بلوچستان ءَ گوستگیں روچ ءَ دو مارچ دود ءُ ربیدگی روچ دارگ بیتگ

بلوچستان ءَ ھوار ءَ بازیں جاھاں نشتگیں بلوچاں دو مارچ ءَ بلوچ دود ءُ ربیدگی روچ داشتگ –

گوستگیں روچ ءَ بزاں دو مارچ ءَ بلوچستان ءِ جتا جتائیں جاھاں بلوچ نودربر گلانی نیمگ ءَ دود ءُ ربیدگی روچ دارگ بیتگ –

اشانی تہ ءَ بلوچ اسٹوڈنٹس ایکشن کمیٹی ءَ کراچی ءَ دود ءُ ربیدگی روچ ءِ درگت ءَ دیوان اڈ داتگ ءُ اشی ءِ ھواری ءَ تربت، شال ھیدر آباد ءُ دگہ دگہ جاھاں بساک ءِ نیمگ ءَ دود ءُ ربیدگی دیوان برجم دارگ بیتگ اَنت-

چرے مراگشاں بازیں کچے ءَ بلوچ نودربراں بھر زرتگ ءُ مراگشاں دود ءُ ربیدگی چیزاں ھوار جتاجتائیں بنگپانی سر ءَ تران بیتگ اَنت-

ھمے وڑ ءَ بلوچ پھناتاں چاگردی رسانکجاھاں ھم بلوچ دود ءُ ربیدگی ھیش ٹیگ کارمرد بیتگ ءُ ھیش ٹیگ ٹرنڈ چل اِتگ –

چاگردی رسانکجاھاں بلوچ دود ءُ ربیدگی روچ ءِ درگت ءَ بلوچاں ھوار دگہ راجاں ھم اے روچ ءَ پہ بلوچاں ھمدردی درشان کرتگ ءُ روچ ءِ ستاہ شانی کرتگ-

زانگ بہ بیت دو مارچ دود ءُ ربیدگی روچ اولی رند ءَ سال دوھزار ءُ دَہ ءَ بی ایس او آزاد ءِ ھزدار ھنکین ءِ نیمگ ءَ برجم دارگ بیتگ اَت کہ اے مراگش ءَ بمب چگل دیگ بیتگ اَر ءُ چریشی ءَ وانندہ گل ءِ باسک سکندر بلوچ ءُ جنید بلوچ نمیران بیتگ اِت اَنت ءُ بازیں کسے زدگ بیتگ اَت –

چرے بمب تراک ءَ پد اے بمب ءِ بھتام سرکاری چیریں ادارھانی سر ءَ لڈگ بیتگ اَت کہ سیاسی گلاں اے گوشتگ اَت اے بلوچ دود ءُ ربیدگی روچ ءِ بگیر ءُ بلوچ ءِ نہ منوکیں مردماں کرتگ-

ھمے وڑ دو مارچ ءِ روچ ءِ درگت ءَ کراچی ءَ جن قونصل ءِ جنرل بولگر زیگلر ءُ آئی ءِ لوگی کالڈیا زیگلر ءَ بلوچی گُد گور ءَ کرتگ ءُ دراھیں بلوچاناں اے روچ مراد باتی گوشتگ-

اے درگت ءَ جرمن قونصل ءِ جنرل ءَ بلوچی پوشاکانی ھواری ءَ جرمن قونصل ءَ گپ کنوکیں ملازمانی گون ءَ ھم بلوچی زبان ءَ گوں گپ جتگ-