گوادر ءَ پوجی کاروان ءِ سر ءَ بوتگیں اُرش ءِ زمّہ واری براس ءَ منّ اِتگ

بدوک ءَ دژمنیں پوج ءِ سر ءَ اُرش کُتگ ءُ سَے کارمند کُشتگ اَنت پنچ زدگ کُتگ اَنت – بلوچ خان

بلوچ آجوئی لوٹوکیں سلاہ بندیں گلانی یکجاھیں گل بلوچ راجی آجوئی سنگر (براس) ءِ جارکش بلوچ خان ءَ وتی رسانکدراں وتی شنگ کرتگیں درشان ءِ تہ ءَ گوشتگ کہ براس ءِ سرمچاراں مروچی گوادر ءِ دمگ بدوک ءَ زورگیریں پاکستانی پوج ءِ کاروان ءِ سر ءَ اُرش کُتگ –

جارکش ءَ وتی درشان ءِ تہ ءَ گوشتگ کہ یکشمبے ءِ روچ ءَ مکران کوسٹل ہائی وے ءَ بدوک ءِ دمگ ءَ بلوچ راجی آجوئی سنگر ءِ سرمچاراں دژمنیں پوج ءِ گاڑیانی کاروان ءِ سر ءَ مزنیں سلاھاں گوں اُرش کُتگ – اُرش ءِ آسر ءَ دژمنیں پوج ءِ سَے کارمند مُرتگ اَنت ءُ پنچ زدگ بوتگ انت وھدیکہ کاروان ءَ ھواریں گاڑیاں ھم تاوان رس اتگ –

آئی ءَ گوشتگ کہ اُرش ءَ پد دژمنیں پوج ءِ بالگرد ھم جنگ جاہ ءَ سر بوتگ انت بلے براس ءِ سرمچار جوانیں شوربندی ءِ رِد ءَ جنگ جاہ ءَ دراتکگ ءُ وتی اوتاک ءَ سوبمندی ءَ گوں سربوتگ انت –

جارکش بلوچ خان ءَ دیمتر ءَ گوشتگ کہ بلوچ سرمچارانی بازاری ءُ کوھی دمگاں سوبمندیں اُرشاں پد پروش وارتگیں دژمنیں ریاست لس مھلوک ءِ سر ءَ پوجی لشکر کشی کنت ءَ مردماں ھاسکر ورنایاں زورانسری آوار جنگ ءُ بیگواہ کنگ ءَ انت، اے وڑیں لشکر کشی ءَ بلوچ راج ءَ وتی چیردست کنگ دژمن ءِ وس ءَ ڈن انت وھدیکہ بے سوبی دژمن ءِ سر ءُ جان ءَ انت –

جارکش ءَ گڈسر ءَ وتی درشان ءِ تہ ءَ گوشتگ کہ زورگیریں پاکستانی پوج ءُ آئی ءِ کمکارانی سر ءَ بلوچ سرمچارانی اُرش ترندی ءَ گوں برجاہ بنت ءُ بلوچ راج ءِ سر ءَ بوتگیں ھر وڑیں زوراکیانی ھساب گرگ بیت اِنت –