سر بیتگیں ھالانی رد ءَ بلوچستان ءِ دمگ ڈیرہ بگٹی ءِ میتگ سوئی ءَ بلوچ بے روزگاریں وانِندھاں زورگیر ءِ سرکاری ٹیل ءُ گیس ءِ گل پی پی ایل ءِ ھلاپ ءَ تُرندیں زھرشانی کُت۔
زھرشانی کنوکیں بلوچ بے روزگاریں انجینئر ءُ ڈپلومہ ھولڈرزاں سوئی یوتھ کونسل ءِ سروگانی ءَ چہ بازار بُگٹی کالونی ءَ زھرشانی ئیں روانک کش اِت ءُ پی پی ایل ءِ کارجاہ ءَ سر کُتگ چہ ایشی ءَ پد ھمے زھرشانی ئیں روانک سوئی ءِ بالی پِٹ ءَ سر بوتگ پد ءَ زھرشانی کنوکاں پی پی ایل ءِ درآمدیگیں پوریاگِر ءُ کارسرانی دگ بند کُتگ اَنت ۔
زھرشانی کنوکاں پی پی ایل ءِ گل ءَ ھمے لوٹ کُتگ کہ مئے بلوچستان ءِ گیس تیوگیں پنجاب ءُ پاکستان ءِ کارجاہ ءُ گِسانی چُل بل اَنت بلے بلوچستان ءِ شھر ءُ میتگ بے گیس اَنت ءُ مئے مردم جنگلاں دار چن اَنت بلوچستان ءِ وانِندگ بے پوریاگِر اَنت بلے مئے دمگاں چہ کراچی ءُ پنجاب ءَ پوریاگِراں لوٹائین اِت۔ اد ءِ مھلوک بے روزگار اَنت ءُ بلوچستان ءِ ھالیگیں پوسٹاں شُما پنجاب ءُ کراچی ءِ مھلوک ءَ بھر ءُ بانگ کن اِت۔
آیاں گُشتگ کہ باید انت پی پی ایل وتی منّگ نامہ ءِ رِد ءَ ڈیرہ بگٹی ءِ وانِندگیں انجینئر ءُ ڈپلومہ ھولڈرزاں ھر دو سال ءَ بیست ءُ پنچ پوریاگِری بہ دنت۔
زانگ بہ بیت کہ بلوچستان ءِ سوئی میتگ ءِ گیس کہ سوئی گیس ءِ نام ءَ نامدار اِنت اود ءَ بلوچ راج ءِ ھلاپ ءَ پی پی ایل ءِ زالمیں شونداتانی آسر ءَ پاکستانی سرکار ءَ ڈیرہ بگٹی ءَ ملٹری آپریشنے بُنگیج کُت ءُ پد ءَ ھمے ملٹری آپریشن ءِ آسر ءَ سرجمیں بلوچستان ءَ آس روک کُتگ-