آئی ایس پی آر ءَ تربت ءَ دہ آجوئی لوٹوکیں مردمانی کوش ءِ ٹاہ داتگ

پاکستانی پوج آئی ایس پی آر ءَ مروچی تربت ءَ دہ بلوچانی سرمچارانی کوش ءِ ٹاہ داتگ –

آئی ایس پی آر ءِ رِد ءَ بیران بوتگینانی تہ ءَ بلوچ سلاہ بندیں گل ءِ کماندار آصف پنام مکیش ھم ھوار انت –

بلے تنی وھدی بلوچ آجوئی لوٹوکیں سلاہ بندیں گلانی نیمگ ءَ اے درگت ءَ ھچ وڈیں درشان شنگ نہ کُرتگ –

آئی ایس پی آر ءِ رِد ءَ سیکورٹی پوج ءَ بلوچستان ءِ دمگ ہوشاب ءَ آجوئی لوٹوکیں سرمچارانی اوتاگ ءِ ھال رس اتگ گڑا انٹلی جنس بیس رِد ءَ آپریشن کُتگ –

آئی ایس پی آر ءِ رِد ءَ بازیں تیرگواری ءَ پد کماندار آصف پنام مکیش ءَ ھوار دک مردم بیران بوتگ انت –

آئی گوشتگ کہ بیران بوتگیں مردم بلوچستان ءِ دمگ تربت ءُ پسنی ءَ پوج ءِ سرا بوتگیں اُرش تیر گواریاں دست مان بوتگ ءُ پوج ءَ اے مردمانی گور ءَ مزنیں کچ ءَ سلاہ ءُ بارود ھم دستیگ کُتگ –

زانگ بہ بیت مروچی بلوچستان ءِ دمگ ہوشاب ءُ تجابان ءِ کوھاں مروچی سھب ءَ پاکستانی پوج ءَ مزنیں کچ ءَ لشکر کشی کُتگ کہ پاکستانی زمینی پوج ءَ بُرزی کمک ھم گون بوتگ –

دمگی مردمانی رِد ءَ مروچی سرجمیں روچ ءَ جنگی بالگرداں ترتاب کُتگ ءُ بازیں دمگاں بالگردانی شیلنگ ھم ھال سربوتگ انت –