سیندک: چینی کمپنی ءِ بگیری ءَ بلوچ زالبولاں زھرشانی کتگ ءُ روانکے کش اِتگ

بلوچستان ءِ دمگ چاگی ءَ سُھر ءُ آسن ءِ درکنگے جاہ سیندک ءَ کار کنوکیں چینی کمپنی ءِ نیمگ ءَ کرونا وائرس ایس او پیز ءِ نام ءَ دمگی مردمانی سُر پُر ءِ سر ءَ بندش، قرنطینہ ءِ نام ءَ ماھے ماہ کارکنوکاں بند کنگے بگیری ءَ آھانی کھولانی نیمگ ءَ زھرشانی ءِ درچ یکشل ءَ برجاہ انت –

چینی کمپنی ءِ پالیسیانی بگیری ءَ زھرشانی گوستگیں روچ ءَ زالبولانی نیمگ ءَ بندات کنگ بوتگ – مروچی زالبولاں دہ کلومیٹر ءَ روانک کش اِتگ ءُ وتی زھرشانی نبشتہ کنائینتگ وھدیکہ دومی نیمگ ءَ کارکنوکاں کمپنی ءِ تہ ءَ ھم زھرشانی کتگ –

اھوالکار ءِ رِد ءَ زھرشانی ءَ پد سیندک پروجیکٹ ءِ تہ ءَ واکداراں ڈی ایس ایل انٹرنیٹ ءُ بجلی ءِ بند کنگ ءَ پد کمپنی ءِ موبائیل نیٹ ورک ھم بند کتگ انت کاردار ڈن ءَ ھال اھوال کرت نہ کناں –

دمگی اھوالکار ءِ رِد ءَ چینی کمپنی ءِ اے امل ءَ چہ ھمے زاھر بیت آ زالبول ءُ کاردارانی زھرشانی چیر ترینگے کوشست انت –

اھوالکار ءِ رد ءَ زالبولانی زھرشانی ءَ زھگ ھم گون بوتگ انت کہ آھاں چینی کمپنی ایم آر ڈی ایل ءُ پاکستان اپسرانی بگیری ءَ نارہ جتگ –

زانگ بہ بیت سیندک کمپنی ءَ کرونا ءِ نام ءَ دمگ ءِ دکان ءُ اسکول بند کرتگ انت وھدیکہ گوستگیں بازین ماھاں کاردارانی گِس ءِ روگے سر ءَ ھم بندش جنگ بوتگ وھدیکہ دمگی کاردارانی ءُ پروجیکٹ ءِ مزورانی رِد ءَ واکداراں آ ایس او پیز نام ءَ بندیگ کرتگ انت –

دمگی کاردار ءِ رِد ءَ سیندک پروجیکٹ کار کنوکیں بازیں جارداراں وتی استعفی داتگ بلے واکدارانی رویش ءَ ھچ کمی نہ اتکگ –

زھرشانی کنوکانی گوشگ ات کہ آھانی مردیناں شش شش نھ نھ ماہ ءَ گسانی آھگ ءَ نیل انت وھدیکہ دمگی مردماں سیندک نادراھجاھے رؤگے اجازت ھم نیست ءُ سرجمیں دمگ ءَ ایس او پیز نام ءَ دمگی مردمانی سُرپُرانی سر ءَ ھم بندش جنگ بوتگ –