بلوچستان لبریشن فرنٹ ءَ وتی جنوری 2022 ءِ جنگانی گزارش شنگ کرتگ بی ایل ایف ءِ جارکش میجر گْوھرام ءَ پہ رسانکدر ءَ پاکستانی لشکر ءُ دگہ واکانی بگیری ءَ وتی جنوری ءِ ماہ ءَ بیتگیں میڑانی سرجمیں ھال شکساتگ اَنت، اے گزارش ءِ پجیگ ءَ میجر گْوھرام ءَ گْوشتگ جنوری ءِ ماہ ءَ گوں بی ایل ایف ءَ ھمگرنچیں بلوچ سرمچاراں پاکستانی لشکر، آئی ءِ چاریگ ءُ کمک کنوکانی سر ءَ 12 مرگ گْواریں ارش کرتگ اَنت چہ اے اُرشاں 32 پاکستانی لشکر ءِ سپاھیگاں گیش مرتگ ءُ بازینے ٹپی بیتگ اَنت ۔اے اُرشاں پاکستانی لشکر ءِ دو چاریگ ھم کشگ بیتگ اَنت۔
25 جنوری 2022 ءَ سبدان ءِ میڑ ءَ گوں زورگریں لشکر ءَ مڑان بی ایل ایف ءِ باسک ممتاز پنام بالاچ شھید بیتگ، اے میڑ ءَ بلوچ سرمچاراں دژمن ءِ 17 کارمند کشتگ اَنت ءُ آیانی درسیں سلا ءُ دگہ لشکری سامان دستیگ کرتگ اَنت ءُُ آیانی بنجل آس داتگ۔
ھما کس کہ گوں وتی بلوچی ھڈ ءُ ھوناں پاکستانی لشکر ءَ کمک کنگ ءَ اَنت، چاریگی کنگ ءِ پجیگ ءَ زرمبشت ءِ بگیری ءَ دگہ ناشریں کاراں ھوار اَنت، آ وتی دستاں چہ بلوچ دژمنیں کاراں بہ کش اَنت، زیردستی ءِ لوپ کہ بلوچ ءِ گٹان اِنت ایشی ءَ مھرتر مہ کن اَنت بلکیں پہ بلوچ ءِ راجی آجوئی ءَ وتی کرد ءَ پیلو بہ کن اَنت داں آیوکیں پدریچ چہ آیانی کردگاراں پشومان مہ بیت۔
میجر گْوھرام ءَ گْوشتگ سرمچاراں دژمن ٹپ ماں ٹپ پروش داتگ چہ ایشی ءَ دژمن ءِ ھوش برگشتگ ءُ آ ھاٹیگ ءَ دیم داتگ۔ دژمن دل پٹ اِنت پمیشکا آئی ءِ سپاھیگ ءُ لشکری سروگان وت کشی کنگ ءَ اَنت ءُ چہ وتی بنجلاں تچک ءَ اَنت۔
جارکش ءَ دیمتر ءَ گْوشتگ آجوئی ءِ اے جنگ ءَ چہ ایشی ءَ ابید راھے نیست کہ درسیں بلوچ ھم پت بہ بہ اَنت ءُ جھد بہ کن اَنت، داں شھیدانی ھون، راج ءُُ ھمبلانی دیمونیانی برورداں نوک ءُُ رژنائیں بامے بہ آس ایت۔
میجرگْوھرام ءَ چہ راج ءَ دزبندی کرتگ کہ آ وت ءَ چہ لشکری ماڑی، بنجل، پانگس ءُُ لشکری کارواناں دیر بہ دار اَنت پرچا کہ سرمچار ھر وھد ءَ پاسیگ اَنت ءُُ دمانے کہ آیاں وار بہ رس ایت دژمن ءَ نشانگ کن اَنت۔
بی ایل ایف ءِ جارکش ءَ گْوشتگ داں کہ بلوچستان ءَ آجوئی ءِ بام ءَ نہ داتگ زورگریں پاکستانی لشکر ءِ سر ءَ بلوچ سرمچارانی ترندیں ارش برجاہ مان اَنت۔