بیگواھیں مردمانی شُد ھڑتالی بنجل ءَ 4602 سرجم بیتگ، یکجاھی درشانگ ءَ اتکگیں مردمانی تہ ءَ بی ایس او پجار ءِ چیرمین زبیر بلوچ، سی سی باسک سمرین بلوچ، انسانی ھقانی باسک طیبہ بلوچ ءُ دگہ ھوار بیتگ اَنت۔
اے درگت ءَ وی بی ایم پی ءِ وائس چیئرمین ماما قدیر بلوچ ءَ مردماں گوں تران کنان ءَ گُشتگ کہ چیریں ادارگ ءُ ھاکم یک ھاسیں شور ءُ گامگیجے ءِ پد ءَ بلوچ جھد ءِ ھلاپ ءَ ریاستی ڈیتھ اسکواڈ ءُ وتگڑیں پارلیمانی مردمانی کمک ءَ بلوچ راجی جھد ءِ میان اُستمانی پجار ءُ نامداری ءَ کاونٹر کنگ ءُ تھی دروشم ءَ پر ایمنیں جھد ءِ دارگ اِنت، کہ اِشی سوب ءَ بلوچ پُسگانی بیگواہ کنگ بلوچ نسل کشی ءِ تہ ءَ گیشی ءَ ھوار سیاسی باسکاں انگیر کنگ بیگ ءَ اِنت۔
اھد ءِ ھاکم بلوچ نسل کشی ءَ سرکاری وپاداری پیش دارگ ءَ ھچ کمی نیار انت، زورانسری بیگواھیں بلوچ مردماں نمیران کنگ ءُ ھواریں قبرانی تہ ءَ دور دے اَنت دانکہ وتی وپا داری ءَ چہ انسانیت ءَ مستریں جاہ ءَ بہ دے اَنت اے واکدار بلوچ نسل کشی کنگ بلوچ پرزندانی بیگواھی لوگانی سر ءَ بمب گواری ءِ یک دمانے ھم دست ءَ روگ ءَ نئیل اَنت، اشی ءِ تہ ءَ نودربریں گلانی باسکاں سیاسی پاٹیانی باسک نشانک کنگ ءُ شھید کنگ بیگ ءَ اَنت، ءُ آیانی سیاد ءُ وارساں ھوار ھمک زانشتی مردم ءُ ھمک تکءَ سیادی داروکیں مردم آھانی نشانگ ءِ سر ءَ اَنت، ھاسیں پئیم ءَ وانگ جاھانی سرءَ آھانی بیڑانی یکشلی برجاہ اِنت۔
آئی ءَ گُشتگ کہ استانی زوراکی ءَ چہ لیکھی سیاسی باسکانی اوست نزور کنگ نہ بنت کوھلو، پنجگور، مستونگ، خاران، ڈیرہ بگٹی ءُ تربت ءَ چہ بلوچ پُسگانی یکشلیں بیگواھی پاکستانی زلم ءُ زوراکی ءِ درور اَنت۔