گوادر ءَ پاکستانی پوج ءِ سر ءَ دو جاہ ءَ اُرش، اُرشاں چہ یک کارمندے بیران ءُ پنچ زدگ بوتگ انت

سربوتگیں ھالانی رِد ءَ بلوچستان ءِ تیاب دپی دمگ گوادر ءَ پاکستانی پوج ءِ سر ءَ دو جتاھیں جاھاں اُرش کنگ بوتگ چریشی ءَ پاکستانی پوج ءِ یک کارمند ءِ بیران ءُ پنچ زدگ بوتگ انت –

پاکستانی پوج ءِ سر ءَ اُرش گوادر ءِ دمگ پسنی ءُ بدوک ءَ کنگ بوتگ انت –

اھوالکار ءِ رِد ءَ مکران کوسٹل ہائی وے ءِ سر ءَ بدوک ءِ دمگ ءَ پاکستانی پوج ءِ کاروان اُرش کنگ بوتگ – ناشناسیں اُرشکارانی تیر گواری ءَ یک پوجی کارمند ءِ مُرتگ ءُ سَے زدگ بوتگ انت – اُرش ءَ پد پوج ءَ دمگ وتی انگیر ءَ کُتگ اُرشکارانی پٹ پول بندات کتگ بلے تنی وھدی سرکاری بنشون نیمگ ءَ اے ھال ءِ درگت ءَ ھچ وڈیں ھال شنگ کنگ نہ بوتگ –

دومی نیمگ ءَ گوادر دمگ پسنی ءَ پرپٹ ءِ سر ءَ لڈتگیں تراکناکیں شوروانی تراک ءَ پاکستان ائیر فورس ءِ دو کارمند زدگ بوتگ انت –

پولیس ءِ رِد ءَ تراکناکیں شورو پرپٹ ءِ سر ءَ لڈیتگ بوتگ انت ھنچوش کہ پی اے ایف گاڑی چیک پوسٹ ءِ نزیک ءَ رستگ گڈا تراک بوتگ تراک ءَ پاکستان ائیر فورس ءِ دو کارمند زدگ بوتگ انت –