شال ءَ زھرشانی، مکاری ءُ ھُنراں چہ پُرایمنیں جھد ءَ چہ دسکش نہ بہ ایں – ترانکار

وائس فار بلوچ مسنگ پرسنز، نیشنل ڈیموکریٹک پاٹی ءُ بلوچ یکجھتی کمیٹی ءِ نیمگ ءَ زورانسری آوارجنیانی بگیری ءَ توار چست کنگ ءِ سوب ءَ چئیرمین نصراللہ بلوچ ، ماما قدیر بلوچ ، نوابزادہ حاجی لشکری رئیسانی ، سیما بلوچ, بی این پی ءِ رھشون موسی بلوچ، غلام مری نیشنل پارٹی ءِ نصیراحمد شاہوانی، بی ایس او ءِ ڈاکٹر ثمرین، بالاچ قادر ءُ دگرانی نام ءَ واکدارانی نیمگ ءَ ارزی نبشتہ کنگ ءِ بگیری ءَ روانک ءُ زھرشانی کنگ بوتگ –

زھرشانی ءَ وائس فار بلوچ مسنگ پرسنز ءِ چیرمین نصراللہ بلوچ، لاپتہ فیاض بلوچ ءِ لوگبانک، ذاکر مجید ءِ مات، بیگواھیں رشید بلوچ ءُ آصف بلوچ ءِ گوھار سائرہ بلوچ، بیگواھیں کفایت اللہ ءِ لوگبانک، بیگواھیں نعمت اللہ ءِ برات، سیاسی رھشون رمضان ہزارہ، ریڈ ورکر فرنٹ ءِ کریم پرہار، بیبرگ بلوچ ، حوران بلوچ ، نیشنل ڈیموکریٹک پاٹی ءِ بنجاھی رھشون ثناء آزاد بلوچ ءَ ھوار دگہ مردماں وتی ھیال درشان اتگ انت –

زھرشانی ءَ ترانکارانی گوشگ ات کہ نوں سرکار بیگواھیں مردمانی ھاتر ءَ توار چست کنوکانی بگیری ءَ ارزی نبشتہ کنگ ءُ آھاں باگی گوشگ انت تانکہ بیگواھیں مردمانی ھاتر ءَ توار چست کنگ ءَ دارگ بہ بنت کہ پُرایمنیں توار ءَ ایرموش کنگ لوٹ انت کہ ھمینچو ایرجنگ بہ بیت کہ کم انت –

آھانی گوشگ ات کہ اے وڑیں ھُنر ءُ ھیلھاں آ چہ پُرایمنیں جھد ءَ دسکش نہ بنت – آھان بلوچستان ءِ سروزیر ءَ چہ لوٹ کتگ گوشتگ کہ اے ارزی ءِ درگت ءَ نوٹس بہ زور ایت کانودی وڑ ءُ ڈول ءَ اے ارزی ءَ ھلاس بہ کن اَنت –

ترانکارانی گوشگ ات کہ یکرندے پدا ورنایانی زورانسری آوار جنی ءِ تہ ءَ گیشی آرگ بوتگ کہ پدردی یے ھمے زوتاں پنجاہ ءَ گیش بلوچ ورنا زورانسری آوار جنگ ءُ بیگواہ کنگ بوتگ انت کہ آھانی تہ ءَ ابو دبئی ءَ حفیظ زھری، قائداعظم یونیورسٹی ایم فل ءِ نودربر حفیظ بلوچ، منگوچر ءَ اسکول ءِ ماسٹر کفایت اللہ لانگو، چہ پنجگور ءَ ملک میران ءَ ھوار دگہ بازیں مردمے زورانسری آوار جنگ ءُ بیگواہ کنگ بوتگ انت –

آھانی گوشگ ات وفاقی گورنمنٹ نیمگ ءَ جوڑ کنگ بوتگیں کمیشن ءَ ھم بیگواھیں مردمانی کھول ءَ بید تسلی ءَ دگہ ھچ دات کرت نہ کُرتگ، درسیں ادارہ اے گپ ءِ منوگر انت کہ اد ءَ بیگواھیں مردمانی جیڑہ سنگینیں جیڑھے بلے اشی ءَ ابید بیست بیست سالاں مردم آوار جنگ ءُ تھاریں کوٹیاں بندیگ کنگ بنت –

آھانی گوشگ ات کہ بیگواھیں مردمانی کھولاں وتی پنچ روچی پیداک بوتگیں زھگ دگانی سر ءَ گون انت پریات انت بلے بژن کہ ریاست ءَ ھوار ھچ کسی ءِ گوشاں مورے نہ وارت –

ترانکارانی گوشگ ات ھمے زوتاں پنجگور ءُ نوشکی ءِ اُرشاں پد آرمی چیف ءَ تاکت کارمرز کنگ ءِ پیشنکاری داتگ کہ پدردی گپے ما آرمی چیف ءَ گوں ارز کنیں کہ بلوچستان ءَ تاکت ءِ کارمرز کنگ ءَ پھریز بہ کن اَنت بلوچستان ھپتاد ءُ دو سال انت کہ تاکت کارمرز بوگ ءَ انت اشی ءَ ابید بلوچستان ءِ جاورھال روچ پہ روچ ھرابتر بوان انت – تاکت کارمرز ءَ بلوچستان ءِ مھلوک ءِ تہ ءَ نپرت گیش بوتگ کہ پہ بلوچستان ءُ ملک ءِ ھاتر ءَ جوان نہ انت بلوچستان ءِ جاورھالانی شر کنگ ءَ ھاکم ءُ ملکی ادارھاں زانتکاری ءَ گوں پیسلہ کنگی انت بلوچستان ءِ مردمانی احساس مھرومی ھلاس کنگی انت بیگواھیں مردم زوت ءَ زوت یل کنگ بہ بنت زورانسری آوار جنی ءِ گر ءُ دار ءَ گامگیج زورگی انت بلوچستان ءِ مردمانی کانود ءِ تہ ءَ ھکانی اھترام کنگی انت ءُ آھانی گوم ءَ ملک کانود ءِ رِد ءَ سلوک کنگی انت –