شال ءَ بیگواھیں مردمانی یل کنائینگ ھاتر ءَ کھولاں ءَ زھرشانی کتگ

بلوچ بیگواھیں مردمانی کھول ءِ نیمگ ءَ چہ دوستناکانی زورانسری آوار جنی ءُ یل کنائینگ ءِ بگیری ءَ شال پریس کلب دیم زھرشانی کنگ بوتگ-

زھرشانی ءِ جار شش ماہ ءَ ساری زورانسری آوار جنی ءِ نشانگ بوتگیں شال ءِ نندوک فیاض سرپرہ ، ارشد بنگلزئی ءُ راشد بنگلزئی ءِ کھول نیمگ ءَ دیگ بوتگ، وھدے کہ زھرشانی ءَ نوشکی ءَ چہ چار سال ءَ ساری پوج دست ءَ آوار جنگ ءَ پد بیگواہ بوتگیں خضدار ءِ نندوک آصف ءُ رشید بلوچ ءِ گْھار سائرہ بلوچ ءُ بیگواھیں نعمت اللہ نیچاری ءِ لوگ بانُک ھم ھوار بوتگ-

شال زھرشانی ءِ سروکی ماما قدیر بلوچ ءَ کتگ وھدے کہ انسانی ھکانی باسک غفار بلوچ، حمیدہ نور بلوچ ءَ ھوار دگہ بیگواھیں مردمانی کھول زھرشانی ءَ ھوار بوتگ اَنت-

زھرشانی کنوکاں گپ تران کنان ءَ شش ماه ءَ ساری پوج دست ءَ آوار جنگ ءُ بیگواہ کنگ بیتگیں فیاض علی سرپرہ ءِ لوگ بانُک نرگس فیاض ءَ گوشتگ کہ آئی ءِ لوگ واجہ فیاض علی پوج ءَ آئی ءِ چمّانی دیم ءَ چست کتگ ءُ گوں وت برتگ چریشی ءَ پد فیاض واتر نہ بوتگ نانکہ آئی ءِ درگت ءَ مارا سرپدی رستگ-

نرگس بلوچ ءِ گْوشگ اِنت کہ من وتی چیزے ماہ ءِ چُک ھمراھی ءَ کمیشن، آمیدگس، وزیر ءُ گزیراں بلکیں ھرچ در ءَ وتی پریات برتگ کہ اود ءَ اُمیتے بوتگ بلے بے اُمیتی ءَ اَبید دگہ ھچ نہ رس اتگ ، چُک ھمراھی ءَ اد ءَ پریس کلباں زھرشانی کنگ ءَ آں –

آئی ءَ گوشتگ کہ انسانی ھکانی ادارہ فیاض علی ءِ یل کنائینگ ءَ باور بہ کنائین اِیت –

زھرشانی ءَ ھوار ارشد علی ءُ راشد علی ءِ مات ءَ گْوشتگ کہ آئی دوئیں چُک پوج ءِ کارندھاں شش ماہ ءَ ساری چست کتگ ءُ گوں وت برتگ اَنت چریشی ءَ پد دوئیں بیگواہ ءَ اَنت، آیانی مات ءَ گْوشتگ کہ منی چُک منی یکیں اُمیت اِنت آیانی پت ءِ بیرانی ءَ پد دوئیں گریبی ءُ پوریاگری ءَ بوتگ اَنت- آئی حکومت ءُ دگہ ادارھاں گوں دزبندی کتگ کہ ارشد ءُ راشد ءَ دیم ءَ بیار اَنت مارا انساپ بدے اَنت-

زھرشانی ءَ ھوار نوشکی زنگی ٹاور ءَ چہ چار سال ءَ ساری بیگواہ بوتگیں آصف ءُ رشید ءِ گْھار ءَ گْوشتگ کہ چار سال ءَ دْراجیں ودار ءُ بازیں زھرشانیاں ابید آئی ءِ برات یل کنگ نہ بوتگ اَنت – سائرہ بلوچ ءَ گْوشتگ کہ چار سال ءَ اے کسی ءِ ھاتر ءَ لھتے لبز بہ بیت گُڑا مئے واست ءَ ازیت ءَ چہ سرّیچیں ودار اِنت- آئی ءَ دزبندی کتگ آصف ءُ رشید ءَ دیم ءَ بیار اَنت ءُ آیاں اے ازیت ءَ چہ بہ رکین اَنت-

دگہ یک زھرشانی کنوکے ءَ گْوشتگ کہ آئی ءِ برات نعمت اللہ نیچاری سیمی رند ءَ پوج ءَ بیگواہ کتگ، نعمت اللہ نیچاری ءِ سیادانی گوشگ ءِ رِد ءَ اشی ءَ ساری دو رند ءَ آ بیگواہ کنگ ءَ پد یل کنگ بوتگ بلے اے سال جنوری ءَ نعمت اللہ یکرندے پد ءَ پوج ءَ چست کتگ بلے آ تنی وھدے بیگواہ ءَ اِنت-