ڈاکٹر جمیل زوت یل کنگ بہ بیت – اسلم رئیسانی

بلوچستان ءِ گوستگیں سروزیر نواب اسلم رئیسانی ءَ ڈاکٹر جمیل ءِ زورانسری آوار جنی ءِ بگیری ءَ چاگردی ترامجاہ ٹویٹر ءَ ٹویٹ کُتگ ءُ گوشتگ کہ کانود ءِ پلامرزی نہ کنوکیں ادارھاں بارکھان ءَ ڈاکٹر جمیل زورانسری آوار جتگ ءُ بیگواہ کتگ کہ ایرجنگی کارے ءُ انسانی ھکانی ھلاپ انت –

اسلم رئیسانی ءَ گوشتگ کہ استانی زوارکیاں چہ تُرس ءِ پیداک بیت کنت، ابید کانود آوار جنی ءُ کُشت کوش جاورھالاں ھراب کرت کنان – زوتاں زوت اے مرد یل کنگ بہ بیت –

ھمے وڈ پشتون رھشون افرسیاب خٹک ءَ ھم ڈاکٹر جمیل ءِ زورانسری آوار جنی ایرجتگ ءُ گوشتگ کہ بلوچ ورناھانی بگیری ءَ ریاستی زوراکی ءِ یک دگہ درورے –

آئی ءَ گوشتگ کہ زورانسری آوار جنگ بوتگیں مردمانی کھول ءِ زند ازاب ءِ تہ ءَ گوزگ انت –

زانگ بہ بیت ڈاکٹر محمد جمیل ء جمعہ خان بلوچستان ءِ دمگ بارکھان ءِ جاھمنند انت ءُ آئی سیادی چہ نیشنل ڈیموکریٹگ پاٹی انت –

آئی ءِ پاٹی ءَ ڈاکٹر جمیل ءِ زورانسری آوار جنی راست ھبر راست کُتگ گوشتگ کہ آ ناشناسیں مردماں چہ وتی جندے کارگس ءَ آوار جتگ ءُ گوں وت برتگ کہ پدا رند ءَ آئی ءِ ھچ ھال اھوال نیست –

پولیس ءِ رِد ءَ آھاں ڈاکٹر ءِ آوار جنی ءِ ھال سربوتگ کہ چریشی ءَ پد ارزی نبشتہ کنگ بوتگ – پولیس ءِ رِد ءَ اے درگت گیشیں کاروائی کنگ بیت اتنت ءُ اگاں چیزے بوت گڈا آئی کھول سرپد کنگ بیت انت –