ھرنائی ءَ سی ٹی ڈی ءَ سلاہ بندیں گلاں بندوکیں سَے مردم گوں ھمراھاں دزگیر کنگ ءِ ٹاہ داتگ

کاؤنٹر تیررزم ڈیپارٹمنٹ (سی ٹی ڈی) ءَ ٹاہ داتگ کہ بلوچستان ءِ دمگ ھرنائی ءَ یک بیڑے ءَ زیارت ریزیڈنسی ءِ اُرش ءَ ھواریں ءُ ریڈ بک ءَ ھواریں نامی ئیں سَے مردم دزگیر کتگ اَنت ءُ آیانی گور ءَ سلاہ دزکپتگ اَنت-

سی ٹی ڈی ءِ جارکش ءَ اے ٹاہ داتگ ءُ گوشتگ کہ بلوچستان ءِ دمگ ھرنائی ءِ ھند شاھرگ ءَ ھال سر بوتگ کہ ریڈ بک ءَ ھواریں زیارت ریزیڈنسی ءَ ھواریں اُرشکار بلوچ سلاہ بندیں گلاں سیادی داروکیں در مھمد پنام درو گوں ھمراھانی ھمراھی ءَ جاڑیگ بیگ ءِ ھال بیتگ چریشی ءِ پژدر ءَ بیڑ برتگ ءُ درمھمد گوں سَے ھمراھاں دزگیر کتگ –

آئی ءَ ٹاہ داتگ ءُ گوشتگ اے مردمانی گور ءَ دو ایس ایم جی، پنچ گرینیڈ، سَے سیر تراکناکیں شورو، پانزدہ میٹر پرائما کارڈ دزکپتگ اَنت –

سی ٹی ڈی ءِ جارکش ءَ گوشتگ کہ جرمکارانی ھلاپ ءَ تھانہ سی ٹی ڈی سبی ءَ ارزی نبشتہ کرتگ ءُ اشانی دگہ ھمراھانی گرگ ءِ واستا بیڑ برگ بنت-

اے گپ ءِ راستی داں انگت ءَ دمگ ءِ نیمگ ءَ کنگ نہ بیتگ ءُ نانکہ دگہ گیشیں اھوال بیتگ اَنت-

زانگ بہ بیت سی ٹی ڈی ءِ بیڑانی سر ءَ بلوچستان ءَ سیاسی پاٹی گیشتر ایراد گرگ ءُ زھر ءِ درشان ءَ کنگ ءَ اَنت کہ سی ٹی ڈی لس مھلوک ءَ گرگ ءُ آیاں کشگ ءُ دیم پہ دیمی میڑ ءِ نام ءَ دیگ اِنت ءُ آیانی گوشگ اِنت اشانی ھواری ءَ بیگواھیں مردم ھم سی ٹی ڈی ءِ پنچگانی ارجان اَنت-