پہ آجوئیں سرڈگارے ءَ نمیرانی پہ ما پھر ءُ شانے ھبرے ءُ کُل شھیداں ” رژن ء آجوئی ” ءِ ستائی ءِ نام ءَ شکساھگ ءِ جار ءَ جن ایں۔ مرید بلوچ
بلوچ سلاہ بندیں گل بی این اے ءَ وتی شنگ کرتگیں درشانی ءَ گوشتگ 23 فروری ءَ کیچ ھوشاپ ءِ کوھی دمگ ساتک کؤر ءَ گَل ءِ چیرجنگی بنجلے ءِ سر ءَ زورگیریں پاکستانی ڈرون بالگرداں سئے میزائل آس داتگ کہ چہ کیمیکل مواد ءَ پُر بوتگ اَنت ءُ آھاں یک مزنیں پَرگِنَگے تباہ کتگ ۔ ھمے جاہ ءَ مَچ ءُ آدگہ باگ ءُ درچک ءُ دار سرجم ءَ ستکگ ءُ پُر بوتگ اَنت۔
بی این اے جارکش مرید بلوچ ءَ گوشتگ کہ چہ ڈرون میزائل اُرشاں پد زورگیر ءِ زمینی لشکر ءَ بنجل چہ چاریں آتراپاں انگِر کنگ ءِ جھد کتگ ءُ ھشت ءَ گیش جنگی بالگردانی کمک ءَ وتی کارمند بنجل ءِ دری ءُ اندری راھاں ایر کتگ اَنت ۔ میزائل اُرش آں گَل ءِ دو کماندار ماسٹر آسپ بلوچ ءُ سراج زھیر ءَ ھوار پنچ سنگت نمیران بوتگ اَنت ءُ دگہ پنچ سنگت ءَ سھب ءِ پنچ ءَ داں بیگاہ ءِ چار ءَ گوں زورگیریں دژمن ءَ دیم پہ دیم جنگ کتگ ءُ ھمے نیام ءَ لشکر ءِ بازیں کمانڈو مردار بوتگ اَنت ءُ وت پہ یک بے مُلیں آجوئیں سرڈگارے ءِ ھاترا کربان بوتگ اَنت ءُ داں ابد نمیران بوتگ اَنت۔
نمیران بوتگیں بلوچ پُسّگ کماندار ماسٹر آسپ پنام ماسٹر مکیش ء مھمد رزا جھمنند شاپک ھوشاپ دمگ ءِ آپریشنل کیمپ کماندار ءُ گَل ءِ مرکزی سرءُ سوجی ٹولی ءِ باسکے بوتگ۔ ءُ آ یک ٹیچرے بوتگ کہ آئی ءَ 2002 ءَ یک ماسٹرے ءِ بستار ءَ وتی وانینگ ءِ کار بندات کتگ ھمے میان ءَ آئی ءَ وتی راجی زمہ واریانی رِد ءَ وتی نودربراناں پاکستان ءِ دروگیں کتابانی وانینگ ءِ بدل ءَ راجی ایردستی ءُ راجی آجوئی ءِ بابت ءَ درونت داتگ اَنت ۔ چہ 2015 ءَ پہ راجی آجوئی ءَ آئی ءَ سیاسی گھگیری پہ وت درچتگ ات ءُ چد ءُ پد آ سلاہ بندیں جنگ ءَ ھوار بوتگ ات۔ 2017 ءَ پسنی شادی کؤر ءَ گَل ءِ کماندار جمیل پنام کیّا ءِ چار سنگتاں ھوار نمیرانی ءَ پد ماسٹر آسپ آئی ءِ جاہ ءَ گَل ءِ ھوشاپ دمگ ءِ آپریشنل کماندار نامینگ بوتگ ات کہ چہ نمیرانی ءَ آئی ءَ زمہ واری شریں دروشمے ءَ پیلو کتگ اَنت آ یک جوانیں استادے ءُ جنگی کماندارے بوتگ۔ نمیران بوتگیں دومی کماندار سراج زھیر پنام زھیر سائب ء رشید جھمنند شاپک ڈانڈل چہ 2011 ءَ سلاہ بندیں جھد ءَ ھمگرنچ بوتگ۔ آ چہ 2015 ءَ بستار ء کماندارے بلوچستان ءِ بازیں جاھاں وتی زمہ واریاں پیلو کنگ ءَ بوتگ۔ آئی ءَ را ھمے زوتاں گل ءِ ھوشاپ ءُ گورکوپ دمگ ءِ آپریشنل بنجل کماندار نامینگ بوتگ ات۔ آ بلوچی زبان ءِ جوانیں شائرے ءُ یک جوانیں جنگجوے بوتگ۔
جنگی ھان پنام ھیسا ء ماسٹر ھسا جھمنند شاپک چہ کسان سالی ءَ نودربر سیاست ءَ ھمگرنچ بوتگ۔ کہ 2014ءَ سلاہ بندیں جھد ءَ ھوار بوتگ ءُ پت ءُ ماتانی یکیں بچ بوتگ۔ جنگی ھان یک جوانیں جنگولے بوتگ ءُ ھمے زوتاں سراج زھیر بنجل ءِ سکینڈ کماندار نامینگ بوتگ اَت۔
کماش ملنگ پنام ماما ء یاکوب جھمنند شاپک چہ 2014ءَ سلاہ بندیں جھد ءَ ھمگرنچ بوتگ ۔ پیرمردی ءَ بے کِمار آ یک دلیر ءُ اوپارکَشّیں سرمچارے بوتگ آ دژمن ءِ ءُ نام گپتیں سی پیک ءِ بگیری ءَ بازیں جنگاں ھوار بوتگ۔ کمال جان پنام گلاب ء مھمد سئیت جھمنند اومری کھن شاپک چہ 2019 ءَ سلاہ بندیں جھد ءَ ھمگرنچ بوتگ ءُ زمین ءِ یک راستیں شیدا ءُ دلیریں سرمچارے بوتگ۔ دلجان پنام نزیر ء میران جھمنند سنگ آباد تجابان 2018ءَ گوں سلاہ بندیں جھد ءَ ھمگرنچ بوتگ آ یک زانتکاریں جنگولے ءُ زمین ءِ دلیریں پسگے بوتگ۔ 2021 ءَ آئی ءِ یک براتے ھلیپ استانی کشندہ ٹولی ءِ اُرش ءَ شھید بوتگ ات ءُ یک براتے انگت اِستانی زندانان انت۔ آرپ جان پنام میرھان ء پکیر جھمنند آپسر تربت 2020ءَ گوں سلاہ بندیں جھد ءَ ھمگرنچ بوتگ۔ یک ھنر زانت ءُ دلیریں سرمچارے بوتگ۔ منیر جان پنام جُمّا ء درمھمد جھمنند ھوشاپ دَمب 2016ءَ گوں سلاہ بندیں جھد ءَ ھوار بوتگ ءُ دژمن ءِ بگیریں بازیں جنگاں ھوار بوتگ یک دلیر ءُ ناترسیں پُسگے بوتگ۔ شھیب پنام سراج ء ائیدمھمد ،دولت پنام چراگ ء ایسُپ جھمنند ھوشاپ دَمب چہ گوستگیں یک سالے ءَ گوں گل ءَ ھمگرنچ بوتگ اَنت آ سرڈگار ءِ شیدا ءُ دلیریں سرمچار بوتگ اَنت۔ کُل پُسّگاں پہ سرڈگار ءِ آجوئی ءِ ھاترا جاڑیگی ءُ سرانی دیمونیانی سَوَب ءَ گَل پہ آھاں “رژن ءِ آجوئی” ءِ ستائی نام ءَ شکساھگ ءِ جار ءَ جنت۔ ما تچک ءَ گوشگ لوٹیں کہ گوستگیں روچاں تمپ ءَ نمیران بوتگیں کماندار نور سلام نور ءُ ھمراھانی شھیدی اوں چہ ڈرون اُرش ءَ بوتگ وھدیکہ اے ڈرون ٹیکنالوجی زورگیریں اِستان ءَ چہ چین ءُ ترکی ءِ نیمگ ءَ دیگ بوتگ اَنت۔ ما گوں آ دگہ گھگیری گَل آں اوں دزبندی کن ایں کہ آ چہ اِستان ءِ اے نوکیں ٹیکنالوجی ءَ ھژار بہ بنت۔ ما یک رندے پد ءَ کؤل کن ایں کہ دژمن ءِ بگیری ءَ مئے جھد گوں مزن جزبگاں برجاہ مان ایت۔ نمیران بوتگیں کماندارانی جاھاں نوکیں کماندار دارگ بوتگ ءُ دژمن ءِ بگیری سلاہ بندیں جھد ءَ برجاہ دار اَنت۔
دیمونیانی دِْرچ داں بلوچستان ءِ آجوئی ءَ برجاہ مان ایت۔