نبشتانک آزمانک : سمّی ءِ بے دروریں جُھد
آزمانکار : پراز نور
دی بلوچستان پوسٹ
یک کوچگے ھست اَت کہ آ کوچگ ءَ وانگجاہ نیست اَت اود ءَ گیشتر زھگ چہ وانگ ءَ زبھر اِت اَنت۔ کوچگ ءَ چہ وانگجاہ ءِ راہ کساس 3 کلو میٹر دور اَت بزاں یک دگہ کوچگے ءِ تہ ءَ اَت کہ ھمے کوچگ ءِ تہ ءَ گیشتر مردمانی کار ءُ روزگار گوں کِشت ءُ کِشاری ءَ ھمگرنچ اَت ءُ لھتیں پسانی چارینوک ءُ شوانگ اِت اَنت۔ ھمے کوچگے ءِ تہ ءَ کساس 30 ءَ گیش گْونڈو جنک ءُ بچک ھست اَت کہ آ چہ وتی بُنکّی ھک (وانگ ءَ) زِبھر اِت اَنت۔
سمّی ھمے کوچگے جامنندے اَت ءُ وانگ ءِ سک باز ھب ءُ واھگ داروکے اَت مُدام وتی لوگ ءِ مردمانی گْور ءَ ھمے گْوشتگ اِت ئِے کہ من وان آں ءُ شما من ءَ ماں وانگجاہ ءَ دیم دے اِت بلے سمّی ءِ مات ءُ پِت گریب ءُ دومی نیم ءَ وانگ ءِ ھم ھلاپ اِت اَنت سمّی ءَ مدام تھاری ءَ جیڑ اتگ ءُ وتی ارسیگیں چمّ پھک کُتگ اَت کوچگ ءِ پنچ ءُ شش گْوندو انچیں اِت اَنت کہ آ نزّیک ءُ گْور ءِ کوچگ ءَ پہ وانگ ءِ ھاتر ءَ شُتگ اِت اَنت۔
وھد گْوزان بوت ءُ سمّی ءِ اُمر کساس 12 سال اَت ءُ آئی ءِ وانگ ءِ ھب انگہ برجاہ اَت۔ یک روچے چہ شھر ءَ لھتیں مردم اتکگ ءُ ھمے کوچگ ءَ ترّ ءُ گَرد کُتگ ءُ چار اِت کہ کوچگ ءَ وانگجاہ ھست یا نیست آ مردمانی مول مراد ھمیش اَت کہ ھر جاہ ءَ وانگجاہ نیست اود ءَ وانگجاہ پچ کنگ ءُ چہ وانگ ءَ زِبھریں گْونڈو ماں وانگجاہ آرگ ءُ وانینگ بہ بیت اِے وھد ءَ سمّی اوں گون اَت ءُ گْوشتگ ئِے کہ من ء کساس پنچ سال بیت کہ ودار ءَ آں یکّے بیت ءُ مارا ماں وانگجاہ بہ بارت ءُ بہ وانین ایت مروچی من چہ وتی ھُدا ءَ امیتوار کہ منی واھگ سرجم بیت ءُ من اوں وانگ ءُ زانگ ءِ پِڑ ءَ وتی کِرد ءَ پیش دار آں۔
شھر ءِ مزنیں مردُماں سمّی ءِ واھشت ءُ وانگ ءُ زانگ ءِ ارزشت ءِ توسیپ کُت ءُ باوری دات کہ زُوت شمئے کوچگ ءَ ما وانگجاھے پچ کن ایں ءُ چد ءُ پد شما چہ وانگ زِبھر نہ بہ اِت
اِے گپّانی اُشکنگ پد سمّی باز گل ءُ شاداں بوت چہ شھر ءَ اتکگیں مردماں کوچگ ءِ مردمانی گْور ءَ وانگ ءُ زانگ ءُ دیمروئی ءِ کنگ ارزشت ءُ نپ گْوشتگ اَنت ءُ آیانی تہ ءَ سرپدی ودی کُت کہ بے وانگ ءُ بے زانگ ءَ شما دیمروئی کُت نہ کن اِت شما وتی زھگاں ماں وانگجاہ ءَ دیم دے اِت۔ زُوت شمئے کوچگ ءَ ما وانگجاھے ءِ بِندات کن ایں وتی زھگاں بہ وانین اِت۔
اِے گپّانی اُشکنگ ءُ گوشدارگ ءَ پد کوچگ ءِ مھلوک سرپد بوتگ اَنت ءُ شھر ءِ اتکگیں مردمانی منتوار بوتگ اَنت ھپتگے ءَ پد ھمے کوچگ ءِ تہ ءَ یک وانگجاھے پچ کنگ بوتگ ءُ کساس 35 گْونڈو ھمے وانگجاہ ءِ تہ ءَ اتکگ ءُ دربرگ ءِ ھاترا ساڑی بوتگ 9 سال ءَ بہ گِر داں 14 سال ءِ گْونڈو ماں وانگجاہ ءَ وانگ ءُ دربرگ ءَ اتکگ۔ پیسر ءَ وَ کوچگ ءِ جنکّیں زھگاں نہ منّ اتگ ءُ آیانی پِت ءُ ماتاں اوں نہ منّ اتگ سمّی ءَ گوں ھمے مردمانی ھمرائی ءَ ایشانی جیڑہ گیش ءُ گیوار کُتگ ءُ نوں تیوگیں کوچگ ءِ مردم رازِیگ بوتگ اَنت۔
وھد گْوزان بوتگ ھمے دربرجاہ ءَ چہ کساس 70 ءَ گیش جنک ءُ بچکّاں پنچ تبک ءِ چکّاس ءَ پد شھر ءَ ماں وانگجاہ ءَ شُتگ ءُ ونتگ سمّی اوں اشانی تہ ءَ ھوار اَت۔
سمّی ءَ دہ ءِ چکّاس ءَ گوں شرّیں لمبر ءَ سوبین بوتگ ءُ وتی جھد ئِے برجاہ داشتگ اَت سمّی ءَ مُدام وتی کوچگ ءِ شرّی ءِ ھاتر ءَ جْوانیں گامگیج زُرتگ اَت۔
سمّی ءَ مدام گْوشتگ اَت کہ من مزن بہ آن ءُ یک شّریں رھدربرے ءُ شرّیں رھشونے جوڑ بہ آں انّوں سمّی ءُ جھد ءِ سوب ءَ کوچگ ءِ تہ ءَ ھر زھگ دیمروئی کنگ ءَ اِنت ءُ شھر ءِ تہ ءَ مزنیں شھدربرجاھاں روگ ءَ اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔