بساک: ماتی زبان ءِ میان اُستمانی روچ ءِ درگت ءَ سرجمیں بلوچستان ءَ نیاد برجم داشتگ

بلوچ اسٹوڈنٹس ایکشن کمیٹی ٹنڈوجام ھنکین ءِ نیمگ ءَ 21 فروری 2022 ءَ یک دیوانے برجم دارگ بوتگ کہ آئی ءِ سرھال “ماتی زبانانی میان استمانی روچ ءُ بلوچی، براھوئی زبان ءِ ارزِشت” اَت کہ آئی ءِ تہ ءَ بازیں نودربراں بھر زُرتگ۔ دیوان ءِ گِچینیں مھمان ءُ تْرانکار قاضی اخلاق احمد بیتگ، دیوان ءِ مڑاھداریں مھمان واجہ قاضی اخلاق احمد ءَ ماتی زبانانی میان استمانی روچ ءِ درگت ءَ گپ ءُ تْران کنان ءَ ماتی زبان ءِ ارزشت ءِ درگت ءَ ھم نودربران ءَ سرپدی داتگ۔ گُڈسر ءَ آئی ءَ بلوچ اسٹوڈنٹس ایکشن کمیٹی ٹنڈوجام ھنکین ءِ سنگتانی منتواری گپت۔

ایشی ءَ ابید بلوچ اسٹوڈنٹس ایکشن کمیٹی ٹنڈوجام ھنکین ءِ ساری ئیں کارمستر زبیر گلام ءَ ماتی زبانانی میان استمانی روچ ءِ درگت ءَ وتی بلوچی نبشتانکے ءُ انوگیں کمک کارمستر عرفان بلوچ ءَ براھوی نبشتانکے ونت۔

گُڈسر ءَ بلوچ اسٹوڈنٹس ایکشن کمیٹی ٹنڈوجام ھنکین ءِ کارمستر اللہ داد بلوچ ءَ وتی ھیال درشان کت اَنت ءُ آھوکیں غ مھمان ءُ سنگتانی منتواری ئِے گِپت اَنت۔

بلوچ اسٹوڈنٹس ایکش کمیٹی ءَ بلوچستان ءِ بازیں جاھاں ماتی زبان ءِ روچ ءِ درگت ءَ نیاد برجم داشتگ کہ چریشی ءَ نودربراں بازیں کچے ءَ اے مراگشاں بھر زرتگ –

بلوچ اسٹوڈنٹس ایکشن کمیٹی ءَ وتی شنگ کرتگیں درشانی ءِ تہ ءَ گوشتگ ماتی زبان ءِ درگت ءَ بلوچ اسٹوڈنٹس ایکشن کمیٹی ءَ ڈیرہ غازی خان ھنکین، کوئٹہ ھنکین ، حب چوکی ھنکین، تربت ھنکین، بارکھان ھنکین، خضدار ھنکین، نال ھنکین، حیدرآباد ھنکین، ٹنڈوجام ھنکین ءِ نیمگ ءَ چہ ماتی زبانانی میان اُستمانی روچ ءِ درگت ءَ دیوان ءُ مراگش ءِ اڈ دیگ بیتگ اَنت ءُ اے دیواناں نودربرانی مزنیں کساسے ءَ بھر زورتگ۔