نیشنل ڈیموکریٹک پاٹی ءِ بنجاھی جارکش ءَ ماتی زبانانی میان اُستمانی روچ ءِ درگت ءَ شنگ کرتگیں درشانی ءَ گوشتگ زبان انسان ءِ بنچک ءَ بہ گر داں آئی ءِ زرکاری ءُ شناسکاری ءَ ھوار دراھیں تکاں گوں دیمروئی ءِ مانزمان اِنت، زبان اِنت کجام راج ءِ دود ءُ ربیدگانی زندگ کنگ ءُ راجدپتر ءَ جوانیں رنگے ءَ گندگ بیت اِنت – زبان راجانی بنکی زندگء ءُ پکرانی بنھشت ایرکنوک اِنت –
جارکش ءَ گوشتگ کہ اے روچ ءِ راجدپتر ءَ اگاں چمشانک بہ دے ایں گڑا بنگالی گپ جنوک آ وھد ءَ پاکستان ءَ گیشتر بیتگ اَنت بلے اشی ءَ ابید ھم آ ڈالچار کنگ بیتگ اَنت آیانی سر ءَ اردو مشگ بیتگ ءُ چریشی ءِ پژدر ءَ بنگالیاں زھرشانی کتگ بلے ریاست ءَ نوآبادیاتی ءِ پالیسیانی زور ءَ بنگالیانی راج ءِ لوٹ ڈالچار کتگ ءُ چریشی ءِ سر ءَ بنگالی لاچار بیتگ ءُ زبان ءِ ھاتر ءَ زھرشانی اش کرتگ چریشی ءَ ھستیں پاکستان ءَ آیاں لسانی بنکی ءِ بگز ءِ نشانگ کتگ اَنت – ھمے واستا بیست ءُ یک فروری نوزدہ سد ءُ پنجاہ ءُ شش ءَ گوستگیں رودراتکی پاکستان، بنگلہ دیشی ورنائیں نودربر وتی ماتی زبان ءِ ڈالچار کنگ ءِ پژدر ءَ زھرشانی اش کتگ ءُ بنگالی نودربرانی سر ءَ تیرگواری ءِ وھد ءَ پنچ بنگالی نودربر وتی زبان ءِ رکینگ ءِ ھاتر ءَ ابید وتی زندگی ءَ زبھر کنگ بیتگ اَنت ءُ جھان ءَ نمیران بیتگ اَنت چریشی ءِ سبب ءَ میان اُستمان ءَ بیست ءُ یک فروری ءِ ھمک سال زبان ءِ میان اُستمان ءِ دارگ ءِ جار جتگ –
جارکش ءَ گوشتگ اے رنگ ءَ مروچی بلوچ راج بازیں تھی ءُ ڈنی زوراکانی دیمپان اَنت اشی ءِ ھواری ءَ ریاست زوراکی ءُ نوک آبادی ءِ پالیسی ءِ درچ ءَ بلوچ راج ءَ زبان ءِ نام ءَ بھر ءُ بانگ کنگ ءِ جتا جتائیں پندلاں سازگ ءَ اِنت – چُشکہ بلوچ راج ءُ گیشتر بلوچ ورنایانی زمہ واری بیت اِنت اے زورگرانی دیم ءَ مھکمیں کوہ ءَ مِک بہ بنت ءُ درانیں نوک آبادیاتی پالیسیاں بے سوب بہ کن اَنت بلوچ راج ءَ وتی راج زیردستی ءُ وتی پجار ءِ رکینگ لوٹ ایت وھدیکہ راجانی زبان گار بیت اِنت گڑا آ راجی بنزہ، راجی ھستی ءُ راجی پکر ءُ لیکہ گار بنت-