چمن ءَ باب دوستی کِشک گوستگیں روچاں پاکستانی ءُ اوگان لشکریانی نیام ءَ سیمسری میڑ ءَ پد دومی روچ ءَ ھم پہ رپت ءُ آمد ءَ بند اِنت۔
پاکستان اوگانستان باب دوستی ءِ سرءَ دوھیں نیمگ ءَ چہ لس مردم دارگ بیتگ اَنت وھدیکہ چمن واکداراں سیمسرءِ سرءَ کجام ھم پئیم روگ آیگ ءِ سرءَ بندش جتگ۔
زانگ بہ بیت گوستگیں روچءَ چمن سیمسر ءِ سرءَ اوگان لشکر ءُ پاکستانی ایف سی ءِ نیام ءَ جنگ بیتگ کہ اِشی تہءَ دوھیں نیمگاں چہ کارمندانی جانی تاوان ءِ ھال دیما اتکگ اَت۔
گوستگیں روچے وئیل ءَ پد پاکستانی دفتر خارجہ ءَ رسانکداں تران کنان ءَ گُشتگ کہ اوگان طالباناں پاکستانی سیمسرانی سرءَ ابید قانودی چیک پوسٹ بندگ ءِ کوشست کُتگ کہ پاکستان ءِ نیمگ ءَ دارگءَ پد اوگان لشکریاں تیر گواری کُتگ وھدیکہ طالبان سرکارءَ پاکستانی دفتر خارجہ ءِ درشان رد کُتگ ل۔
اوگانستان ءِ سرکار پاکستان ءِ سیمسری ھند ءَ مانگیشیتگ گُش اَنت ءُ اوگانستان ءِ بھر نامین اَنت۔
اوگان سرکار ءِ جارکش ذبیح اللہ مجاھد ءَ وتی درشان ءِ تہءَ گُشتگ کہ آ سیمسری وئیل ءِ درگت ءَ پَٹ ءُ پول کنگ ءَ اَنت، وھدیکہ آھاں اے درگت ءَ گُشتگ کہ پاکستانی لشکریاں پیسر اوگان لشکریانی سرءَ تیر گواری کُتگ۔
وھدیکہ گوستگیں روچے میڑانی تہءَ دوھیں نیمگ ءَ لس مھلکواں ھم جانی تاوان رسگ ءِ ھال اِنت ءُ اے ھم ھال اِنت کہ وئیل ءَ پد لشکریاں درستیں نادراھجاھاں ایمرجنسی ھم جتگ۔