اے ھما سرمچار اَنت
نبشتہ کار: میار بلوچ
دی بلوچستان پوسٹ
شپ تھار اَت، کَش ءُ کِراں چِریت ءُ دگہ گُنڈارانی توار ھم نوں گُشے ھاموشی ءَ گُٹگیر کُتگ اِت اَنت، آزمان استال ءَ پُر اَت آ ھما سئیں استالاں چارگ ءَ اَت کہ مدام ھوار بیتگ اَنت، آئی ءَ چم آزمان ءَ ٹِک داتگ اِت اَنت کہ انچوکہ آئی ءَ ھما سئیں استال دِست اَنت۔ اے سئیں استال کجام ھم وھد ءُ جاہ ءَ آئی ءِ چماں کپتگ اَنت سئیں گُشے مدام گیشتر رژناہ ءُ ھوار گندگ بیتگ اَنت ھیر شپ استالانی چارگ ءَ آسر بیت۔
روچ ٹِک اَت آئی ءَ بُرزگیں جاھے شوھاز اِت کہ رواں چاراں کہ انٹرنیٹ ءَ چی نیوز اَنت چی ھال اَنت، ھالانی چارگ ءُ شوھازگ ءَ آئی ءَ بازیں نبشتانک، پوسٹ ءُ ٹوئٹ ھم یکجاہ کُت اَنت بازیں ھما دمان ءَ وانگ نہ بیت اَنت سکرین شاٹ گِپت اَنت کہ پد ءَ وانگ بنت ھیر آئی ءَ بلوچستان ءِ اھوال وانگ بندات کُت اَنت بلیدہ، تُربت، آواران، ھوشاب، بولان، کوھلو، بمبور، شال، کراچی، گوادر، ھب چُشیں یک ھم شھرے پشت نہ کپتگ اَت کہ اود ءَ آس روک نہ اَت۔
پوجی بیڑ، مردمانی بیگواہ کَنگ، زالبولانی سر ءَ زوراکی، گِس ءُ بازارانی ماندارگ، پوجی بیڑانی نیام ءَ زالبولانی کم شرپ کنگ، بلوچ نودربرانی بیگواھیانی یکشل ءَ برجاھیں درچ، ماما کدیر ءُ آئی ءِ سنگتانی سر ءَ نبشتگ کُتگیں ایف آئی آر ءَ ھوار بازیں انچیں زلم ءُ زوراکیانی ھال ءُ مردمانی بزگی واری ءُ لاچاریانی کسھاں گُش ئے چمانی ارساں ریچگ ءَ لاچار کُت۔
آئی ءَ اھوال وانان کُت اَنت داں آئی ءَ دست کہ دژمن ءَ مزنیں دک ھم وارتگ اَنت، نوشکی ءُ پنجگور ءِ ھال چوناھا جھان ءَ سر اَت بلے آئی ءَ دلجمیں ھال نہ رس اتگ اِت اَنت کہ آ ھمے نیام ءَ جُنزگ ءِ تہ ءَ بیتگ اَنت۔ وھدے آئی ءَ جنگے کسہ وانگ بندات کُت کہ شانزدہ مردماں یک ایٹمی مُلکے داں ھپتاد ءُ دو ساھتاں انچو لاچار کُتگ بیتگ کہ آئی ءَ گُڈ سر ءَ وتی کیمپانی سر ءَ وت شیلنگ کُتگ اَت۔ آئی چم پد ءَ ارسیگ اَت اَنت بلے امبری اے ارس گم ءُ زھر ءِ جاہ ءَ پھر ءُ وشیانی درشانی کنگ ءَ اِت اَنت۔
آئی ءَ بازیں سوشل میڈیا پوسٹ ءُ اھوال ھم زرتگ اَت نبشتانک ءُ نگد ھم سکرین شاٹ کُتگ اَت دانکہ لس مھلوک ءُ زانتکارانی لیکہ ءَ بزانت آئی ءَ دِست کہ اولی رند اَت کہ بلوچ سوشل میڈیا، بلوچ اھوالکار، بلوچ راجکار، بلوچ انسانی ھقانی باسک، درستانی زبان یک اِنت ءُ وتی راجی کنگراں نہ تھنا ساڑاھگ ءَ اَنت بلکیں تاکت ور ءَ گُشگ ءَ اَنت ھم کہ اے تئی زوراکی، تئی زورگری ءُ تئی نیمگ ءَ بلوچانی گلام دارگ ءُ آیانی راجی مڈیانی پُلگ ءَ ھوار بلوچ ءِ ننگ ءُ ناموسانی پادمال کنگ ءِ بگیری ءَ بلوچانی ترندیں بگیری اِنت کہ اے گوں تئی زوراکیاں ھلاس نہ بیت بلکیں انگت ود اِیت۔
آ نہ تھنا وت اے درستیں ھال ءُ پوسٹاں وانگ ءَ اَت بلکیں بنجل ءَ ساڑی ئیں نرمزاراں ھم سرپدی دیگ ءَ اَت۔ آ پوسٹ ءُ اھوالاں وانگ ءَ اَت کہ سنگتے ءَ گُشت بالی پرکانی توار اِنت ءُ اھوال اتکگ کہ زمینی پوج ھم مروچی مزنیں کساسے ءَ ھمے کوھانی کش ءُ کِراں آس گوارگ ءَ اِنت آئی ءَ پد ءَ وتی موبائل بُست، توپگ ءُ ایندگہ سامان بڈ ءَ کُت اَنت ءُ دیم پہ رکیتگیں جاھے رھادگ بیت اَنت۔
اے وھد ءَ کہ آ دژمنے مزنیں لشکریانی گن شپ ھیلی کاپٹرانی شیلنگاں چہ وت ءَ وتی سنگتاں رکینگ ءَ اَت ءُ پہ یک آزاتیں بلوچستانے ءَ سراں سرگوزگ ءِ جھد ءَ ھوار اَت یک نیمگے یکے آیاں ءُ وت ءَ جتا کنگ ءَ اَت، یک نیمگے یکے گُشگ ءَ اَت کہ کجام سال ءُ امبر ءَ ءُ چون مردم زیرگ بہ بنت پہ جھدءَ۔
بلے گواروکیں تیر ءُ شیلنگانی نیام ءَ آئی ءَ کمو ھم گلگ نہ کُت کہ کئے چی جیڑگ ءَ اِنت ءُ کئے راست ءُ ردی ءِ کِشک ءَ کَشگ ءَ اِنت آئی ءَ گمان آ دمان ءَ بس ھمیش اَت کہ اے جنگ ءَ یا من وت ءَ نمیران کناں یا دژمن ءَ کُشاں بلے دگہ چُشیں راھے نیست کہ منی ءُ آئی توپگ ءَ دراتکگیں تیراں سرپد کُت بہ کنت اگاں داشت بہ کنت۔
آئی ءَ زانتگ اَت کہ دژمنے توپگ، آئی ءِ تاکت، آئی ءِ لشکر، آئی ءِ آسراتی اَچ مارا سک باز اَنت بلے آئی ءَ اے ھم باور است اَت کہ دژمن لگور اِنت، دژمن پہ زر جنگ کنگ ءَ اِنت، پہ زوراکی اد ءَ اتکگ، اے زمین، سرڈگار ءُ کوہ درست پہ آئی ءَ درآمد اَنت بلے منی وارس اَنت گوں من گپ کن اَنت من ءَ پجا کار اَنت ءُ منی ھمراہ اَنت۔ آ ھمے باور ءُ راستی ءِ ھمراھی ءَ جنگ دیان اَت ءُ جنگے وشی ءُ تھلیاں وتی زندے ھمراہ کن اَنت ءُ جُنزان اَت۔ آ سرمچار اَت، ھما سرمچار کہ برے بالاچ ءُ برے اسلم اَنت، برے ریھان ءُ ازل اَنت، برے شَے حق ءُ برے داکٹریں خالد اَنت، برے شائریں میرل ءُ ورناھیں سربلند اَنت، برے چوں میرین ءِ دروشم ءَ پہ دژمن ءَ آس گوار اَنت۔ اے ھما سرمچار اَنت کہ زند ءِ گُڈی ساہ ءَ وتی سرڈگار ءِ مرید اَنت ءُ پہ سرجمیں ڈیھہ ءُ راجے باندات ءَ وتی ساہ ءَ ندر کنگ ءَ ھم چک ءُ پد نہ بنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔