وائس فار بلوچ مسنگ پرسنز ءِ چیئرمین نصراللہ بلوچ ءَ وتی شنگ کُتگیں درشان ءِ تہءَ گُشتگ کہ بلوچستان مزن شھدربرجاہ ءِ بیگواھیں نودربر سھیل بلوچ ءِ کھول ءَ گوں آئی ءَ نیاد کُتگ ءُ ترُس ءِ درشان کُتگ۔
زورانسری بیگواھی ءِ آماچیں بلوچستان مزن شھدربرجاہ ءِ نودربر سھیل بلوچ ءِ کھول ءَ وی بی ایم پی ءِ رھشوناں گوں وتی نیاد ءِ تہءَ اے تُرس ءِ درشان کُتگ کہ سھیل بلوچ یل نہ بیگ ءِ سوب ءَ آئی کھول ذھنی جیڑھانی دیمپان اَنت۔
نودربر ءِ کھول ءِ گُشگ اَت کہ سھیل ءِ مات سک باز ذھنی کرب ءُ جنجالانی آماچ بیگ ءِ سوب ءَ آئی جاور ھال ھراب بیان اَنت پرچہ کہ آئی ءَ شکر ءِ نادراھی ھم است۔
نصر اللہ بلوچ ءَ گُشتگ کہ آئی ءَ سھیل بلوچ ءِ کھول ءَ باوری داتگ کہ وائس فار بلوچ مسنگ پرسنز سہیل بلوچ ءِ رکیتگیں دروشماں یل کنائینگ ءِ ھاترءَ ھمک جاہ ءَ توار چِست کنت۔
زانگ بہ بیت سھیل بلوچ ءُ فصیح بلوچ گوستگیں سال ءَ نومبر ءِ یک ءَ بلوچستان مزن شھدربرجاہ ءَ چہ زورانسری بیگواھی ءِ آماچ کنگ بیتگ اِت اَنت دوھیں نودربرانی یل کنائینگ ءِ ھاترءَ دگہ نودربراں داں پانزدہ روچ ءَ زھرشانی نندانک برجم داشتگ اَت۔
نصراللہ بلوچ ءَ گُشت کہ ما بلوچستان حکومت ءَ دزبندی کنیں کہ آ سھیل بلوچ ءُ فصیح بلوچ ءِ یل کنائینگ ءَ وتی کرد ءَ پیلو بہ کن اَنت یا گُڑا آھانی کھول ءَ آھانی درگتءَ معلوم داری بہ دئینت دانکہ آ ذھنی جنجالاں چہ بہ رک اَنت۔