
دومی ایش انت کہ ما چہ بندات ءَ بلوچی دَروَنتاں ھورت بہ وان ایں ءُ زان ایں کہ بلوچی نبشتہ رھبند ءِ بُندری رِد ءُ بند چے اَنت؟ بلوچی نبشتہ رھبند چے یے؟ نبشتہ ءِ بُندری لوٹ چے اَنت انچوشکہ ھر زُبانے ءَ کارگال، کُمکّار گال ءُ ستاگالانی بارہ ءَ سرپدی زانگ لوٹ ایت کہ اے کجام جاگھاں کارمرز بنت۔ مارا سرپد بوگ لوٹ ایت کہ دُنیا ءِ تیوگیں زُبانانی نبشتانک ءُ آزمانکانی رِد یک اَنت پمیشکا مارا نبشتاری ءِ ٹِک ءُ نشان(، ” ! ; : – ) ءُ بھرگ (Paragraph ) ءِ وڑیں چیز ھم زانگی اَنت کہ اے کُجام جاہ ءُ چون سنج دیگ بنت۔
بلے اول مارا درونت وانگی اَنت ءُ وھدے کہ ما بلوچی درونت یا کورس سرجم ءَ ونتگ اَنت گُڑا باید انت ما بلوچی ءِ راجدوستی نبشتانک ءُ آزمانکاں یک انچیں درشاندابے ءَ وان ایں کہ من وت بلوچی ءِ اُستادے آں۔ بزاں توری بلوچی ءِ ھر وڑیں نبشتھے بہ بیت، توری نبشتانک ءُ آزمانکے بہ بیت، توری سرگْوست ءُ تب ھروھدے ءِ بارہ ءَ نبشتھے بہ بیت، گوں انچیں دابے ءَ وانینگ بہ بیت کہ تو وت یک اُستادے ئے ءُ تو پہ ایشی ءِ راست کنگ ءَ چمشانکے دیگ ءَ ئے گُڑا تو زیت راجی زبان ءَ دربر ئے پمیشکا یک رندے پد ءَ گْوش آں کہ ما اشتاپ مہ کن ایں بلکیں چہ درستاں پیش بلوچی درونتاں بہ وان ایں۔ ما وَ نہ گْوش ایں کہ شُما یکپارگی بلوچی نبشتہ بندات بہ کن اِت یا رَد نبیسّ اِت بلکیں ما گْوش ایں کہ بندات ءَ ھر روچ بیست دمان پہ بلوچی درونتانی وانگ ءَ بہ دے اِت پد ءَ کم کم ءَ بلوچی نبشتانک ءُ آزمانکاں نبشتہ بہ کن اِت، اشتاپ مہ بہ اِت وتی نبشتگیں گالرِداں دو رند وت چمشانک دیان ءَ وتی ردیاں وت راست بہ کن اِت۔
ما دلگوش بِہ بَہ ایں کہ مارا مرچی پہ بلوچی وانگ ءُ دربرگ ءَ بازیں بلوچی تندجاہ، بلوچی وٹس ایپی وانگجاہ ءُ پیسبُکی تاکدیم ءُ گل ھست انت کہ چہ اود ءَ مارا بے کساس بلوچی دربرگی درونت ءُ نکان ھم رس اَنت گُڑا باید انت ما چہ دامگی آسراتیاں وتی راجی زُبان ءِ نبشتہ دربر ایں کہ زُبان مئے راجی پجّار ءُ راجدوستی ءِ بُنھِشت اِنت۔
وھدیکہ ما بلوچی نبشتہ ءُ رھبند ءَ بہ زان ایں گُڑا باید انت ما وت بلوچی نبیسّگ ءَ کم کم ءَ ھیل بہ گر ایں۔ گوں راج ءَ اے ھم دزبندی اِنت کہ شُما نبیسّگ ءِ وھد ءَ راجی زبان ءِ کْوھن ءُ زگریں گالاں ھچبر ڈالچار مہ کن اِت بلکیں مُدام گْوں زگریں بلوچی گالاں نبشتہ بہ کن اِت۔ مُدام ھمے کوشست بہ کن اِت کہ نبیسّگ ءِ وھد ءَ ھِندی ءُ پارسی ءِ گال کارمرز مہ بنت بلکیں وتی راجی زبان ءِ زگریں گال کارمرز بنت گُڑا بلوچی زبان دیمروئی کنت وھد گْوزان بیت ءُ اگاں راج ھمے رنگ ءَ راجی زبان ءِ نبشتہ دربارت گُڑا ما دلجمی ءَ گْوش ایں کہ راجی زبان دیمروی کنت۔ بلوچی مئے وتی شھدیں زبان اِنت ءُ بلوچ راجی پجّار انت پمیشکا راجی زبان ءِ ھاٹیگ بلوچ راج ءِ ھاٹیگ انت۔
شالا سوبین بات اِت ءُ اے پنت ءَ دیم ءَ ھم روان بہ کن اِت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔