بمبور لشکر کشی ءَ زورگیریں پوج پدکنزینتگ – یوبی اے

یونائیٹڈ بلوچ آرمی ءِ جارکش مزار بلوچ ءَ رسانکدراں وتی شنگ کرتگیں درشان ءِ تہ ءَ بمبور لشکر کشی ءِ سرجمیں ھال شنگ کرتگ ءُ گوشتگ کہ بیست فروری سھب ءِ ادار دہ ءُ پانزدہ ءَ زورگیریں ریاست ءِ پوج ءَ بمبور ءَ مئے اوتاگ ءِ انگر کنگ ءِ کوشست کُتگ کہ آئی ءِ زمینی پوج ءَ بالگردانی کمک ھم گون بوتگ ھمے میان ءَ دژمن پوج ءُ سرمچارانی ءَ میڑ ءِ بندات بوتگ کہ سرمچاراں جوانیں جنگی رپک ءُ ھنراں دژمن ءِ انگیر پُروشتگ ءُ سنگر گپتگ ءُ لشکر کشی ءِ اولی روچ ءَ دژمن پوج ءِ اسپشل سروس ٹولی (ایس ایس جی) ءِ کپٹن حیدر عباس ءَ ھوار پنچ کارمند کُشتگ انت وھدیکہ کہ زورگیری پوج ءَ وتی لشکر کشی ءِ تہ ءَ گیشی آورتگ ءُ دومی روچ ءَ بزاں بیست ءُ یک فروری ءَ تاں برجاہ دارگے کوشست کُتگ –

جارکش ءَ گوشتگ کہ لشکر کشی ءِ میان ءَ جنگی بالگرد ءُ زمینی پوج ءِ تہ ءَ دژمن ءَ گیشی آورتگ ءُ کالانی، برو، چٹی ءُ مولو ءَ لشکر کشی کنگے ناکامیں کوشست ءِ کُتگ ھمے میان ءَ سرمچاراں جوانیں جنگی رپک ءُ ھنراں گوں زورگیریں پوج ءِ دو کارمند دومی روچ ءَ ھم جتگ –

آئی ءَ گوشتگ کہ زورگیریں پوج ءَ وتی جزبگانی ءِ بُرز کنگ ءُ وتی سپاھیانی دلبڈی دئیگے ھاتر ءَ پاکستانی رسانکدرانی تہ ءَ دروگیں پرپکنڈہ کُتگ ءُ مئے شش سرمچارانی کوش ءِ ٹاہ ھم داتگ وتی ھمے دروگیں درشان گیش تالان کُتگ کہ زورگیریں ریاست ءِ پالیسیانی یک بھرے وھدیکہ سیمی روچ ءَ ھم پاکستانی زورگیریں پوج ءَ اے لشکر کشی ءِ تہ ءَ بے سوبی دیمپانی کنگ کپتگ ءُ آئی ءَ لشکر کشی ھلاس کنگ کپتگ –

جارکش ءَ گڈسر ءَ وتی درشان ءِ تہ ءَ گوشتگ کہ مئے سرمچار بلوچستان ءِ آجوئی ءَ تاں دژمن ءَ ھر وڑیں جنگاں بے سوب کنگے اھد کن انت –