بولان: مچ ءَ سلاہ بندیں مردماں پوج ءِ کاروان ءِ سر ءَ اُرش کُتگ

سربوتگیں ھالانی رِد ءَ بلوچستان ءِ دمگ بولان ءَ ناشناسیں سلاہ بندیں مردماں پاکستانی پوج ءِ کاروان ءِ سر ءَ اُرش کُتگ –

گیشیں ھالانی رِد ءَ پاکستانی پوج ءِ سر ءَ اُرش بولان ءِ دمگ مچ ءَ بوتگ کہ سلاہ بندیں مردماں اولسر ءَ پوج ءِ گاڑی ءِ تراکناکیں شوروانی نشانگ کُتگ ءُ پدا رند ءَ دگہ سلاھانی گوم ءَ پوجی کارمندانی سر ءَ تیرگواری کُتگ –

اھوالکار ءِ رِد ءَ اُرش ءِ آسر ءَ پاکستانی پوج ءَ جانی ءُ مالی تاوان ءِ دیمپانی بوتگ بلے پدا ھم تنی وھدی سرجمی ءَ راستیں ھبر دیما نہ اتکگ –

زانگ بہ بیت کہ اے دمگاں چدوپیسر ھم پاکستانی پوج ءُ آئی ءِ پانگسانی سر ءَ اُرش کنگ بوتگ کہ اُرشانی زمہ واری بلوچ آجوئی لوٹوکیں سلاہ بندیں گلاں منّ اِتگ انت بلے تنی وھدی اے اُرش ءِ زمّہ واری ھچ گل ءَ نہ منّ اِتگ –