بلوچستان ءِ بنجاھی شھر شال ءَ شمبے ءِ روچ ءَ ناکو ءَ تیرگواری کرتگ ءُ براتزتک کُشتگ –
تیرگواری ءِ وئیل شال ءِ دمگ سریاب مل ءَ صدام پھاٹک ءِ نزیک ءَ پیش اتکگ – پولیس ءِ رد ءَ زالبول سیاھکاری ءِ بھتام ءَ کُشگ بیتگ ءُ کوشکار آئی ءِ ناکو اِنت-
جرمکار ءِ پجار جھانگیر ءِ نام ءَ زانگ بیتگ ءُ پولیس ءَ ارزی نبشتہ کرتگ ءُ جرمکار ءِ پٹ ءُ پول بندات کرتگ بلے داں انگت ءَ دزگیریانی ھال نیتکگ اَنت-
زانگ بہ بیت بلوچستان ءَ ھمک دومی روچ ءَ وئیل گندگ ءَ کاینت- سال دوھزار ءُ یازدہ ءَ شنگ بیتگیں رپورٹے ےِ رس ءَ بلوچستان ءَ ھمک دومی روچ ءَ یک نا یک زالبولے کُشگ یا لٹ ءُ کُٹانی دیمپان بیت اِنت-
بلوچستان ءَ گوستگیں دوازدہ ماھانی وھداں لَٹ ءُ کٹی یک سد ءُ بیست ءُ نُھ وئیل یاداشت کنگ بیتگ اَنت کَچ ءُ کساسی ءَ درست رپورٹ بیتگیناں -اے وئیلاں پنجاہ ءُ ھپت زالبول ءُ بیست ءُ یک مردین کُشگ بیتگ اَنت اشانی تہ ءَ بیست ءُ ھشت زالبول بیست ءُ یک مردین گیرت نام ءِ سر ءَ کُشگ بیتگ اَنت دو زالبول لوگی جیڑھاں تنگ اتکگ ءُ وتکشی اش کرتگ-
بیست ءُ ھشت زالبول لوگی جیڑھانی سبب ءَ لَٹ ءُ کُٹ کنگ بیتگ اَنت ھشت زالبول آوار جنگ، بیست ءُ نُھ کُشگ، زالبول ءُ زھگانی گون ءَ جنسی زوراکی ءِ نشانگ پنچ وئیل رپورٹ بیتگ اَنت، وھدیکہ ترس آماچی ءِ ھشت وئیل رپورٹ بیتگ اَنت – اے وئیلانی تہ ءَ سِی ءُ سَے شال ءَ رپورٹ بیتگ اَنت، سِی وئیل نصیر آباد ءَ پیش اتکگ اَنت، یازدہ وئیل مستونگ ءَ رپورٹ بیتگ اَنت –