بلوچستان ءِ دمگ بارکھان ءَ چہ دگہ دو چاگردی باسک ناشناسیں مردماں آوار جنی ءَ بیگواہ کُتگ اَنت کہ اِشانی ھندی چاگردی گل ءِ سروک ھم ھوار اِنت۔
اھوالانی ردءَ بارکھان نوجوان اتحاد ءِ سروک شاہ زین بلوچ ءُ آئی ھمراھیں نسیم بلوچ چہ بارکھان ءَ بیگواہ کنگ بیتگ اَنت، شاہ زین کھیتران ءُ آئی سنگت نسیم بلوچ گوستگیں شپ ءَ بیگواہ کنگ بیتگ اَنت۔
اھوالانی ردءَ بارکھان ءِ نان لوکل جیڑھانی سرءَ شاہ زین ءَ بارکھان ءِ مھلوک یکجاہ کنگ ءُ آھاں راجی جیڑھانی سرءَ یکجاہ کنگ ءِ ھاترءَ جھد کنگ ءَ بیتگ۔ ھمے زیتاں شاہ زین بارکھان نوجوان اتحاد ءِ پلیٹ فارم سرءَ بلوچ دودربیدگی روچے دارگءِ کارانی تہءَ دزگٹ بیتگ۔
زانگ بہ بیت چریشی ءَ پیسر چہ بارکھان ءَ ڈاکٹر جمیل بلوچ ھم بیگواہ کنگ بیتگ اَت، ایم فل ءِ سند گروگیں ڈاکٹر جمیل نیشنل ڈیموکریٹک پارٹی ءِ باسک اِنت۔
بیگواہ بیتگیں ورناھانی زورانسری بیگواھی چاگردی ءُ سیاسی گلاں سیادی داروکیں مردماں ایر جتگ ءُ تُرس ءِ درشان کُتگ۔ ھندی اھوالانی رد ءَ اے ورناھاں نان لوکل ڈومیسائل ءِ جیڑہ ءِ سرءَ توار چِست کنگ ءِ سوب ءَ تاگت وریں مردمانی گُشگ ءِ پدءَ بیگواہ کنگ بیتگ بلے داں انگت اے درگت ءَ واکدارانی ھچ پئیمیں لیکہ دیما نئیتکگ۔