امریکہ ءِ پیسرگیں صدر ڈونلڈ ٹرمپ ءَ وتی چاگردی رسانکدر ءِ ایپ لس مردمانی ھاترءَ دیما آرتگ۔
اے ایپ یک شمبے ءِ شپ ءَ امریکہ ءَ ایپل ایپ اسٹور ءَ شنگ کنگ بیتگ اَت ءُ داں انگت گوگل پلے اسٹور ءَ شنگ نہ بیتگ۔
ٹرمپ میڈیا اینڈ ٹیکنالوجی گروپ (ٹی ایم ٹی جی) ءِ نامیئیں شرکت ءَ اے ایپ ءِ پُشت ءَ اَنت ءُ اِشی سی ای او ڈیوین نیونز ءَ رسانکدراں گوں گپ کنان ءَ گُشتگ کہ ایپ داں انگت سرجمی ءَ ساڑی نہ بیتگ۔
آئی ءَ گُشتگ کہ ما ھمے ھپتگ ءَ اِشی ءَ ایپل ایپ اسٹوراں مردمانی ھاترءَ دیما آرگ ءَ اِنت ءُ مئے ھیال اِنت کہ مارچ ءِ گُڈسرءَ کم چہ کم امریکہ ءَ اِشی ءَ سرجمءَ کارآمد کنیں۔
اکتوبر 2021 ءَ ڈونلڈ ٹرمپ ءَ یک درشانے ءِ تہءَ گُشتگ اَت کہ “ماں یک انچائیں جھان ءَ نشتگیں کہ تالبانی ٹوئیٹر سرءَ مزنیں کچے گندگ بیت، بلے پدا ھم شمے دلدوستیں امریکہ ءِ صدر ھاموش کنگ بیتگ۔ اے قبول نہ اِنت”۔
آئی ءَ گُشتگ اَت کہ “من ھمے زیتاں ٹروتھ سوشل ءِ سرءَ وتی اولی راستی ءَ دیم دیگ ءِ ھاترءَ پُر جزبگاں”۔
آئی ءَ گُشتگ اَت کہ “من باز زیت ٹروتھ سوشل ءِ سرءَ وتی ھیالانی درشان کنگءُ مزنیں ٹیک آنی ھلاپ مڑگ ءِ ھاترءَ جزبگاں چہ چکار آں”۔
زانگ بہ بیت کہ ٹوئیٹر ءُ فیسبوک ءِ نیمگ ءَ پیسرگیں امریکی صدر ءِ اکاونٹس 8 جنوری ءَ ھما وھدءَ سرجمءَ بند کُتگ اِت اَنت کہ وھدے واشنگٹن ءَ کیپیٹل ہل ءَ آئی باسکاں پُرشت پروش کُتگ اَت کہ اِشی سوب ءَ یک پولیس کارمند ءِ بیران ءُ پنچ مردم ٹپی بیتگ اِت اَنت۔
اسنیپ چیٹ ءَ ھم پیسرگیں صدر ءِ اکاونٹ لاک کُتگ وھدیکہ یوٹیوب ءِ اکاونٹ ھم بند کنگ بیتگ اَت۔